ފަލަސްޠީނުގެ ޣައްޒާއާއި ހުޅަނގު އައްސޭރީގައި އިޒްރޭލުން ހިންގަމުންދާ އަނިޔާވެރި ޢަމަލުތަކާ ގުޅިގެން އދ. އިން އެކުލަވާލި ޚާއްޞަ ތަޙުޤީޤީ ކޮމިޝަނުން ނެރުނު ރިޕޯޓެއްގައި، އިޒްރޭލުން ފަލަސްޠީނުގެ ކުޑަކުދިންނަށް ގަސްދުގައި ޙަމަލާދީ މެރުމަކީ ހިނގަމުންދާ ނަސްލުހޭދުގެ (ޖެނޮސައިޑް) މައިގަނޑު އެއް ބައި ކަމަށް ކަނޑައަޅައިފިއެވެ.
އަންގާރަ ދުވަހު އާންމުކުރި މި ރިޕޯޓުން ހާމަވާގޮތުގައި، ކުޑަކުދިންނަކީ ހަމައެކަނި ހަނގުރާމައިގެ ތެރޭގައި އެކްސިޑެންޓުން މަރުވާ ބައެއް ނޫނެވެ. އޭގެ ބަދަލުގައި، އިޒްރޭލުގެ ސިފައިން ދަނީ ފަލަސްޠީނުގެ މުސްތަޤުބަލާއި ނަސްލު ނައްތާލުމުގެ ބޭނުމުގައި، ރާވައިގެން ކުޑަކުދިންނަށް އަމާޒުކޮށް ޙަމަލާތައް ދެމުންނެވެ.
ކުޑަކުދިންނާއި މާބަނޑު މީހުންނަށް އަމާޒުކުރުން
ރިޕޯޓުގައި ފާހަގަކޮށްފައިވާ ގޮތުގައި، 2023 ވަނަ އަހަރު ހަނގުރާމަ ފެށުނީއްސުރެ ޣައްޒާގައި ޝަހީދުކޮށްލާފައިވާ މީހުންގެ ގާތްގަނޑަކަށް 30 އިންސައްތައަކީ ކުޑަކުދިންނެވެ. މީގެ އިތުރުން، އިޒްރޭލުން ވަނީ މާބަނޑު މީހުންނަށް ފަރުވާދޭ މަރުކަޒުތަކަށާއި، އަލަށް އުފަންވާ ކުދިންނަށް ފަރުވާދޭ ހޮސްޕިޓަލްތަކަށް ގަސްދުގައި ބޮންއަޅާފައެވެ. މީގެ ސަބަބުން ބަނޑަށް ދަރިން މަރުވުމާއި، އައިބު ހުންނަ ކުދިން އުފަންވުން ވަނީ އިންތިހާއަށް އިތުރުވެފައެވެ. އަދި އިންސާނީ އެހީތެރިކަން ވަނުން މަނާކުރުމުގެ ސަބަބުން، ބަނޑުހައިހޫނުކަމާއި ބަލިމަޑުކަމުގައި އެތައް ކުދިންނެއް ދަނީ މަރުވަމުންނެވެ.
ކޮމިޝަންގެ ޗެއަރ ސްރީނިވާސަން މުރަލިދަރް ބުނީ، އިޒްރޭލުގެ ސަލާމަތީ ބާރުތަކުން ގަސްދުގައި ކުޑަކުދިންނަށް ޙަމަލާދީ މަރަމުންދާކަމުގެ ސާފު ހެކިތައް ފެންނަން ހުރި ކަމަށެވެ. އަދި 2025 ވަނަ އަހަރުގެ އޮކްޓޯބަރު މަހު ގެނައި ”ހަނގުރާމަ ހުއްޓާލުމުގެ“ އެއްބަސްވުމަށްފަހުވެސް، އެވްރެޖްކޮށް ކޮންމެ ދުވަހަކު ފަލަސްޠީނުގެ ކުޑަކުއްޖަކު މަރަމުންދާކަން ޔުނިސެފްގެ ތަފާސްހިސާބުތަކުން ދައްކައެވެ.
ޖަލުތަކުގައި ދޭ އަނިޔާތައް
މި ރިޕޯޓުގައި ހަމައެކަނި ޣައްޒާގެ ވާހަކައެއް ނޫނެވެ. ވެސްޓު ބޭންކުގައި ކުޑަކުދިންގެ ޔަތީމުޚާނާތަކާއި ސްކޫލްތައް އިޒްރޭލުން ސުންނާފަތި ކުރަމުންދާކަން ވަނީ ފާހަގަކޮށްފައެވެ. އަދި އިޒްރޭލުގެ ޖަލުތަކުގައި ބަންދުކޮށްފައި ތިބޭ ފަލަސްޠީނުގެ ކުޑަކުދިންނަށް، ޖިންސީ ގޯނާ ހިމެނޭހެން، ވަރަށް އަނިޔާވެރިކޮށް ލާއިންސާނީ އަނިޔާދެމުންދާކަމަށް އދ. ގެ ރިޕޯޓުން ވަނީ ކަށަވަރުކޮށްދީފައެވެ. މީގެ ތެރެއިން ގިނަ ކުދިން ޖަލުގައި ބަންދުކޮށްފައި ތިބެނީ އެއްވެސް ކުށެއްގެ ތުހުމަތެއް، އަދި ޝަރީޢަތެއްވެސް ނެތިއެވެ.
