އިސްކަންދަރު ކޮށި ހުރި ބިމުގައި 15 ފަންގިފިލާގެ އޮފީސް އިމާރާތެއް އަޅައިދޭނެ ބަޔަކު ހޯދުމަށް ދިވެހި ފުލުހުންގެ ހިދުމަތުން އިއުލާންކޮށްފިއެވެ.
މިއީ ކޮންޓްރެކްޓަރ ފައިނޭންސިންގ އުސޫލުން ކުރިއަށްގެންދިއުމަށް ހަމަޖެހިފައިވާ މަޝްރޫއެކެވެ. މި މަޝްރޫއު ކުރިއަށްގެންދިއުމަށް ޝައުގުވެރިވާ ފަރާތްތަކަށް ރަޖިސްްޓްރީވުމުގެ ފުރުސަތު އަންނަ ޖުލައި މަހުގެ އެއްވަނަ ދުވަހާއި ހަމައަށް ހުޅުވާލާފައިވާ ކަމަށް ދިވެހި ފުލުހުންގެ ހިދުމަތުން ވަނީ ބުނެފައެވެ.
މި އިމާރާތް ތަރައްގީކުރުމަށް ހަމަޖެހިފައިވަނީ މިކްސްޑް ޔޫސްޑް އިމާރާތެއްގެ ގޮތުގައެވެ. އެގޮތުން މި އިމާރާތުގައި ސަރުކާރުގެ އޮފީސްތަކާއި، އިދާރީ މަސައްކަތްތައް ކުރެވޭނެ ޖާގަތަކާއި، އޮޕަރޭޝަނަލް މެޑިކަލް ޖާގަތަކާއި، އަދި އެކިކަހަލަ ތަމްރީނުތައް ކުރިއަށްގެންދިޔުމަށް ހާއްސަ ޖާގަތަކުގެ އިތުރުން އެކޮމޮޑޭޝަން ޖާގަ ހުންނާނެ ކަމަށް ފުލުހުން ވަނީ ބުނެފައެވެ.
މީގެ އިތުރުން މި އިމާރާތުގެ ބޭސްމަންޓާއި ފުރަތަމަ އަދި ދެވަނަ ފަންގިފިލާއަކީ ޕާކިންގއަށް ހާއްސަކޮށްގެން ކަނޑައަޅާފައިވާ ޖާގަތަކެއް ކަމަށް ފުލުހުން ވަނީ ބުނެފައެވެ. އެގޮތުން ބޭސްމަންޓްގައި ހަތަރު ފުރޮޅުލީ 28 އުޅަނދާއި 85 ސައިކަލު، ފުރަތަމަ ފަންގިފިލާގައި ހަތަރު ފުރޮޅުލީ 17 އުޅަނދު އަދި ދެވަނަ ފަންގިފިލާގައި 261 ސައިކަލު ޕާކްކުރާނެ ޖާގަ ހުންނާނެއެވެ.
މި އިމާރާތުގެ ތިން ވަނަ ފަންގިފިލާ ހާއްސަކޮށްފައިވަނީ ސިއްހީ ހިދުމަތް ދިނުމަށެވެ. އަދި ހަތަރު ވަނަ ފަންގިފިލާއިން ފެށިގެން 10 ވަނަ ފަންގިފިލާއަކީ އޮފީސްތައް ހިންގުމަށް ކަނޑައަޅާ ޖާގަތަކެވެ. އިމާރާތުގެ 11 ވަނަ ފަންގިފިލާއިން ފެށިގެން 13 ވަނަ ފަންގިފިލާ ހާއްސަކުރަނީ އެކަމަޑޭޝަންއަށެވެ. އަދި އިމާރާތުގެ އެންމެ މަތީދެ ފަންގިފިލާ ހާއްސަ ކުރަނީ އެކިކަހަލަ ތަމްރީން ޕްރޮގްރާމްތައް ކުރިއަށްގެންދިއުމަށެވެ. އެގޮތުން ހަ ކްލާސްރޫމްއާއި ލައިބްރަރީއާއި ކޮންޕަރެންސް ރޫމްގެ އިތުރުން މަލްޓިޕާޕަސް ހޯލްއާއި ޓްރެއިނިންގ ހޯލް އެ ދެ ފަންގިފިލާގައި ތަރައްގީކުރުމަށް ވަނީ ނިންމާފައެވެ.
އިސްކަންދަރު ކޮށި ހުރި ބިމުގައި 15 ފަންގިފިލާގެ އާ އިމާރާތް ތަރައްގީކުރުމަށް ހަމަޖެހިފައިވަނީ މިހާރު ހުރި އިމާރާތް ތަޅާލުމަށްފަހުގައެވެ.
