މާލޭ ސަރަހައްދުގެ ހަތަރު މައިދާނެއްގެ އިތުރުން 22 މިސްކިތެއްގައި ފިތުރު އީދު ނަމާދު ކުރާ ގޮތަށް ހަމަޖައްސާފައިވާ ކަމަށް އިސްލާމިކް މިނިސްޓްރީން ބުނެފިއެވެ.
ކޮންމެ އަހަރެއްގައި ވެސް އީދު ނަމާދު މިސްކިތްތަކުގެ އިތުރުން ހުސް މައިދާންތަކުގައި އަންނަނީ ކުރަމުންނެވެ. އެގޮތުން މި އަހަރު މާލެ ސަރަހައްދުގެ 22 މިސްކިތްތަކާ އަދި ހަތަރު މައިދާނެއްގައި ބޮޑު ޖަމާއަތުގައި ފިތުރު އީދު ނަމާދު ކުރާނެ ކަމަށް އިސްލާމިކް މިނިސްޓްރީން ބުނެއެވެ.
އިސްލާމިކް މިނިސްޓްރީން ބުނެފައި ވަނީ މާލޭ ސިޓީގެ 16 މިސްކިތެއްގަ އާއި ވިލިމާލޭގެ އެއް މިސްކިތުގައި އީދު ނަމާދު ކުރާ ގޮތަށް ހަަމަޖެހިފައިވާ ކަމަށެވެ. އޭގެ އިތުރުން ހުޅުމާލެ ފުރަތަމަ ފިޔަވަހީގެ ތިން މިސްކިތުގަ އަދި ދެވަނަ ފިޔަވަހީގެ ދެ މިސްކިތުގައި އީދު ނަމާދު ކުރުމަށް ނިންމާފައިވާ ކަމަށް ވެސް އެ މިނިސްޓްރީން ބުނެއެވެ.
މާލެ ސަރަހައްދުގައި ބޮޑު ޖަމާއަތުގައި ފިތުރު އީދު ނަމާދު ކުރާނެ ތަންތަން:
- މާފަންނު ސްޓޭޑިއަމް
- ވިލިމާލެ ފުޓްބޯޅަ ދަނޑު
- ހުޅުމާލެ ސިންތެޓިކް ޓްރެކް ދަނޑު
- ހުޅުމާލެ ދެވަނަ ފިޔަވަހި ކްރިކެޓް ދަނޑު
އިސްލާމިކް މިނިސްޓްރީން ބުނި ގޮތުގައި މޫސުން ގޯސްވުމުގެ ސަބަބުން މައިދާންތަކުގައި ކުރަން ހަމަޖެހިފައިވާ ބޮޑު ޖަމާއަތް ކެންސަލްކުރަން ޖެހިއްޖެނަމަ މާލޭގެ ހުކުރު ކުރާ ހުރިހާ މިސްކިތެއްގައި އީދު ނަމާދު ކުރާނެ ކަމުގައެވެ.
ރާއްޖޭގައި އާންމުކޮށް ދެ އީދު ނަމާދު ކުރަމުން އައިސްފައި ވަނީ ހެނދުނު 07:30 ގައި ނަމަވެސް މިފަހުން ސަރުކާރުން ވަނީ އެ ގަޑިއަށް ބަދަލު ގެނެސްފައެވެ. އަލަށް ގެނައި ބަދަލާ އެކު މި އަހަރުގެ ފިތުރު އީދު ނަމާދު ކުރަން ފަށާނީ ހެނދުނު 07:00 ގައި ކަމަށް އިސްލާމިކް މިނިސްޓްރީން ވަނީ ބުނެފައެވެ.
