އެމެރިކާގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް ހިންގަވާ އަސްކަރީ ޙަރަކާތްތައް ހުއްޓުވުމަށްޓަކައި، އެމެރިކާގެ ޤާނޫނުހަދާ މަޖިލީހުގެ މަތީގެ، ސެނެޓުން ތާރީޚީ ”ވާރ ޕަވަރސް ރިޒޮލިއުޝަން“ ބިލެއް ފާސްކޮށް، ޓްރަމްޕްގެ ސަރުކާރަށް ބޮޑު ސިހުމެއް ދީފިއެވެ.
ސެނެޓުގައި ނެގުނު ކުއްލި ވޯޓުގައި މި ބިލް ފާސްވީ 50 ވޯޓު 48 ވޯޓުންނެވެ. މި ބިލް ފާސްކުރުމުގައި ޓްރަމްޕްގެ އަމިއްލަ ރިޕަބްލިކަން ޕާޓީގެ 4 ސެނެޓަރަކު ވަނީ ޕާޓީގެ ލައިނާ ޚިލާފަށް ޑިމޮކްރެޓުންނާ ބައިވެރިވެ ވޯޓު ދީފައެވެ. މިއީ އެމެރިކާގެ ތާރީޚުގައިވެސް ހިނގަމުންދާ ހަނގުރާމައެއްގެ ތެރޭގައި ރައީސްގެ ބާރުތައް ހުއްޓުވަން ކޮންގްރެސްގެ ދެ މަޖިލީހުންވެސް ބިލެއް ފާސްކުރި ފުރަތަމަ ފަހަރެވެ.
ޓްރަމްޕްގެ ރައްދު – ”އަހަރެންގެ ބާރުތަކަށް ހުދޫދެއް ނެތް“
މި ނިންމުމާ ގުޅިގެން ރައީސް ޓްރަމްޕް ވަނީ ކޮންގްރެސްއަށް ވަރަށް ހަރުކަށި އިންޒާރެއް ދީފައެވެ. ސެނެޓުގެ ވޯޓަކީ އެއްވެސް އަގެއް ހުރި އެއްޗެއް ނޫން ކަމަށް ސިފަކޮށް، ޓްރަމްޕް ބުނ އަސްކަރީ ކަންކަމުގައި ރައީސްގެ ޙައިޘިއްޔަތުން އޭނާއަށް ލިބިގެންވާ ބާރުތަކަށް އެއްވެސް ހުރަހެއް ނޭޅޭނެ ކަމަށެވެ. އަދި މި ބިލް ވަގުތުން ވީޓޯ (ބާޠިލް) ކުރާނެކަމަށް ޓްރަމްޕް ބުންޏެވެ. ކޮންގްރެސްގައި ޓްރަމްޕްގެ ވީޓޯ ބަޠިލްކުރަން ބޭނުންވާ ތިނެސްކަން ބައިގެ އަޣްލަބިއްޔަތު ނެތުމުން، މި ބިލް ވެގެންދާނީ ހަމައެކަނި ސިޔާސީ ގޮތުން ދެއްކި ނަމޫނާއަކަށެވެ.
