އިންޑިއާގެ ހަރުކަށި ބީޖޭޕީ ސަރުކާރުން ހިންގާ އުއްތަރް ޕްރަދޭޝް ސްޓޭޓްގެ ޝާމްލީ ޑިސްޓްރިކްޓްގައި، ކައިވެނި ޕާޓީ (ވަލީމާ) އެއްގައި ގެރިމަސް ކައްކާފައިވާ ކަމަށް ބުނާ ސާބިތުނުވާ ތުހުމަތުތަކެއްގެ މައްޗަށް ބިނާކޮށް 7 މުސްލިމުން ހައްޔަރުކޮށް، މުސްލިމް އާއިލާއަކަށް ނިސްބަތްވާ ބޮޑު ކައިވެނި ހޯލެއް ސަރުކާރުން ބަންދުކޮށްފިއެވެ.
އިންސާނީ ޙައްޤުތަކަށް ވަކާލާތުކުރާ ޖަމާޢަތްތަކުން ވަނީ، ކޯޓަކުން ކުށް ސާބިތުވުމުގެ ކުރިން މުސްލިމުންގެ މުދަލާއި ވިޔަފާރިތައް ހަލާކުކުރުމަށް އިންޑިއާ ސަރުކާރުން ގެންގުޅޭ ”ބުލްޑޯޒަރު އިންސާފު“ގެ ސިޔާސަތު ވަރަށް ހަރުކަށި އިބާރާތުން ކުށްވެރިކޮށްފައެވެ.
ފޮރެންސިކް ހެކި ނެތް! މިއީ ހަރުކަށި ހިންދޫންގެ ނުފޫޒު
ޖޫން 18 ވީ ބުރާސްފަތި ދުވަހުގެ ރޭ ފުލުހުން ކައިރާނާގައި ހުންނަ ”މުޣަލް ގާޑަން މެރިއޭޖް ހޯލް“ ރޭޑުކުރީ އެތަނުގައި ގެރިމަސް ކައްކާ ކަމަށް ބުނެ ދިން ސިއްރު މަޢުލޫމާތަކަށެވެ. ފުލުހުން ވަނީ ކައިވެނިވީ ޒުވާނާ (ފަރުމާން)، އޭނާގެ ބޭބެ، ކައްކާ އަދި ހޯލްގެ މެނޭޖަރު ހިމެނޭގޮތަށް 7 މުސްލިމުން ހައްޔަރުކޮށް ޖަލަށްލާފައެވެ. ނަމަވެސް، ކޯޓަށް ހުށަހަޅާނެ އެއްވެސް ފޮރެންސިކް ލެބް ރިޕޯޓެއް ނެތްއިރު، ފުލުހުން ވަނީ އަތުލައިގަތް މަސްތައް ކޯޓަށް ދެއްކުމުގެ ކުރިން ނައްތާލާފައެވެ. ކައިވެންޏަށް ދިޔަ މީހުން ބުނިގޮތުގައި އެއީ ކޮން މަހެއްކަން އެކަކަށްވެސް ޔަޤީނެއް ނޫނެވެ.
މި ހާދިސާއާ ގުޅިގެން ހަރުކަށި ހިންދޫ ޖަމާޢަތްތަކުން ވަނީ އެ މުސްލިމް ހޯލް އެއްކޮށް ތަޅާލުމަށް ސަރުކާރަށް އެއް ހަފްތާގެ މުއްދަތެއް ދީފައެވެ. އަދި ސަރުކާރުން އެތަން ނުތަޅައިފިނަމަ އަމިއްލައަށް ނިކުމެ ތަޅާލާނެ ކަމުގެ އިންޒާރު ދިނުމާއެކު، މުޒައްފަރުނަގަރް ޑިވެލޮޕްމަންޓް އޮތޯރިޓީން ވަނީ އެ ހޯލަކީ ”ޤަވާއިދާ ޚިލާފަށް ހަދާފައިވާ ތަނެއް“ ކަމަށް ބުނެ، ހޯލް ސީލްކޮށް، އެތަން ބުލްޑޯޒަރުން ތަޅާލުމުގެ މަސައްކަތް އަވަސް އަރުވާލާފައި ފަށާފައެވެ. މިއީ އިންޑިއާގެ ސެކިއުލަރ ޑިމޮކްރެސީގެ ތެރެއިން މުސްލިމުންގެ އަޣްލަބިއްޔަތު އޮތް ސަރަޙައްދުތަކުގައިވެސް މުސްލިމުން ނިކަމެތިކޮށް، ދީނަށް ފުރައްސާރަކުރުމަށް ހިންގާ ނިޒާމީ އަނިޔާވެރިކަމެކެވެ.
މުސްލިމުން ނައްތާލުމަށް އިންޑިއާގެ ބީޖޭޕީ ސަރުކާރުން ހިންގާ ނިޒާމީ އަނިޔާވެރިކަން
އިންޑިއާގައި ވެރިކަންކުރާ ހަރުކަށި ބީޖޭޕީ އާއި ބައިވެރި ހިންދޫ ފިކުރުގެ ބޮޑުން އެ ޤައުމުގެ 200 މިލިއަނަށްވުރެ ގިނަ މުސްލިމް އާބާދީ ނައްތާލުމަށާއި، އެމީހުންގެ އަސާސީ ޙައްޤުތައް ނިގުޅައިގަތުމަށް ވަރަށް ނުރައްކާތެރި ނިޒާމީ ޖަރީމާތަކެއް ހިންގަމުންދާކަމަށް އެކި ބައިނަލްއަގުވާމީ ޖަމިއްޔާތަކާ ކަމާބެހޭ މާހިރުން ދަނީ އިންޒާރުދީ ރިޕޯޓްތައް ނެރެމުންނެވެ.
