ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ދަށުން ހިންގަމުން އަންނަ ބޭސްފިހާރަތައް ދައުލަތުގެ ބޭސް ކުންފުނި، ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަން ލިމިޓެޑް (ސްޓޭޓް ފާމާ) ގެ ދަށަށް ބަދަލުކުރުމަށް ހަމަޖެހިފައިވާތީ ތިން ދުވަހުގެ މުއްދަތަކަށް ބޭސްފިހާރަތައް ބަންދުކުރުމަށް ނިންމައިފިއެވެ.
މިކަމާ ގުޅިގެން އެސްޓީއޯއިން ބުނެފައިވަނީ، އެ ކުންފުނީގެ ދަށުން ހިންގަމުން އައި ބޭސްފިހާރަތައް ސްޓޭޓް ފާމާގެ ދަށަށް ބަދަލުކުރަން މި މަހުގެ 24, 25 އަދި 26 ވަނަ ދުވަހު އެ ފާމަސީތަކުގައި ހުރި އިންވެންޓްރީ ކައުންޓް ކުރިއަށްގެންދަން ފާމަސީތައް ބަންދުވާނެ ކަމަށެވެ. ނަމަވެސް އިމަޖަންސީ ހާލަތުގައި ބޭސް ލިބޭނެ އިންތިޒާމު ހަމަޖައްސާފައިވާ ކަމަށް އެ ކުންފުނިން ވަނީ ބުނެފައެވެ.
އެސްޓީއޯގެ ބޭސްފިހާރަތައް ސްޓޭޓް ފާމާގެ ދަށަށް ބަދަލުކޮށް ނިމުމުން ބޭސްފިހާރަތަކުގެ ހިދުމަތްދީ، ބަލި މީހުންނަށް ބޭނުންވާ ބޭސް އެތެރެކޮށް ފޯރުކޮށްދިނުމުގެ ހިދުމަތް ދޭނީ ސްޓޭޓް ފާމާއިންނެވެ.
މި ބަދަލާއެކު އެސްޓީއޯގެ 193 ފާމަސީއާއި، އައިޖީއެމްއެޗްގައި އަލަށް ހުޅުވި ފާމަސީ ހިމެނޭހެން ޖުމުލަ 194 ފާމަސީއެއްގެ ހިންގުމާ ސްޓޭޓް ފާމާއިން ހަވާލުވުމަށް ވަނީ ނިންމައިފައެވެ. މި ބަދަލާ ގުޅިގެން ފާމަސީތަކަށް ބޭނުންވާ ސަޕްލައިތަކާއި، އިލެކްޓްރޯނިކް ސިސްޓަމްތައް އިންސްޓޯލްކުރުމުގެ މަސައްކަތް ހަލުވި ދުވެލީގައި ކުރިއަށްދާ އެ ކުންފުނިން ވަނީ ހާމަކޮށްފައެވެ.
ސްޓޭޓް ފާމާއަކީ ރާއްޖެއަށް ބޭނުންވާ ބޭސް ލިބުމުގައި ހުންނަ ދަތިތައް ހައްލުކުރުމަށް ސަރުކާރުން އުފެއްދި ކުންފުންޏަކުންނެވެ. މި ކުންފުނިން އެންމެ ބޮޑު އިސްކަމެއް ދެނީ ބޭހުގެ ސްޓޮކް ހުރި މިންވަރު ދުރާލާ އެނގޭނެ ފަދަ ހަރުދަނާ ނިޒާމެއް ގާއިމުކުރުމަށެވެ.
