ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ މެންބަރު ކަމަށް، ބޭންކިންގ ދާއިރާގައި ތަޖުރިބާކާރު ބޭފުޅެއް ކަމަށްވާ ގއ. ދާންދޫ، އަމާޒް، ޒައިނާ ޢަބްދުﷲ އައްޔަނުކުރައްވައިފިއެވެ.
ޒައިނާ އަކީ ބޭންކިންގ އަދި ފައިނޭންސްގެ ދާއިރާގައި 10 އަހަރަށްވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. ޕީސީބީގެ މެންބަރުކަމަށް އައްޔަނުކުރެއްވުމުގެ ކުރިން އޭނާ ހުންނެވީ މޯލްޑިވްސް އިސްލާމިކް ބޭންކް (އެމްއައިބީ) ގެ ހެޑް އޮފް ކޯޕަރޭޓް ޕްރޮސެސިންގްގެ މަގާމުގައެވެ. އެ މަގާމުގައި އޭނާ ވަނީ ބޭންކުގެ ކޯޕަރޭޓް ފައިނޭންސިންގ އޮޕަރޭޝަންތަކާއި، ކްރެޑިޓް އިވެލުއޭޝަން އަދި ކުދި އަދި މެދުފަންތީގެ ވިޔަފާރިތަކަށް ދޫކުރެވޭ ފައިނޭންސިންގއާ ގުޅޭ މުހިންމު މަސައްކަތްތައް އިސްކޮށް ބަލަހައްޓަވައިފައެވެ.
މީގެ އިތުރުން ޕީސީބީގެ ސީނިއަރ އޮފިސަރެއްގެ މަގާމު ވެސް ޒައިނާ ވަނީ މީގެ ކުރިން ފުރުއްވައިފައެވެ.
ތަޢުލީމީ ދާއިރާއިން ޒައިނާ ހޯދާފައިވާ ކާމިޔާބީތަކަށް ބަލައިލާއިރު، އޭނާ ވަނީ މެލޭޝިއާގެ އިންޓަރނޭޝަނަލް ސެންޓަރ ފޯ އެޑިއުކޭޝަން އިން އިސްލާމިކް ފައިނޭންސް އިން މާސްޓަރ އޮފް އިސްލާމިކް ފައިނޭންސް ޕްރެކްޓިސް ހާސިލުކުރައްވައިފައެވެ. މީގެ އިތުރުން އިންޑިއާގެ ޔުނިވަރސިޓީ އޮފް ޕޫނޭ އިން ބެޗްލަރ އޮފް ކޮމާސް ވެސް ހާސިލުކުރައްވާފައިވާކަން ފާހަގަކޮށްލަންޖެހެއެވެ.
