ސިޔާސީ ހިޔާލު ތަފާތުވުމެއްގެ ސަބަބުން ތައުލީމީ ދާއިރާގެ އެއްވެސް މުވައްޒަފަކަށް ފިޔަވަޅު އަޅާފައިނުވާނެ ކަމަށް އެޑިޔުކޭޝަން މިނިސްޓަރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
މިނިސްޓަރު ޝަފީޢު މި މޭރުމުން ވިދާޅުވީ، ސިޔާސީ ހިޔާލު ތަފާތުވުމެއްގެ ސަބަބުން އެ ދާއިރާގެ މުވައްޒަފުންނަށް ކުރީ ސަރުކާރުން ފިޔަވަޅުތަކެއް އަޅާފައިވާ ކަމަށް ވިދާޅުވެ، ރައްޔިތުންގެ މަޖިލީހުގެ ޖަލްސާގައި ބާރަށު ދާއިރާގެ މެންބަރު އިބްރާހިމް ޝުޖާއު ކުރެއްވި ސުވާލަަކަށް ޖަވާބު ދެއްވަމުންނެވެ.
ޝުޖާއުގެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، ސިޔާސީ ހިޔާލު ތަފާތުވުމެއްގެ ސަބަބުން އެއްވެސް ޓީޗަރަކަށް، އަދި އެއްވެސް ޕްރިންސިޕަލަކާ މެދު ވެސް މިހާތަނަށް ފިޔަވަޅު އަޅާފައިނުވާނެ ކަމަށެވެ.
ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތް އިރު، 23 ޕްރިންސިޕަލަކު ތިބީ އެ މީހުން ތިބެންޖެހޭ ރަށްރަށް ނޫން އެހެން ރަށްރަށަށް ބަދަލުކޮށްފައި ކަމަށާއި މިހާރު އެ ހުރިހާ ކަމެއް ރަނގަޅުކޮށް އެ މުވައްޒަފަކު ހުންނަންޖެހޭ ރަށެއްގައި އެ މުވައްޒަފަކު ބަހައްޓާފައިވާ ކަމަށް މިނިސްޓަރު ވިދާާޅުވިއެވެ.
މިނިސްޓަރު އިތުރަށް ވިދާޅުވީ، ނިމިދިޔަ އެމްޑީޕީ ސަރުކާރުގައި، ވަކި ސިޔާސީ ފިކުރަކަށް ތާއީދުކުރުމުގެ ސަބަބުން ފިޔަވަޅު އަޅާފައިވާ ކަމަށް ޓީޗަރުންގެ ފަރާތުން 200 އަށްވުރެ ގިނަ ޝަކުވާ ވެސް ލިބިފައިވާ ކަމަށެވެ.
