މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ޑިރެކްޓަރުންގެ ބޯޑަށް އާންމު ހިއްސާދާރުންގެ ފަރާތުން އިންތިހާބުކުރާ ދެ ޑިރެކްޓަރުންގެ މަގާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެމްޓީސީސީން ބުނީ މި މަގާމަށް ކުރިމަތިލާން ބޭނުންވާ ފަރާތްތަކުން މި މަހުގެ 23 ވާ އަންގާރަ ދުވަހުގެ 12:00 ގެ ކުރިން companysecretary@mtcc.com.mv އަށް އީ-މެއިލް ކުރަން ޖެހޭނެ ކަމަށެވެ. ކަނޑައެޅިފައިވާ މުއްދަތުގެ ތެރޭގައި ފޯމު ހުށަހަޅާ ފަރާތްތައް، އެ ކުންފުނީގެ ޑިރެކްޓަރުންގެ ބޯޑުގެ ނޮމިނޭޓިންގ އެންޑް ރެމިއުނެރޭޝަން ކޮމެޓީން އިވެލުއޭޓްކުރާނެ ކަމަށް އެމްޓީސީސީން ބުނެއެވެ.
އެމްޓީސީސީން ބުނެފައި ވަނީ ޑިރެކްޓަރުން ހޮވުމުގައި ކޯޕަރޭޓް ގަވަރނަންސް، ބިޒްނަސް ޑިވެލޮޕްމަންޓް، ގާނޫނީ، ފައިނޭންސް އަދި ކުންފުނީގެ ވިޔަފާރި އާ ގުޅޭ ދާއިރާއަކުން މަތީ ތައުލީމާއި ތަޖުރިބާ ހާސިލުކޮށްފައިވާ ފަރާތްތަކަށް އިސްކަންދެވޭނެ ކަމަށެވެ. އަދި ކެޕިޓަލް މާރކެޓް ޑިވެލޮޮޕްމަންޓް އޮތޯރިޓީގެ ކޯޕަރޭޓް ގަވަރނަންސް ކޯޑުގައި ބާރުއަޅާ ފަދައިން ކުންފުނީގެ ބޯޑު ޑިރެކްޓަރުންގެ މަގާމަށް ވީހާވެސް ގިނަ އަންހެނުން ކުރިމަތިލާ އިންތިހާބުގައި ވާދަކުރުމަކީ އެ ކުންފުނިން ނުހަނު ބާރުއަޅާކަމެއް ކަަމަށް އެމްޓީސީސީން ބުނެއެވެ.
މި މަގާމަށް ޑިރެކްޓަރުން އިންތިހާބުކުރާނީ މި އަހަރު ބާއްވާ އެ ކުންފުނީގެ 2023 ވަނަ އަހަރުގެ އަހަރީ އާންމު ޖަލްސާގައެވެ. ބޯޑު މެންބަރު ކަމަށް ނޮމިނޭޓްވާ ފަރާތްތަކުގެ މައުލޫމާތު ޑިރެކްޓަރުންގެ ބޯޑަށް ހުށަހަޅައި، މަގާމަށް ކުރިމަތިލާ ފަރާތްތަކުގެ ތެރެއިން ޝަރުތު ހަމަވާ ކަމަށް ޑިރެކްޓަރުންގެ ބޯޑުން ނިންމާ ފަރާތްތަކުގެ މައުލޫމާތު، އަހަރީ އާންމު ޖަލްސާ ބޭއްވުމުގެ ކުރިން ހިއްސާދާރުންގެ މައުލޫމާތަށްޓަކައި އާންމުކޮށް އިއުލާން ކުރާނެއެވެ.
އާންމު ހިއްސާދާރުންގެ ފަރާތުން ޑިރެކްޓަރު ކަމަށް ކުރިމަތިލާ ފަރާތްތަކުގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި:
- ކުންފުނީގެ ހިއްސާދާރެއް ކަމުގައިވުން
- އުމުރުން 30 އަހަރު ފުރިފައިވުން
- ކުންފުނީގެ ވިޔަފާރި އާއި ވިޔަފާރީގެ ދާއިރާތަކަށް އަހުލުވެރި ފަރާތަކަށްވުން
- ކުންފުނީގެ ކަންކަމަށް އެކަށީގެންވާ ވަގުތު ދެވޭނެ ފަރާތެއް ކަމުގައިވުން
- ސާބިތު ދަރަންޏެއް އޮތް ފަރާތެއް ކަމުގައި ނުވުން
- ސީއެމްޑީއޭގެ ”ފިޓް އެންޑް ޕްރޮޕަރ މިންގަނޑުތަކުގެ ގައިޑްލައިން“ އަށް ފެތޭ ފަރާތެއް ކަމުގައިވުން
- ވިޔަފާރި އާ ގުޅުންހުރި ދާއިރާއަކުން ބައިނަލްއަގުވާމީ ޔުނިވަރސިޓީއަކުން ދަށްވެގެން ފުރަތަމަ ޑިގްރީ ފެންވަރުގެ ސަނަދަކާ އެކު ފަސް އަހަރުގެ އަމަލީ ތަޖުރިބާ ލިބިފައިވުން ނުވަތަ ޑިޕްލޮމާ ފެންވަރުގެ ސަނަދަކާ އެކު މަދުވެގެން 10 އަހަރުގެ އަމަލީ ތަޖުރިބާ ލިބިފައިވުން
އެމްޓީސީސީގެ ބޯޑުގައި ހަތް ޑިރެކްޓަރުން ތިބޭއިރު އޭގެ ތެރެއިން ފަސް ޑިރެކްޓަރުންނަކީ ސަރުކާރުގެ ފަރާތުން ތިބޭ ޑިރެކްޓަރުންނެވެ. ދެން ތިބޭނީ އާންމު ހިއްސާދާރުން އިންތިހާބުކުރާ ދެ ޑިރެކްޓަރުންނެވެ.
