މޯލްޑިވްސް އިސްލާމިކް ބޭންކް (އެމްއައިބީ) ގެ ރުފިޔާ ކާޑުތަކަށް ކަނޑައަޅާފައިވާ 250 ޑޮލަރުގެ ލިމިޓުގެ ދަށުން އީ-ކޮމާސް ވެބްސައިޓުތަކުން ކުރެވޭ މުއާމަލާތްތައް އެ ބޭންކުން ރޭ ލިމިޓްކޮށްފިއެވެ.
މިކަމާ ގުޅިގެން އެ ބޭންކުން ނެރުނު ނޯޓިސްއެއްގައި ބުނެފައިވަނީ، ކޮންމެ ކަސްޓަމަރަކަށް ވެސް މަހެއްގެ މައްޗަށް އީ-ކޮމާސް ވެބްސައިޓްތައް މެދުވެރިކޮށް ދެން ކުރެވޭނީ އެންމެ ގިނަވެގެން 10 މުއާމަލާތް ކަމަށެވެ. މި ބަދަލު ގެނައުމަށް ނިންމި ސަބަބެއް ކަމަށް އެމްއައިބީން ބުނެފައިވަނީ، ރުފިޔާ ކާޑުތަކަށް ދީފައިވާ ޑޮލަރު ލިމިޓަކީ ޒަރޫރީ ބޭނުންތަކަށް ހާއްސަކޮށްފައިވާ ފުރުސަތެއް ނަމަވެސް ބައެއް ކަސްޓަމަރުން މި ލިމިޓް އެ ނޫން ކަންކަމުގައި ބޭނުންކުރަމުންދާތީ ކަމަށެވެ.
މި ބަދަލާއެކު ވެސް އާންމު ސަބްސްކްރިޕްޝަން ސައިޓުތަކަށާއި، ރާއްޖެއިން ބޭރުގެ ޕީއޯއެސް މެޝިންތަކުން ކުރާ ވިޔަފާރިތަކަށް މި ލިމިޓް ބޭނުންކުރެވޭނެ ކަމަށާއި ހަމައެހެންމެ، ސިއްހީ ހިދުމަތްތަކާއި ފަތުރުވެރިކަމާ ގުޅުންހުރި ހަރަދުތަކަށް ވެސް 250 ޑޮލަރުގެ ލިމިޓްގެ ތެރެއިން މުއާމަލާތް ކުރެވޭނެ ކަމަށް އެމްއައިބީން ވަނީ ބުނެފައެވެ.
މި ނިންމުމަކީ ޑޮލަރުގެ ލިމިޓް ވީހާވެސް ގިނަ ކަސްޓަމަރުންގެ ޒަރޫރީ ބޭނުންތަކަށް ފޯރުކޮށްދިނުމަށާއި، ދެމެހެއްޓެނިވި ގޮތެއްގައި މި ހިދުމަތް ކުރިއަށް ގެންދިއުމަށްޓަކައި އެޅި ފިޔަވަޅެއް ކަމަށް އެ ބޭންކުން ބުނެއެވެ.
ފާހަގަކޮށްލަންޖެހޭ ގޮތުގައި، އެމްއައިބީގެ ރުފިޔާ ކާޑުތަކުން ބޭރުގެ މުއާމަލާތްތަކަށް 250 ޑޮލަރުގެ ލިމިޓެއް ދޫކުރަނީ، އެ ބޭންކަށް ގަވާއިދުން މުސާރަ ޖަމާކުރާ ކަސްޓަމަރުންނަށް އެކަންޏެވެ. ރާއްޖެއަށް ކުރިމަތިވެފައިވާ ޑޮލަރު ދަތިކަމާ ގުޅިގެން، ރާއްޖޭގެ އެހެން ބޭންކުތަކުން ވެސް ވަނީ ރުފިޔާ ކާޑުތަކުން ކުރެވޭ ޑޮލަރުގެ މުއާމަލާތްތަކަށް ހަރުކަށި އުސޫލުތަކެއް ކަނޑައަޅާފައެވެ.
