ރައްޔިތުންގެ ކަންބޮޑުވުންތައް ސީދާ ރައީސުލްޖުމްހޫރިއްޔާއާ ހިއްސާކުރުމަށް ބޭނުންވާ ފަރާތްތަކަށް ޚާއްސަ ފުރުސަތުތަކެއް ފަހިކޮށްދެއްވުމުގެ ގޮތުން، ވަކިވަކިން ބައްދަލުކޮށް ވާހަކަދެއްކުމުގެ ޕްރޮގްރާމެއް ވަރަށް އަވަހަށް ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސް މިކަން ހާމަކުރެއްވީ ޕީއެސްއެމް ނިއުސްގެ ”ނޭޝަން ޗެޓް“ ޕްރޮގްރާމްގެ ދެވަނަ އެޕިސޯޑުގައި ވާހަކަފުޅު ދައްކަވަމުންނެވެ. މި ޕްރޮގްރާމްގައި ވާހަކަފުޅު ދައްކަވަމުން ރައީސް ވިދާޅުވީ، ރައްޔިތުންނާ ބައްދަލުކުރައްވައި ކަންބޮޑުވުންތައް އޮޅުންފިލުއްވުމަށްފަހު އެ ކަންކަމަށް ފިޔަވަޅު ނާޅުއްވާ ކަމަށް ބުނެ އިދިކޮޅު ފަރާތްތަކުން ފަތުރަމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.
ރައީސް ފާހަގަކުރެއްވި ގޮތުގައި، ރާއްޖޭގެ ހުރިހާ ރަށްރަށަކަށް ވަޑައިގެން ރައްޔިތުންގެ ހާލަތު ގާތުން ބައްލަވައި، ބޭރު ގައުމުތަކުގައި ދިރިއުޅޭ ދިވެހިންނާވެސް އެމަނިކުފާނު ގެންދަވަނީ ބައްދަލުކުރައްވަމުންނެވެ. އަދި މިފަދަ ބައްދަލުވުންތަކުގައާއި ސިޓީ މެދުވެރިކޮށް ހުށަހަޅާ ކަންކަން ބަލައި، އެކަންކަމަށް ހައްލު ހޯދައިދިނުމަށް ޚާއްސަ ޓީމަކުން މަސައްކަތް ކުރަމުންދާ ކަމަށް ވިދާޅުވިއެވެ.
”އަޅުގަނޑުމެން ހުންނާނެ އެފަރާތްތަކަށް އެކަން ބަލާދީފައި. މިސާލަކަށް އެ ފަރާތުގެ އެޕްލިކޭޝަން ރަނގަޅަށްތޯ އޮތީ، އެއަށް ރަނގަޅަށް ބަލާފައިތޯ އޮތީ، އެކަން ބަލާދީފައި އެއަށް ޖަވާބުދެން. ދެން އެހެން ހުރިހާ ކަމެއްގައިވެސް އެކި ކަހަލަ އެހީތެރިކަމަށް އެދޭ. އެކި ކަހަލަ ކަންކަން ލަސްވެފައި ހުރޭ ސަރުކާރުގެ ތެރޭގައި. އެފަދަ އެތައް ކަމެއް ވާނެ ބަލާފައި“ ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނާ ބައްދަލުކޮށްގެން ނުވަތަ އެ ނޫން ގޮތްގޮތުން ވިޔަސް، ރައްޔިތުން ހުށަހަޅާފައިވާ ކަންކަމުގެ ތެރެއިން ގޮތެއް ނުނިމި ނުވަތަ ހައްލެއް ހޯދައިނުދެވި އެއްވެސް ކަމެއް ނޯންނާނެ ކަމަށެވެ. އަދި ޖަވާބެއް ނުލިބި ލަސްވެފައިވާ ކަމެއް އޮތް ނަމަ، އެއީ ފްލެޓް ފަދަ ބޮޑެތި މަޝްރޫޢުތަކާ ގުޅުންހުރި ކަމަކަށް ވުން އެކަށީގެންވާ ކަމަށާއި، ރައްޔިތުންގެ ކަންބޮޑުވުންތަކަކީ އެމަނިކުފާނު ނުހަނު އިސްކަންދެއްވައިގެން ބައްލަވާ ކަންކަން ކަމުގައި ވިދާޅުވިއެވެ.
