މ. އަތޮޅުގެ ރަށްތަކުގައި ފެނަކަ ކޯޕަރޭޝަނުން ފޯރުކޮށްދެމުން އައި ޔުޓިލިޓީގެ ހުރިހާ ހިދުމަތްތަކެއް، ސްޓެލްކޯގެ ދަށަށް ރަސްމީކޮށް އިއްޔެ ބަދަލުކޮށްފިއެވެ.
މިކަމަށްޓަކައި އިއްޔެ ބޭއްވި ރަސްމިއްޔާތެއްގައި މ. އަތޮޅުގެ ހަތް ރަށެއްގައި ޔުޓިލިޓީ ހިދުމަތް ފޯރުކޮށްދިނުމުގެ އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ޑރ. ޢަލީ އަޒުވަރެވެ. އަދި ފެނަކަ ކޯޕަރޭޝަނުގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު މުޙައްމަދު އަފީފް ޙުސައިނެވެ.
މ. އަތޮޅުގެ އިތުރުން ބ. އަތޮޅާއި ޅ. އަތޮޅުގައި ވެސް ފެނަކަ ކޯޕަރޭޝަނުން ދެމުން އަންނަ ޔުޓިލިޓީގެ ހިދުމަތް ސްޓެލްކޯގެ ދަށަށް ބަދަލުކުރުމަށް ސަރުކާރުން މިހާރު ވަނީ ނިންމައިފައެވެ.
ފާހަގަކޮށްލަންޖެހޭ ގޮތުގައި ސްޓެލްކޯއަކީ މިހާރު ވެސް މާލެ ސަރަހައްދުގެ އިތުރުން ކ. އަތޮޅު، އއ. އަތޮޅު، އދ. އަތޮޅު އަދި ވ. އަތޮޅުގައި ޔުޓިލިޓީ ހިދުމަތް ފޯރުކޮށްދެމުންދާ ކުންފުންޏެވެ. ސަރުކާރުގެ އަމާޒަކީ ގެންނަންޖެހޭ މިފަދަ ބަދަލުތައް ގެނެސްގެން ނަމަވެސް ރައްޔިތުންނަށް ދެމުން އަންނަ މިފަދަ ހިދުމަތްތައް އިތުރަށް ހަރުދަނާކުރުމެވެ.
