ހަތަރު މަސްދުވަހުގެ މުސާރައާއެކު 97 މުވައްޒަފުން ފެނަކައިގެ ވަޒީފާއިން ވަކިވުމަށް އެދި ހުށަަހަޅާފައިވާ ކަމަށް އެ ކުންފުނިން ހާމަކޮށްފިއެވެ.
ފެނަކަ ކޯޕަރޭޝަންގެ ޗީފް ކޯޕަރޭޓް އޮފިސަރު އުސައިދު ޙަސަން ސޮއިކުރައްވައި، އެ ކުންފުނީގެ ހުރިހާ ގޮފިތަކަކަށް މި މަހުގެ ތިންވަނަ ދުވަހު ފޮނުވި މެމޯއެއްގައި ބުނެފައިވާ ގޮތުގައި، އަމިއްލައަށް ވަޒީފާއިން ވަކިވުމަށް އެދޭ މުވައްޒަފުންނަށް ބަދަލެއްގެ ގޮތުން ހަތަރު މަސްދުވަހުގެ މުސާރަ ދިނުމަށް ނިންމާފައިވާ ކަމަށެވެ.
ފެނަކައިން މިފަދަ ނިންމުމެއް ނިންމީ ކުންފުނީގެ ހަރަދުތައް ކުޑަކޮށް، މާލީ ފުދުންތެރިކަން އިތުރުކުރުމަށް ކަމަށް އެ ކުންފުނިން ވަނީ ބުނެފައެވެ. ފެނަކައިން މައުލޫމާތުދޭ ގޮތުގައި، އެ މުވައްޒަފުން ވަޒީފާއިން ވަކިވުމަށް އެދިފައިވަނީ އަމިއްލަ އިހްތިޔާރުގައި އެއްވެސް މަޖުބޫރުކުރުވުމެއް ނެތި ކަމަށާއި އެ ފަރާތްތަކަށް އިނާޔަތެއްގެ ގޮތުން ހަތަރު މަސްދުވަހުގެ މުސާރަދިނުމަށް ނިންމާފައިވާ ކަމަށެވެ.
ހަރަދު ކުޑަކުރުމަށް ސަރުކާރުން އަޅަން ނިންމާފައިވާ ފިޔަވަޅުތަކުގެ ދަށުން، ސަރުކާރު ހިއްސާވާ ކުންފުނިތަކުގެ މުވައްޒަފުންގެ ތެރެއިން 33 އިންސައްތަ މުވައްޒަފުން މަދުކުރުމަށް ފިނޭންސް މިނިސްޓްރީން ވަނީ މިދިޔަ އޭޕްރީލް މަހުގެ ތެރޭގައި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް އަންގައިފައެވެ. އެއާއެކު ސަރުކާރު ހިއްސާވާ ގިނަ ކުންފުނިތަކުން ވަނީ އެ މަސައްކަތް ފެށުމަށް ނިންމައިފައެވެ.
ފެނަކަ ކޯޕަރޭޝަންގައި 8،000 އަށްވުރެ ގިނަ މުވައްޒަފުން ވަޒީފާ އަދާކުރަމުން އަންނައިރު އޭގެ ތެރެއިން ގިނަ މުވައްޒަފުންނަކީ ކުރާނެ މަސައްކަތެއް ނެތި ތިބޭ ބައެއްކަން ފާހަގަކޮށްލަންޖެހެއެވެ.
