ޕޭޕަލްގެ ހިދުމަތެކޭ އެއްފަދައިން ޔޫޓިއުބް މޮނެޓައިޒޭޝަންގެ ހިދުމަތް ވެސް ކުރިއަށް އޮތް ތަނުގައި ރާއްޖެއަށް ތައާރަފްކުރެވިގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ޕީއެސްއެމްއިން ގެނެސްދޭ ”ނޭޝަން ޗެޓް“ ޕްރޮގްރާމްގެ ދެވަނަ އެޕިސޯޑްގައި ވާހަކަފުޅުދައްކަވަމުން ރައީސް މުޢިއްޒު ވިދާޅުވީ، ރާއްޖޭގައި ޑިޖިޓަލް އިކޮނޮމީއެއް ގާއިމުކުރުމަކީ މި ސަރުކާރުގެ އެންމެ ބޮޑު އަމާޒު ކަމަށެވެ. އެގޮތުން 2030 ވަނަ އަހަރާއި ހަމައަށްދާއިރު، ޖީޑީޕީގެ 15 އިންސައްތަ ޑިޖިޓަލް އިކޮނޮމީން ހިއްސާކުރުމަކީ މި ސަރުކާރުގެ އަމާޒު ކަމަށް އެމަނިކުފާނު ވިދާޅުވިއެވެ.
މި އަމާޒަށް ވާސިލުވުމަށްޓަކައި ބައިނަލްއަގުވާމީ ޕާޓްނަރުން ރާއްޖޭގައި ގާއިމުވުމަކީ މުހިންމު ކަމެއްކަން ފާހަގަކުރައްވަމުން ރައީސް ވިދާޅުވީ، ގޫގުލްއިން ވެސް ރާއްޖޭގައި މިހާރު މަސައްކަތްތައް ފަށާފައިވާ ކަމަށެވެ. މިއީ 2024 ވަނަ އަހަރު އދ. ގެ އާންމު މަޖިލީހަށް ކުރެއްވި ދަތުރުފުޅުގައި ކުރެވުނު މަޝްވަރާތަކުގެ ނަތީޖާ ކަމަށް އެމަނިކުފާނު ވިދާޅުވިއެވެ.
މި މަޝްރޫއާއެކު ގޫގުލްގެ އިތުރު ހިދުމަތްތައް ރާއްޖެއަށް ވަރަށް އަވަހަށް ތާއަރަފްކުރުމަށް މަސައްކަތްކުރަމުން އަންނަ ކަމަށާއި އޭގެތެރޭގައި ޔޫޓިއުބް މޮނެޓައިޒޭޝަން ހިދުމަތް ހިމެނޭ ކަމަށް އެމަނިކުފާނު ވިދާޅުވިއެވެ. ރައީސް ވިދާޅުވި ގޮތުގައި، މިކަމުގެ ސަބަބުން ޒުވާނުންނަށާއި ކްރިއޭޓިވް އިންޑަސްޓްރީގައި މަސައްކަތްކުރާ ފަރާތްތަކަށް ބޮޑެތި ލުއިތަކެއް ލިބިގެންދާނެއެވެ.
ޕޭޕަލްގެ ހިދުމަތް ރާއްޖެއަށް ތައާރަފްކުރުމަށް ކުރެވުނު މަސައްކަތްތަކަށް އަލިއަޅުއްވާލައްވަމުން ރައީސް ވިދާޅުވީ، އެކަމަށް ބޭނުންވާ ރެގިއުލޭޓަރީ އަދި ލީގަލް ކަންތައްތައް ހަމަޖެއްސުމަށް ގާތްގަނޑަކަށް އަހަރެއްހައި ދުވަސް ހޭދަވި ކަމަށެވެ. ޕޭޕަލްއިން ރާއްޖޭގެ ލޯކަލް ޕާޓްނަރެއްގެ ގޮތުގައި އުރީދޫ އިހްތިޔާރު ކުރުމުން، ސަރުކާރާއި ޕޭޕަލް އަދި އުރީދޫ ގުޅިގެން ގާތުން މަސައްކަތްތަކެއް ކުރެވިފައިވާކަން ރައީސް ފާހަގަކުރެއްވިއެވެ.
އުރީދޫ މެދުވެރިކޮށް ރާއްޖެއަށް ޕޭޕަލްގެ ހިދުމަތް ތައާރަފްކުރި ނަމަވެސް، ޕޭޕަލްގެ ހުރިހާ ހިދުމަތްތަކެއް ރާއްޖެއަކަށް ނުލިބެއެވެ. މިކަމަށް އިޝާރަތްކުރައްވަމުން ރައީސް ވިދާޅުވީ މިއީ ހަމައެކަނި ފެށުމެއް ކަމަށާއި، އަމާޒަކީ ކުރިއަށް އޮތް ތަނުގައި ޕޭޕަލްގެ އިތުރު ހިދުމަތްތަށް ރާއްޖޭގައި ތައާރަފްކުރުން ކަމަށެވެ. ހަމައެހެންމެ، ޑިޖިޓަލް އިކޮނޮމީއެއް ގާއިމުކުރުމަށް ވެވަޑައިގެންފައިވާ ވައުދު ފުއްދަވާނެކަމުގެ ޔަގީންކަން ރައީސް ދެއްވިއެވެ.
