މަޖިލިސް ތަޅުމުގައި އިދިކޮޅު އެމްޑީޕީއަށް ނިސްބަތްވާ މެންބަރުން އިހުތިޖާޖު ކުރަނީ މަޖިލީހުގެ މަސައްކަތްތަކަށް ހުރަސްއެޅުމުގެ ބޭނުމުގައި ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާ ތަމްސީލުކުރައްވާ މެންބަރު އަޙްމަދު އަޒާން ވިދާޅުވެއްޖެއެވެ.
އަޒާން މި މޭރުމުން ވިދާޅުވީ، ރައްޔިތުންގެ މަޖިލިހުގެ ހިތަދޫ އުތުރު ދާއިރާ ތަމްސީލުކުރައްވާ އެމްޑީޕީގެ މެންބަރު ޢަބްދުﷲ ސޯދިގު (ސޯބެ) އަށް މަޖިލީހުގެ ރަނގަޅު ކޮމިޓީއަކުން ޖާގަ ދީފައިނުވާ ކަމަށް ވިދާޅުވެ، އެމްޑީޕީގެ ޕާލަމަންޓްރީ ގްރޫޕްގެ ބައެއް މެންބަރުން މަޖިލިހުގެ ތަޅުމުގައި އިއްޔެ ހަމަނުޖެހުން ހިންގުމާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ.
20 ވަނަ މަޖިލީހުގައި ތިއްބެވީ އެމްޑީޕީގެ 13 މެމްބަރުން، އެއީ މުޅި މަޖިލީހުގެ 13 އިންސައްތަ. ކޮމިޓީތަކުގެ 13.7 އިންސައްތަ ޖާގަ އެމްޑީޕީއަށް ވަނީ ދެވިފަ. މަޖިލީހުގެ އެންމެ މުހިންމު މަސައްކަތްތައް ކުރާ މާލިއްޔަތު ކޮމިޓީގެ 18 އިންސައްތަ އަދި އިޤްތިސާދީ ކޮމިޓީގެ 27 އިންސައްތަ ޖާގަ… https://t.co/lKmvywZlnj
— Ahmed Azaan (@axanner) June 25, 2026
މީސް މީޑިއާގައި ހިއްސާކުރެއްވި ޕޯސްޓުގައި އަޒާން ވިދާޅުވީ، 20 ވަނަ ރައްޔިތުންގެ މަޖިލީހުގައި ތިއްބެވީ އެމްޑީޕީއަށް ނިސްބަތްވާ 13 މެންބަރުން ކަމަށާއި އެއީ މުޅި މަޖިލީހުގެ 13 އިންސައްތަ ކަމަށެވެ. އަދި ކޮމިޓީތަކުގެ 13.7 އިންސައްތަ ޖާގަ އެމްޑީޕީއަށް ދީފައިވާކަން ފާހަގަކުރައްވަމުން އަޒާން ވިދާޅުވީ މަޖިލީހުގެ އެންމެ މުހިންމު މަސައްކަތްތައް ކުރާ މާލިއްޔަތު ކޮމިޓީގެ 18 އިންސައްތަ އަދި އިގްތިސާދީ ކޮމިޓީގެ 27 އިންސައްތަ ޖާގަ އެމްޑީޕީއަށް ދެވިފައިވާ ކަމަށެވެ.
ނަމަވެސް އެމްޑީޕީ މެމްބަރުން މަޖިލީހުގައި ތިއްބެވި އަދަދަށް ބަލާއިރު މި ދެ ކޮމިޓީން އަސްލު އެމްޑީޕީއަށް ދޭން ޖެހޭނީ އެންމެ ޖާގައެއް ކަމަށް އަޒާން ވަނީ ވިދާޅުވެފައެވެ. އަޒާން ވިދާޅުވީ، 19 ވަނަ މަޖިލީހުގައި ޕީޕީއެމް/ޕީއެންސީގެ އަށް މެންބަރުން ތިއްބެވިއިރު އެއީ އެ މަޖިލީހުގެ 10 އިންސައްތަ ކަމަށާއި ނަމަވެސް، އެމްޑީޕީގެ ސުޕަރ މެޖޯރިޓީ އޮވެ އޭރުގެެ އިދިކޮޅަށް ކޮމިޓީތަކުން ދީފައިވަނީ ކޮމިޓީތަކުގެ އެންމެ އަށް އިންސައްތަ ކަމަށެވެ.
ސޯބެއަށް މަޖިލީހުގެ ރަނގަޅު ކޮމިޓީއަކުން ޖާގަ ނުދޭ ކަމަށް ވިދާޅުވެ، އެމްޑީޕީގެ ޕާލަމެންޓްރީ ގްރޫޕްގެ ބައެއް މެންބަރުން މަޖިލީހުގެ އިއްޔެގެ ޖަލްސާގައި ހަމަނުޖެހުން ހިންގުމާ ގުޅިގެން އެ ހުރިހާ މެންބަރުންގެ ނަން އިއްވުމަށްފަހު ތަޅުމުން ބޭރަށް ނެރުނެވެ. އަދި އެއަށްފަހު މީޑިއާތަކަށް އެ ބޭފުޅުން ދެއްވި އިންޓަވިއުއެއްގައި ވިދާޅުވީ، މަޖިލީހުގެ ކޮމިޓީއެއްގައި ސޯބެ ހިމަނަން ފުރަތަމަ ދުވަހުން ފެށިގެން މަަސައްކަތް ކުރަމުން ދިޔަ ކަމަށެވެ. ނަމަވެސް ސޯބެ ހިމަނާފައިވަނީ މަޖިލީހުގައި އެންމެ މަދުން މަސައްކަތްކުރާ ސުލޫކު ކޮމިޓީ އާއި ޕެޓިޝަން ކޮމިޓީގައި ކަމަށް އެ ބޭފުޅުން ވިދާޅުވިއެވެ.
