އެމެރިކާގެ ޓެކްސަސްގައި މިހާރު ކުރިއަށްދާ 2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގައި، ބުރާސްފަތި ދުވަހު ޖަޕާނާއި ސްވިޑަން ބައްދަލުކުރި މެޗު 1-1 އިން އެއްވަރުވެ، ދެ ޓީމުވެސް މުބާރާތުގެ ނޮކައުޓް މަރުހަލާއަށް ދަތުރުކޮށްފިއެވެ. މި ނަތީޖާއާއެކު، ގަދަ 32 ގެ ބުރުގައި ޖަޕާނުން ނުކުންނަން ޖެހޭނީ ފަސް ފަހަރުގެ ޗެމްޕިއަން ބްރެޒިލާ ދެކޮޅަށެވެ.
އާލިންގްޓަންގެ އޭޓީ އެންޑް ޓީ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފު ލަނޑެއް ނުޖެހި އެއްވަރުވެފައި އޮތުމަށްފަހު، މެޗުގެ 56 ވަނަ މިނެޓުގައި ޑައިޒެން މަައެޑާ ވަނީ ލަނޑެއް ޖަހައި ޖަޕާނަށް ކުރިހޯދައިދީފައެވެ. ނަމަވެސް އޭގެ ހަ މިނެޓު ފަހުން ސްވިޑަންގެ އެންތަނީ އެލަންގާ ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ.
މިއީ ޖަޕާނުން ޖެހިޖެހިގެން ވޯލްޑް ކަޕެއްގެ ގްރޫޕް މަރުހަލާ ފަހަނައަޅައި ދިޔަ ތިންވަނަ ފަހަރެވެ. ގްރޫޕް އެފްގެ ދެވަނަ ޓީމުގެ ގޮތުގައި ޖަޕާން ކޮލިފައިވިއިރު، އެ ގްރޫޕުގެ އެއްވަނަ ހޯދީ ނެދަލޭންޑްސްއެވެ. އަންނަ ހޯމަ ދުވަހު ހިއުސްޓަންގައި ބްރެޒިލާ ދެކޮޅަށް ކުޅޭ މެޗާ ބެހޭގޮތުން ޖަޕާނުގެ ކޯޗު ހާޖިމޭ މޮރިޔާސޫ ބުނީ، ދުނިޔޭގެ ރޭންކިންގެ 5 ވަނައިގައި އޮތް ބްރެޒިލާ ދެކޮޅަށް ކުޅުމަކީ ލިބޭނެ ވަރަށް ބޮޑު ތަޖުރިބާއެއް ކަމަށާއި، ބްރެޒިލް ބަލިކޮށް އަނެއް ބުރަށް ދިއުމުގެ ފުރުސަތު އެބައޮތް ކަމަށް ގަބޫލުކުރާ ކަމަށެވެ.
ސްވިޑަންއަށް ބަލާއިރު، އެ ގައުމުން ވަނީ 1994 ވަނަ އަހަރުގެ ފަހުން ވޯލްޑް ކަޕަށް ކޮލިފައިވި ކޮންމެ ފަހަރަކުވެސް ނޮކައުޓް ބުރަށް ދަތުރުކޮށްފައެވެ. ސްވިޑަންގެ ކޯޗު ގްރަހަމް ޕޮޓާ ބުނީ، މިވަގުތު އެންމެ މުހިންމީ ކުޅުންތެރިންގެ ފިިޒިކަލް ހާލަތު ރަނގަޅު ކުރުން ކަމަށާއި، ދެން ބައްދަލުކުރަން ޖެހޭނެ ޓީމަކަށް ތައްޔާރުވާން ޖެހޭ ކަމަށެވެ.
މި މެޗުގައި ޖަޕާނުގެ ގޯލްކީޕަރު ޒިއޯން ސުޒުކީ ވަނީ މުހިންމު ސޭވްތަކެއް ކޮށްފައެވެ. ހާއްސަކޮށް މެޗުގެ ފަހު ވަގުތު އެލަންގާ އާއި އެލެގްޒެންޑަރ އިސާކް ފޮނުވާލި ނުރައްކާތެރި ހަމަލާތައް އޭނާ ވަނީ ދިފާއުކޮށްފައެވެ.
ޖުމްލަ 70،137 ސަޕޯޓަރުންގެ ކުރިމަތީގައި ކުޅުނު މި މެޗަކީ ޖަޕާނުން ވޯލްޑް ކަޕެއްގައި މިހާތަނަށް އެންމެ ގިނަ ލަނޑު ޖެހި މުބާރާތެވެ. މި މުބާރާތުގައި މިހާތަނަށް އެ ޓީމުން ވަނީ 7 ލަނޑު ޖަހާފައެވެ. މީގެ ކުރިން އެ ޓީމަށް އެންމެ ގިނަ ލަނޑު ޖެހިފައިވަނީ 2018 ވަނަ އަހަރުގެ ރަޝިއާ ވޯލްޑް ކަޕްގައެވެ. އެ ފަހަރު އެ ޓީމުން 6 ލަނޑު ޖެހިއެވެ.
