ފުވައްމުލައް ސިޓީގައި 12 ހެކްޓަރުގެ ޓޫރިޒަމް ޒޯނެއް ތަރައްގީކުރުމަށް ފުވައްމުލައް ސިޓީ ކައުންސިލާއި ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރުއޭސީއެލް) އާ ދެމެދު ފަހުމުނާމާއެއްގައި ސޮއިކޮށްފިއެވެ.
ޓޫރިޒަމް ޒޯން ތަރައްގީކުރުމުގެ ފަހުމުނާމާގައި ފުވައްމުލައް ސިޓީ ކައުންސިލުގެ ފަރާތުން ސޮއިކުރައްވާފައި ވަނީ އެ ސިޓީގެ މޭޔަރު އިސްމާއީލް ރަފީގެވެ. އާރުއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އަޙްމަދު މުބީނެވެ.
މި މަޝްރޫއު ކުރިއަށް ގެންދިއުމަށް ބިން ހަމަޖައްސާފައި ވަނީ ފުވައްމުލައް އެއަރޕޯޓާ އިންވެގެން އޮންނަ ހުސްބިން ”ބިޅިފޭށި“ ސަރަހައްދުންނެވެ. މަޝްރޫއާ ގުޅޭގޮތުން ރަފީގް ވިދާޅުވީ ދެ އަހަރު ދުވަހުގެ މި އެއްބަސްވުމުގެ ދަށުން 12 ހެކްޓަރުގެ ބިމުގައި ފަތުރުވެރިކަން ތަރައްގީކުރުމަށް އިންވެސްޓަރުން ހޯދުމާއި މަޝްރޫއުގެ ޑިޒައިން މަސައްކަތްތައް ސިޓީ ކައުންސިލާ ގުޅިގެން ކުރިއަށް ގެންދާނީ ރީޖަނަލް އެއަރޕޯޓްސްއިން ކަމަށެވެ.
ޓޫރިޒަމް ޒޯން ތަރައްގީކުރުމުގެ މި މިފަހުމުނާމާގައި އެ ސަރަހައްދުގައި ފަތުރުވެރިކަން ކުރިއެރުވުމަށް ހިންގާ މަޝްރޫއުތައް ރާވައި އެކަމާ ގުޅޭ މަޝްވަރާކުރުމަށް ސިޓީ ކައުންސިލާއި ރީޖަނަލް އެއަރޕޯޓްސްއިން ގުޅިގެން މަސައްކަތްކުރުމަށް ވެސް ވަނީ އެއްބަސްވެފައެވެ.
ފުވައްމުލައް އެއަރޕޯޓު ބެލެހެއްޓުމުގެ މަސައްކަތް ހަވާލުކޮށްފައިވާ ރީޖަނަލް އެއަރޕޯޓްސްއިން މީގެ ކުރިން ބުނެފައިވާ ގޮތުގައި އެ އެއަރޕޯޓު ބޮޑުކުރުމުގެ މަސައްކަތުގެ ތެރެއިން ފަތުރުވެރިކަމުގެ ފެސިލިޓީތައް ހިމެނޭހެން މުޅި އެއަރޕޯޓުގެ މާސްޓަރ ޕްލޭނެއް އެކުލަވާލުމަށް ހަމަޖެހިފައިވާ ކަމުގައެވެ.
އެއަރޕޯޓާ އިންވެގެންހުރި ހުސްބިންތަކުން ފަތުރުވެރިކަމަށް ގާތްގަނޑަކަށް 200 އެއްހާ އެނދު އުފެއްދިދާނެ ކަމަށް ރީޖަނަލް އެއަރޕޯޓްސްއިން ލަފާކޮށްފައިވެއެވެ. އެ ކުންފުނިން ވަނީ އެކަމަށް ހުރި ފުރުސަތުތަކާ ގުޅޭގޮތުން މީގެކުރިން ފުވައްމުލައް ސިޓީ ކައުންސިލާ އެކު މަޝްވަރާކޮށްފައެވެ.
