2028 ވަނަ އަހަރުގެ ރިޔާސީ އިންތިހާބުގައި ޕީއެންސީގެ ފަރާތުން ވާދަކުރައްވާނެ ރިޔާސީ ކެންޑިޑޭޓަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށާއި، ޕާޓީގެ މެންބަރުންގެ ތާއީދު އެކަމުގައި އޮތް ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މީސް މީޑިއާގައި ހިއްސާކުރެއްވި ޕޯސްޓެއްގައި މިނިސްޓަރު ސަޢީދު ވިދާޅުވީ، ޕީއެންސީގެ ލީޑަރޝިޕާއި، ޕީޖީ އަދި މެންބަރުންގެ އޮތީ އެންމެ ވިސްނުމެއް ކަމަށެވެ. އެއީ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވެރިކަމުގައި އެމަނިކުފާނު ރައްޔިތުންނަށް ވެވަޑައިގެންނެވި ވަދުތައް ފުއްދެވުމާއި، އެމަނިކުފާނުގެ ފަހަތްޕުޅުގައި ދިވެހިރާއްޖެއަށް ތަރައްގީއާއި ހަމަޖެހުން ގެނައުމަށް ކުރައްވާ މަސައްކަތްޕުޅުގައި ބައިވެރިވެ، އަމާޒުތައް ހާސިލްކުރުމުގައި ހަވާލުކުރެެއްވި ކޮންމެ މަސައްކަތެއް ކާމިޔާބުކަމާއެކު ކޮށް ނަތީޖާ ނެރެދިނުން ކަމަށެވެ.
ޕީއެންސީގެ މެމްބަރުން، ލީޑަރޝިޕް، ޕީޖީ އަދި ޕާޓީގައި ހަރަކާތްތެރިވާ ހުރިހާބޭފުޅުންގެވެސް އޮތީ އެއް ވިސްނުމެއް.
ޕާޓީގެ ރައީސް އަދި ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ވެރިކަމުގައި އެމަނިކުފާނު ދިވެހިރައްޔިތުންނަށް ވެވަޑައިގެންނެވި ވަޢުދުތައް…— Mohamed Saeed (@em_saeed) June 22, 2026
ސަޢީދު ވިދާޅުވީ، ރައީސް މުޢިއްޒުގެ ލީޑަރޝިޕުގައި ޕާޓީ ބޮޑުވެ އިތުރަށް ވަރުގަދަވެ، މުހިންމު ކުރިއެރުންތަކެއް ހޯދާފައިވާ ކަމަށެވެ. އެގޮތުން ރާއްޖޭގެ އެންމެ މެންބަރުން ގިނަ ޕާޓީއަށް ޕީއެންސީ ވެފައިވާ ކަމަށާއި، ކުރު މުއްދަތެއްގެ ތެރޭގައި އެންމެ ގިނަ އިންތިހާބު ކާމިޔާބުކޮށް މަޖިލީހުގެ އެންމެ ބޮޑު ސުޕަމެޖޯރިޓީ ހޯދި ޕާޓީއަށް ޕީއެންސީ ވެފައިވާ ކަމަށް ވެސް ސަޢީދު ވިދާޅުވިއެވެ.
”އެންމެ ގިނަ ދަރަނި ދައްކައިދީ، އެންމެ ގިނަ ބިން ހިއްކައިދީ، އެއްފަހަރާ އެންމެ ގިނަ މަޝްރޫއު މުޅި ރާއްޖޭގައި ހިންގައިދޭ ޕާޓީއަށް ވެސް އެންމެ ދެ އަހަރާއި ހަ މަހުން ވެއްޖެ. ރައީސް ޑރ. މުޢިއްޒުގެ ގާބިލް ލީޑަރޝިޕް މިވަރުން ޔަގީން ކަށަވަރު،“ – ސަޢީދު ވިދާޅުވިއެވެ.
މިނިސްޓަރު ސަޢީދު އިތުރަށް ވިދާޅުވީ، ރާއްޖެއަށް މި ވަގުތު ވެސް އޮތް ސިޔާސީ އެންމެ ބޮޑު ގޮންޖެހުމަކީ ރަނގަޅު އިދިކޮޅު ޕާޓީއެއް ނެތުން ކަމަށެވެ. އެގޮތުން، އިދިކޮޅު ލީޑަރުންގެ ތެރޭގައި މިހާރު އުފެދިފައިވާ ޑިމޮކްރެޓްސް، އެމްޑީޕީ އަދި ޕީއެންއެފް ކޯލިޝަންގައި ވެރިއަކު ނުފެންނަ ކަމަށާއި އެ ކޯލިޝަނުން ފެންނަ މަންޒަރަކީ ނަފްރަތާއި ކެހިވެރިކަން ކަމަށް ސައީދު ވިދާޅުވިއެވެ.