އިންސާނީ ޙައްޤުތަކަށް ވަކާލާތުކުރާ ބައިނަލްއަޤްވާމީ ޖަމާޢަތްތަކުން ފާހަގަކުރާ ގޮތުގައި، އިންޑިއާގެ ދައުލަތުގެ ބާރުތަކާއި ހަރުކަށި ހިންދޫ ޓެރަރިސްޓް ޖަމާޢަތްތައް ގުޅިގެން ދަނީ މުސްލިމުންނާ ދެކޮޅަށް ފާޅުގައި ހަނގުރާމަ އިޢުލާންކުރަމުންނެވެ.
– ”ބުލްޑޯޒަރު އަނިޔާ“ އާއި ދީނީ ހުރަސްތައް: ބީޖޭޕީގެ ކޮންޓްރޯލް އޮންނަ ސްޓޭޓްތަކުގައި (ޚާއްޞަކޮށް އުއްތަރު ޕްރަދޭޝް ފަދަ ތަންތަނުގައި) މުސްލިމުންނާ ދެކޮޅަށް ދޮގު ތުހުމަތުތައް ކުރުމަށްފަހު، އެމީހުންގެ ގެދޮރާއި، ވިޔަފާރިތަކާއި، މުޤައްދަސް މިސްކިތްތައް ބުލްޑޯޒަރުން ތަޅާލުން ވަނީ އާންމު ކަމަކަށް ހަދާފައެވެ. މީގެ އިތުރުން، މުސްލިމުންގެ އަސާސީ ދީނީ މިނިވަންކަމަށް ހުރަސްއަޅައި، މަގުމަތީގައާއި އާންމު ތަންތަނުގައި ހުކުރު ނަމާދުކުރުން ވަނީ ޤާނޫނުން މަނާކޮށްފައެވެ.
– ހަރުކަށި ޖަމާޢަތްތަކަށް ދޭ ހިމާޔަތް: މަގުމަތީގައި މުސްލިމުން ހިފަހައްޓައި، އަނިޔާކޮށް، ފާޅުގައި މަރަމުންދާ ހިންދޫ އެކްސްޓްރީމިސްޓް ޖަމާޢަތްތަކަށް (ގެރި ވިޖިލަންޓީ ޖަމާޢަތްތަކަށް) ބީޖޭޕީ ސަރުކާރުން ދަނީ ފުރިހަމަ ޤާނޫނީ އަދި އަސްކަރީ ހިމާޔަތް ދެމުންނެވެ. މުސްލިމަކު މަރާލާ ހިންދޫ މީހާ ހައްޔަރުކުރުމުގެ ބަދަލުގައި، ފުލުހުން މައްސަލަ ރައްދުކުރަނީ މަރުވި މުސްލިމް މީހާގެ އާއިލާއަށެވެ. މިއީ މުސްލިމުންގެ ނަސްލު ނައްތާލުމަށް ހިންގާ ނިޒާމީ ޢަމަލެކެވެ.
– ވެރިންގެ އިސްލާމްއޮފޯބިއާ ބަސްމަގު: މި ހުރިހާ އަނިޔާވެރިކަމެއްގެ އަސްލަކީ އިންޑިއާގެ އެންމެ މަތީ ވެރިންގެ ކިބައިން ފެންނަ ހަރުކަށި އިސްލާމްއޮފޯބިއާ އެވެ. ހޯމް މިނިސްޓަރ އަމިތު ޝާ ފަދަ ވެރިން ވަނީ މުސްލިމުންނަކީ ”ދުނިޔޭގެ ފަނިފަކުސާ“ ކަމަށް ސިފަކުރައްވާފައެވެ. އަދި ބީޖޭޕީގެ ކޯލިޝަންގެ އިސް ވެރިން ދޭ އިންޓަވިއުތަކުގައި ފާޅުގައި ބުނަމުންދަނީ، މުސްލިމުންގެ އަޣްލަބިއްޔަތު އޮންނަ ކޮންމެ ސަރަޙައްދަކީ އިންޑިއާއަށް ހުރި ”މައްސަލައެއް“ ކަމަށާއި، މުސްލިމުންނަކީ އެ ޤައުމުގެ ހަމަހަމަ ރައްޔިތުން ނޫން ކަމަށެވެ. މުސްލިމުންނަކީ ބިރުވެރި ”ބޫގީމޭން“ އެއްގެ ގޮތުގައި ދައްކައި، ދޮގު ބިރުވެރިކަން އުފައްދައިގެން، ހިންދޫ އާބާދީ މުސްލިމުންނާ ދެކޮޅަށް ނެރުމަކީ ބީޖޭޕީގެ މައިގަނޑު ސިޔާސީ އުކުޅެވެ.
