ވެނެޒުއޭލާގެ ވެރިރަށް ކަރަކަސް ހިމެނޭހެން އެ ގައުމުގެ އެކި ސަރަހައްދުތަކަށް ބާރުގަދަ ދެ ބިންހެލުމެއް އައިސް، ބޮޑެތި ގެއްލުންތަކެއް ލިބިއްޖެއެވެ. މި ހާދިސާގައި 10,000 އާއި 100,000 އާ ދެމެދުގެ އަދަދަކަށް މީހުން މަރުވެފައިވުން އެކަށީގެންވާ ކަމަށް އެމެރިކާގެ ޖިއޮލޮޖިކަލް ސާވޭ (ޔޫ.އެސް.ޖީ.އެސް) އިން ވަނީ ލަފާކޮށްފައެވެ.
ޔޫ.އެސް.ޖީ.އެސް އިން ހާމަކުރި ގޮތުގައި، ބުދަ ދުވަހުގެ ރޭ ރާއްޖެ ގަޑިން ދަންވަރުގެ ވަގުތެއްގައި ފުރަތަމަ އައީ 7.2 ގެ ބާރުމިނުގެ ބިންހެލުމެކެވެ. މީގެ ކުޑަވަގުތުކޮޅެއް ފަހުން 7.5 ގެ ބާރުމިނުގައި ދެވަނަ ބިންހެލުން އައިސްފައިވަނީ ވެރިރަށް ކަރަކަސްއާ ގާތްގަނޑަކަށް 293 ކިލޯމީޓަރު ދުރުގައި އޮންނަ ޔުމާރޭ ސަރަހައްދަށެވެ.
މި ކާރިސާއާ ގުޅިގެން ވެނެޒުއޭލާގެ އެކްޓިންގް ޕްރެޒިޑެންޓް ޑެލްސީ ރޮޑްރިގޭޒް ވަނީ ގައުމުގައި ކުއްލި ނުރައްކަލުގެ ހާލަތު އިއުލާނު ކުރައްވާފައެވެ. ގައުމާ މުޚާތަބު ކުރައްވަމުން ރޮޑްރިގޭޒް ވިދާޅުވީ، ގެއްލުންތައް ވަޒަންކުރުމުގެ މަސައްކަތް ދައުލަތުގެ އިދާރާތަކުން ކުރަމުންދާ ކަމަށެވެ. ނަމަވެސް، މަރުވި މީހުންނާއި އަނިޔާވި މީހުންގެ ސީދާ އަދަދެއް އަދި ހާމަކުރައްވާފައެއް ނުވެއެވެ.
ވެނެޒުއޭލާގެ އިންޓީރިއާ މިނިސްޓަރު ދިއޮސްޑާޑޯ ކަބެލޯ ވިދާޅުވީ، ކަރަކަސްގެ އަލްޓަމީރާ އަވަށުގެ ހާލަތު ވަރަށް ނުރައްކާތެރި ކަމަށާއި، ގިނަ އަދަދެއްގެ އިމާރާތްތަކާއި ގެދޮރު ބިމާހަމަވެފައިވާ ކަމަށެވެ. އަދި ސަލާމަތީ ހިދުމަތްތަކާއި، ސިވިލް އެސިސްޓެންސް އަދި ފަޔަރު ބްރިގޭޑުން މީހުން ސަލާމަތްކުރުމުގެ މަސައްކަތް ހުއްޓުމެއް ނެތި ކުރަމުންދާ ކަމަށް އޭނާ ވިދާޅުވިއެވެ.
މި ބިންހެލުން އައިސްފައިވަނީ ވެނެޒުއޭލާގެ މިނިވަންކަމުގެ ހަނގުރާމައިގެ މުހިންމު ކާމިޔާބީއެއް ފާހަގަކުރުމަށް ގައުމީ ބަންދު ދުވަހެއްގެ ގޮތުގައި އޮތް ބުދަ ދުވަހު ކަމަށްވުމުން، ގިނަ ބަޔަކު ތިބީ ގޭގައެވެ. ބިންހެލުން ތަޖުރިބާކުރި މީހުން ބުނި ގޮތުގައި، އެއް މިނެޓަށްވުރެ ކުރު ވަގުތުކޮޅެއްގެ ތެރޭގައި ދެ ބިންހެލުން އައުމުން ބޮޑު ސިހުމެއް ލިބުނެވެ. އިމާރާތްތަކުގެ ފުރާޅުން ތަކެތި ފޭބުމާއި، ފާރުތައް ރެނދުލައި، މުޅި ސަރަހައްދު ގުޑަމުން ދިޔަ ކަމަށް މަންޒަރު ދުށް މީހުން ކިޔައިދީފައިވެއެވެ.
މި ހާދިސާގައި ކަރަކަސްގެ މައި ވައިގެ ބަނދަރު، ސައިމަން ބޮލިވާ އިންޓަނޭޝަނަލް އެއާޕޯޓަށް ބޮޑެތި ގެއްލުންތަކެއް ލިބި މިހާރު ވަނީ ބަންދުކޮށްފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، އެއާޕޯޓުގެ ފުރާޅުން ބައިތައް ވެއްޓެމުން ދިޔައިރު މީހުން ދިޔައީ ރައްކާތެރިކަން ހޯދުމަށް ދުވަމުންނެވެ.
ސައިންސްވެރިން ހާމަކުރާ ގޮތުގައި ވެނެޒުއޭލާއަށް މިހާ ބޮޑު ގެއްލުމެއް ލިބުނީ އެ ގައުމު އޮންނަ ސަރަހައްދުގެ ބިމުގެ އަޑީގެ ފަށަލަތައް (ޓެކްޓޯނިކް ޕްލޭޓްސް) ގުޅޭ ހިސާބެއްގައި ކަމަށްވާތީއެވެ. އަދި ވެރިރަށް ކަރަކަސް އޮންނަ ގޮތުން ބިންހެލުމުގެ ލޮޅުންތައް އިތުރަށް ބާރުގަދަވެގެންދާ ކަމަށް ކަމާބެހޭ މާހިރުން ފާހަގަކުރެއެވެ.
