ރައްޔިތުންގެ މަޖިލީހުގެ ކޮމިޓީތަކުން އިދިކޮޅު އެމްޑީޕީއަށް ޖާގަދީފައިވާނީ އޯގާތެރިކަމާއެކުގައި ކަމަށާއި ނަމަވެސް އެ ޕާޓީގެ މެންބަރުންނަކީ ކޮށްދޭ ހެޔޮ ކަންކަން ނުފެންނަ ބައެއް ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާ ތަމްސީލުކުރައްވާ މެންބަރު އަދި ޕީއެންސީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާޙް ވިދާޅުވެއްޖެއެވެ.
މެންބަރު ފަލާޙް މި މޭރުމުން ވިދާޅުވީ، ރައްޔިތުންގެ މަޖިލިހުގެ ހިތަދޫ އުތުރު ދާއިރާ ތަމްސީލުކުރައްވާ އެމްޑީޕީގެ މެންބަރު ޢަބްދުﷲ ސޯދިގު (ސޯބެ) އަށް މަޖިލީހުގެ ރަނގަޅު ކޮމިޓީއަކުން ޖާގަ ދީފައިނުވާ ކަމަށް ވިދާޅުވެ، އެމްޑީޕީގެ ޕާލަމަންޓްރީ ގްރޫޕްގެ ބައެއް މެންބަރުން މަޖިލިހުގެ ތަޅުމުގައި އިއްޔެ ހަމަނުޖެހުން ހިންގުމާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައެވެ.
މީސް މީޑިއާގައި ހިއްސާކުރެއްވި ޕޯސްޓުގައި ފަލާޙު ވިދާޅުވީ، މިހާރު ވެސް ރައްޔިތުންގެ މަޖިލީހުގައި ޕާޓީތަކަށް ލިބިފައިވާ ގޮނޑީގެ އަދަދަށް ބަލާއިރު މަޖިލީހުގެ ގަވައިދުގައި ކޮމިޓީތަކުން އެމްޑީޕީއަށް ލިބޭ މިންވަރަށް ވުރެ އޯގާތެރިކޮށް ހުރިހާ ކަމެއް ކޮށްދީފައިވާނެ ކަމަށާއި ނަމަވެސް، އެމްޑީޕީއަކީ ކޮށްދޭ ހެޔޮ ކަންކަން ނުފެންނަ ބައެއް ކަމަށެވެ.
މިހާރުވެސް މަޖިލީހުގައި ޕާޓީތަކަށް ލިބިފައިވާ ގޮނޑީގެ އަދަދަށް ބަލާއިރު މަޖިލިސްޤަވައިދުގައި ކޮމިޓީތަކުން އެމްޑީޕީއަށް ލިބޭމިންވަރަށްވުރެ އޯގާތެރިކޮށް ހުރިހާކަމެއް ކޮށްދީފައިވާނެ.
ނަމަވެސް އެމްޑީޕީއަކީ ކޮށްދޭ ހެޔޮކަންނުފެންނަބައެއް. ގަދަބާރުންކަންކަން ކުރަންނޫޅި ޤާނޫނާއި… pic.twitter.com/ilXIYgnX5S
— Ibrahim Falah (@IbrahimFalahR) June 24, 2026
ފަލާޙު ވިދާޅުވީ، ގަދަ ބާރުން ކަންކަން ކުރަން ނޫޅެ ގާނޫނާއި ގަވާއިދުގެ ތެރޭގައި އުޅެން އެމްޑީޕީ ދަސް ކުރަންޖެހޭ ކަމަށެވެ. އެމްޑީޕީން ދައްކަމުން އަންނަ ވާހަކަތަކަށް ކުރު ގޮތަކަށް ރައްދު ދެއްވަމުން ފަލާޙު އިތުރަށް ވިދާޅުވީ ބޮޑު ބަދަލު އޮފީސް ގާއިމުވި ފަހުން އަދި ހެޔޮ ބަދަލެއް ނުފެންނަ ކަމަށެވެ.
ސޯބެއަށް މަޖިލީހުގެ ރަނގަޅު ކޮމިޓީއަކުން ޖާގަ ނުދޭ ކަމަށް ވިދާޅުވެ، އެމްޑީޕީގެ ޕާލަމެންޓްރީ ގްރޫޕްގެ ބައެއް މެންބަރުން މަޖިލީހުގެ އިއްޔެގެ ޖަލްސާގައި ހަމަނުޖެހުން ހިންގުމާ ގުޅިގެން އެ ހުރިހާ މެންބަރުންގެ ނަން އިއްވުމަށްފަހު ތަޅުމުން ބޭރަށް ނެރުނެވެ. އަދި އެއަށްފަހު މީޑިއާތަކަށް އެ ބޭފުޅުން ދެއްވި އިންޓަވިއުއެއްގައި ވިދާޅުވީ، މަޖިލީހުގެ ކޮމިޓީއެއްގައި ސޯބެ ހިމަނަން ފުރަތަމަ ދުވަހުން ފެށިގެން މަަސައްކަތް ކުރަމުން ދިޔަ ކަމަށެވެ. ނަމަވެސް ސޯބެ ހިމަނާފައިވަނީ މަޖިލީހުގައި އެންމެ މަދުން މަސައްކަތްކުރާ ސުލޫކު ކޮމިޓީ އާއި ޕެޓިޝަން ކޮމިޓީގައި ކަމަށް އެ ބޭފުޅުން ވިދާޅުވިއެވެ.
