ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން ބާއްވާ ”މޫދު ފެސްޓް 2026“ މިއަދު ރަސްމީކޮށް އިފްތިތާޙުކޮށްފިއެވެ.
ހުޅުމާލެ ފޭސް 1 އެއްގައި ހުންނަ ދިރާގު ބީޗުގައި ބޭއްވި ޚާއްޞަ ރަސްމިއްޔާތެއްގައި މި ފެސްޓިވަލް އިފްތިތާޙުކޮށްދެއްވީ މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް އެވެ. މި ރަސްމިއްޔާތުގައި މިނިސްޓަރުގެ އަރިހުގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) ޢަލީ ޒުހައިރު ބައިވެރިވެވަޑައިގެންނެވިއެވެ.
މި ފެސްޓިވަލަކީ ކަނޑުތަކާ މެދު އޮންނަ ލޯބި އިތުރުކުރުމާއި، ދެމެހެއްޓެނިވި ގޮތެއްގައި ކަނޑުގެ ވަސީލަތްތައް ބޭނުންކުރުމަށް ހިތްވަރު ދިނުމުގެ މަޤްޞަދުގައި ކުރިއަށްގެންދާ ހަރަކާތެކެވެ. އާއިލާތަކަށާއި، ކުޑަކުދިންނަށް އަދި ކަނޑުގެ މާހައުލަށް ލޯބިކުރާ ފަރާތްތަކަށް އަމާޒުކޮށްގެން ބާއްވާ މި ފެސްޓިވަލްގައި ގިނަ ހަރަކާތްތަކެއް ވަނީ ރޭވިފައެވެ.
އޭގެ ތެރޭގައި ފަރު ފަރުކޮޅު އާލާކުރުމުގެ މަސައްކަތް ، ބަބްލް މޭކަރ ހަރަކާތްތައް، މޫދު ކުޅިވަރު، ކުރެހުމާއި ފަންނުވެރިކަމުގެ ހަރަކާތްތައް، މޫނުގައި ކުލަޖެއްސުން އަދި ކަނޑުތަކާ ގުޅުންހުރި ތަފާތު ގޭމްތައް ހިމެނެއެވެ.
މޫދު ފެސްޓް 2026 ކުރިއަށްދާނީ މިއަދު ހެނދުނު 09:00 އިން 11:00 އަށް އަދި ހަވީރު 15:00 އިން 18:00 އަށެވެ.
Minister @Shiyamaldives officially inaugurated “Moodhu Fest 2026”, alongside Housing Development Corporation (HDC) Managing Director Brigadier General (Retd.) Ali Zuhair, marking the beginning of a vibrant beach festival celebrating World Ocean Day 2026.
Held at Hulhumalé Phase… pic.twitter.com/cK3TUsE2v1
— Min of Fisheries, Agriculture and Ocean Resources (@MFAORmv) June 20, 2026
މި ފެސްޓިވަލް އިންތިޒާމުކުރުމުގައި އެޗްޑީސީގެ އިތުރުން ބޭންކް އޮފް މޯލްޑިވްސް، މިފްކޯ، ހޮރައިޒަން ފިޝަރީޒް، އޯޝަން ވޯރިއާސް، މޯލްޑިވްސް ޕޯޓްސް ލިމިޓެޑް (އެމްޕީއެލް) އަދި ދިރާގުން ވަނީ އެހީތެރިކަން ފޯރުކޮށްދީފައެވެ.
