މާލެ އުތުރުފަރާތު ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ މަސައްކަތްތައް މެކުހަށް ޖަހާލާފައިވާއިރު އަންނަ ހަފުތާގެ ބުދަ ދުވަހު މަގުގެ އެންމެފަހު ސެގްމަންޓުގައި ތާރުއަޅަން ފަށާނެ ކަމަށް މަސައްކަތް ކުރިއަށްގެންދާ ކުންފުނި އެމްޓީސީސީން މިއަދު ބުނެފިއެވެ.
އެމްޓީސީސީން މީސް މީޑިއާގައި ހިއްސާކޮށްފައިވާ ޕޯސްޓެއްގައި ބުނެފައިވަނީ، ބޮޑުތަކުރުފާނު މަގުގެ އެންމެފަހު ސެގްމަންޓުގައި ތާރުއެޅުމުގެ މަސައްކަތް އަންނަ ހަފުތާގެ ބުދަ ދުވަހު ކުރިއަށްގެންދިއުމަށް ނިންމާފައިވާ ކަމަށާއި މި މަސައްކަތް ކުރީނީ ދެ ބަޔަކަށް ބަހާލައިގެން ކަމަށެވެ. އެންމެ ފުރަތަމަ ތާރުއަޅާނީ ހެންވޭރު ޓާމިނަލުން ފެށިގެން ފޮރިންގ މިނިސްޓްރީއާ ހަމައަށެވެ. އެއަށްފަހު ފުރަތަމަ ބައިގައި ތާރުއަޅައި ނިމުމުން ދެން ތާރުއަޅަން ފަށާނީ ފޮރިންގ މިނިސްޓްރީން ފެށިގެން ރަސްމީ ފާލަމާ ހަމައަށެވެ.
ތާރުއެޅުމުގެ މަސައްކަތް ފެށުމުގެ ގޮތުން ހެންވޭރު ޓާމިނަލުން ފެށިގެން ކާނިވާ ޕާކިންގ ޒޯނަށް ވަންނަ ސަރަހައްދު ވަގުތީ ގޮތުން ބަންދުކުރާނެ ކަމަށް އެމްޓީސީސީން ވަނީ ބުނެފައެވެ. މަގު ބަންދުކުރި ނަމަވެސް އެ ޕާކިންގ ޒޯނުގައި ވެހިކަލް ޕާކުކުރެވޭނެއެވެ. ބޮޑުތަކުރުފާނު މަގު ތަރައްގީކުރުމުގެ މަސައްކަތް އަންނަ ޖުލައި މަހުގެ 26 ވަނަ ދުވަހުގެ ކުރިން ނިންމައި އާންމުންނަށް ހުޅުވާލާނެ ކަމަށް އެމްޓީސީސީން މައުލޫމާތުދެއެވެ.
އެމްޓީސީސީން ބުނީ އެ މަޝްރޫއުގެ ފުރަތަމަ ފިޔަވަހީގެ ނަރުދަމާއާއި ފެން ލައިނާއި މައި ފެން ހޮޅިލުމުގެ މަސައްކަތާއި ސްޓޯމްވޯޓަރ ކެޗްޕިޓު އަދި ކޭބަލް ޖަންކްޝަނުގެ މަސައްކަތް ވެސް އެއްކޮށް ނިމިފައިވާ ކަމަށެވެ. ހަމައެހެންމެ، މަގުގެ ޕޭވްމަންޓުގެ މަސައްކަތުގެ ވެސް އެއްބައި އެއްކޮށް ނިމިފައިވާ ކަމަށާއި މިހާރު ކުރިއަށްގެންދަނީ ދެވަނަ ސެގްމެންޓާއި ތިންވަނަ ސެގްމަންޓްގެ މަސައްކަތް ކަމަށް އެ ކުންފުނިން ވަނީ ބުނެފައެވެ.
ބޮޑުތަކުރުފާނު މަގުގެ މިހާރު ތަރައްގީކުރަމުން އަންނަ ސަރަހައްދު އާންމުންނަށް ބަންދުކޮށް، ފަޅުން ބައެއް ހިއްކައިގެން މަގު ފުޅާކުރުމުގެ މަސައްކަތް ފެށީ މިދިޔަ މާޗުރި މަހުގެ 23 ވަނަ ދުވަހުއެވެ.