ބައެއް ފަރާތްތަކުން ސީދާ ރައީސާ ބައްދަލުކުރުމަށް އެދެމުންދާކަން ފާހަގަކުރައްވައި، ރައީސް ވިދާޅުވީ ވަގުތު ހުރިގޮތުން ހުރިހާ ބައްދަލުވުންތަކެއް އަދި ބޭއްވިފައި ނުވި ނަމަވެސް، ރައީސުލްޖުމްހޫރިއްޔާގެ އޮފީހުގެ ވަޒީރުންގެ ފެންވަރުގެ ބޭފުޅުން މެދުވެރިކޮށް އެ ޝަކުވާތައް ބައްލަވަމުން ގެންދަވާ ކަމަށެވެ.
އަލަށް ފެއްޓެވުމަށް ނިންމަވާފައިވާ ޚާއްޞަ ޕްރޮގްރާމާ ގުޅޭގޮތުން ރައީސް ވިދާޅުވީ، ކޮންމެ ހަފުތާއަކު އެއް ދުވަހު ނުވަތަ ދެ ދުވަހު، ކަނޑައެޅޭ ވަކި އުސޫލެއްގެ ތެރެއިން ރައްޔިތުންނާ ބައްދަލުކުރެއްވުމަށް ވަގުތު ހަމަޖައްސަވާނެ ކަމަށެވެ.
”އެކަމަށް އެދޭ ފަރާތްތަކަށް ވަގުތު އޮންނަ ވަރަކަށް އުސޫލުގެ ތެރެއިން ވަގުތު ދެވިގެންދާނެ. 93 ދާއިރާ ނިމޭނެ ލައްކަ ދުވަހުން. ކޮންމެ ދާއިރާއަކުން 10 ނުވަތަ 15 އާއިލާއަކާ ބައްދަލުވާކަމަށް ވަންޏާއި، 15 ވަރަކަށް ގެޔާ ބައްދަލުވަންޏާއި ވަރަށް ގިނަ މީހުންނަށް ފުރުސަތު ލިބިގެންދާނެ. އެމީހަކު ބޭނުންވާ ވާހަކަތަކެއް ދައްކަން. އެކަހަލަ ޕްރޮގްރާމެއް ވަރަށް އަވަހަށް ފަށަން އެބަ އުޅެން،“ ރައީސް ވިދާޅުވިއެވެ.
މީގެ އިތުރުން، ކުރިއަށް އޮތް ތަނުގައި ރަށްރަށަށް ކުރައްވާ ދަތުރުފުޅުތަކުގައި، ހަމައެކަނި ކައުންސިލްތަކާއި މުއައްސަސާތަކާ ބައްދަލުކުރެއްވުމުގެ ބަދަލުގައި، އާންމު ރައްޔިތުންނާ ބައްދަލުކުރެއްވުމަށް މިހާރަށްވުރެ އިތުރު ވަގުތު ހޭދަކުރެއްވުމަށް ނިންމަވާފައިވާ ކަމަށްވެސް ރައީސް މުޢިއްޒު ވިދާޅުވިއެވެ. އެގޮތުން ކައުންސިލްތަކަކީ ރައްޔިތުން އިންތިޚާބުކޮށްފައިވާ މަންދޫބުން ކަމުގައިވީ ނަމަވެސް، ދެން ކުރައްވާ ދަތުރުފުޅުތަކުގައި އާންމު ރައްޔިތުންގެ ތެރެއިން ބައްދަލުކުރަން ބޭނުންވާ ފަރާތްތަކަށް އުސޫލެއްގެ ތެރެއިން އެ ފުރުސަތު ފަހިކޮށްދެއްވާނެ ކަމަށް ރައީސް ވިދާޅުވިއެވެ.
