ސްވިޒަލޭންޑްގެ ބާގެންސްޓޮކް ރިސޯޓުގައި ކުރިއަށްދާ ސަމިޓްގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕް ދިން ހަރުކަށި އަސްކަރީ އަދި އިޤްތިޞާދީ އިންޒާރުތަކަށް އީރާނުގެ ޗީފް ނެގޯޝިއޭޓަރު އަދި ޕާލަމެންޓް ރައީސް މުޙައްމަދު ބާޤިރު ޤާލީބާފް ފާޅުގައި ރައްދުދީ، އެމެރިކާއަށް ގޮންޖަހައިފިއެވެ.
މަޝްވަރާގެ މޭޒަށް އެނބުރި އައުމަށްފަހު ދިން ބަޔާނެއްގައި ޤާލީބާފް ބުނީ، އެމެރިކާގެ އިންޒާރުތަކަކީ އެ ޤައުމު ”ގޮތް ހުސްވެ މާޔޫސްވެފައިވާ“ ހާމަވާ ކަމެއް ކަމަށާއި، އީރާނުން އެފަދަ ބިރުދެއްކުންތަކަށް އެއްވެސް ބެލުމެއް ނުބަހައްޓާނެ ކަމަށެވެ.
”އެމެރިކާގެ އިންޒާރުތަކަށް ބޯނުލަނބާނަން“
ރައީސް ޓްރަމްޕް ސޯޝަލް މީޑިއާގައި އީރާނަށް އަލުން ވަރުގަދަ ޙަމަލާތަކެއް ދޭނެ ކަމަށާއި، ހޮރްމޫޒް ކަނޑުއޮޅިން އެމެރިކާއަށް ޓެކްސް ނަގާނެ ކަމަށް ބުނެ ދިން އިންޒާރުތަކަށް ރައްދުދެމުން ޤާލީބާފް ބުނީ: ”އެމީހުން އަމިއްލައަށް ނުވިސްނަނީތޯ؟ އެމީހުންގެ އިންޒާރުތަކުން އެއްވެސް ނަތީޖާއެއް ނުކުންނަަނަމަ، މިއަދު އެމީހުން އެތިބި ގޮތް ހުސްވެ މާޔޫސްކަމުގެ ދަރަޖައަށް ކަންކަން ދިޔައީސްތޯ؟ އަހަރެމެން އެމެރިކާގެ އިންޒާރުތަކަކަށް ކުޑަކޮށްވެސް ބަލައެއް ނުލަން.“
އޭނާ ވަނީ އެމެރިކާގެ ވެރިން ބަސްމަގު ގެންގުޅޭއިރު ވިސްނުންތެރިވުމަށް އިންޒާރުދީ، ހުޅަނގުގެ ކޮންމެ އަނިޔާވެރިކަމަކަށް ނުވަތަ ބޯޑަރު ހުރަސްކުރުމަކަށް ވަގުތުން ރައްދުދޭން އީރާނުގެ އަސްކަރީ ބާރުތައް އޮތީ ސައްތައިން ސައްތަ ތައްޔާރަށް ކަމަށް ބުނެފައެވެ.
އީރާނުން ބުނާގޮތުގައި، އެމެރިކާއާއެކު ވެފައިވާ ”އިސްލާމްއާބާދު މެމޮރެންޑަމް“ ގެ ފުރަތަމަ މާއްދާގައި ލުބުނާނު ހިމެނޭގޮތަށް ހުރިހާ ފްރަންޓެއްގައި ޙަމަލާތައް ހުއްޓާލަން އޮތްއިރު، އިޒްރޭލުން ދޭ ޙަމަލާތައް ހުއްޓުވަން އެމެރިކާ ވަނީ ނުކުޅެދިފައެވެ. އެހެންކަމުން، ބޭރުން ފެންނަ ސިޔާސީ ހޫނު ބަސްތަކާއެކުވެސް، އީރާނުން ދަނީ އެމީހުންގެ އަސްކަރީ އަދި ޕްރޮކްސީ ބާރުތައް ދަމަހައްޓައިގެން، އަމިއްލަ ޝަރުޠުތަކުގެ މަތީގައި އެމެރިކާއާއެކު ސިއްރު މަޝްވަރާތައް ކުރިއަށްގެންދަމުންނެވެ.
