މަސްވެރިކަމުގެ ސިނާއަތުގައި މަސައްކަތް ކުރާނެ ދިވެހިން ހޯދަން އުނދަގޫ ކަމަށް ފިޝަރީޒް މިނިސްޓަރު އަޙުމަދު ޝިޔާމް މިއަދު ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ކުރަމުން އަންނަ މަސައްކަތްތަކާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ޕްރައިމަރީ އިންޑަސްޓްރީގެ ވަޒީފާތަކަށް ދިވެހިން ހޯދުމުގައި ގޮންޖެހުންތައް ކުރިމަތިވެފައިވާ ކަމަށާއި އޭގެ ތެރޭގައި މަސްވެރިކަމުގެ ދާއިރާ ހިމެނޭ ކަމަށެވެ.
”ޕްރައިމަރީ އިންޑަސްޓްރީގެ ވަޒީފާތަކަށް ދިވެހިން ހޯދުމުގައި ގޮންޖެހުންތަކެއް އެބަހުރި. ވަކިން ހާއްސަކޮށް މަސްވެރިކަން. މަސްވެރިކަމަކީ ވަރަށް ޔުނީކް މަސައްކަތެއް. އަދި އަޅުގަނޑުމެން މި ކުރާ ހޭންޑް ލައިން އަދި ޕޯލް ލައިން މަސްވެރިކަމަކީ ދުނިޔޭގެ އެހެން ގައުމުތަކުގައި ނުކުރާ މަސްވެރިކަމެކޭ ބުންޏަސް ކުށަކަށް ނުވާނެ. ކުރޭ އެކަމަކު ނިސްބަތުން ވަރަށް މަދު،“ – ޝިޔާމް ވިދާޅުވިއެވެ.
ކަން މިހެން އޮތުމާއެކު މަސްވެރިކަމުގެ ސިނާއަތަށް ދިވެހި ޒުވާނުން ނެރުމަށް މަސައްކަތްތަކެއް ކުރަމުން އަންނަކަން މިނިސްޓަރު ފާހަގަކުރެއްވިއެވެ. މި ސިނާއަތަށް ޒުވާނުން ނެރުމަށް ސަރުކާރުން ކުރަމުން އަންނަ މަސައްކަތުގެ ތެރެއިން ފަސް ޒުވާނަކު ރާއްޖޭގައި އެންމެ ރަނގަޅަށް މަސްވެރިކަންކުރާ ފަސް ދޯންޏަކަށް އަރުވައިގެން ޒުވާނުންނަށް ހާއްސަ ޕްރޮގްރާމެއް ކުރިއަށް ގެންގޮސްފައިވާ ކަމަށް މިނިސްޓަރު ވަނީ ވިދާޅުވެފައެވެ.
އެ ފަސް ޒުވާނުން މަސްވެރިކަމުގައި މިހާރު ދެމިތިބި ކަމަށާއި މި އަހަރުގެ ތެރޭގައި އިތުރު ޒުވާނުންނަށް އެ ޕްރޮގްރާމް ހިންގަން ރާވާފައިވާ ކަމަށް ވެސް މިނިސްޓަރު ވިދާޅުވިއެވެ.
މަސްވެރިކަމުގެ ސިނާޢަތެއް މި ޤައުމުގަ އެބައޮތްތަ؟ ހުރިހާ މަސްވެރިންނަށް ބޭކާރު ސިޔާސީ ވަޒީފާތައްދީގެން މަސްވެރިކަމުގެ ސިނާއަތު ކަލޭމެން އިނދަޖައްސާލައިފި. ގިނަ މަސްވެރިއުޅަނދުތައް ނެތިގެން ހިގައްޖެ ސިޔާޔާޔާޔާމޫމޫމޫ. ދެން ރަނގަޅުވާނީ ތިޔަ މިނިސްޓްރީވެސް އުވާލީމަ.