ކުންފުނިތަކަށް ޓޫރިސްޓް ރިސޯޓު ނުވަތަ އިންޓަގްރޭޓަޑް ޓޫރިސްޓް ރިސޯޓު ތަރައްޤީކުރުމަށްޓަކައި ރަށް، ބިން ނުވަތަ ފަޅު ކުއްޔަށް ދޫކުރުމުގައި ޢަމަލުކުރާނެ އައު ގަވާއިދެއް ސަރުކާރުން
ސަރުކާރުން އެކުލަވާލި މި ގަވާއިދުގައިވާ ގޮތުން، ދައުލަތުގެ ކުންފުންޏަކަށް ފަތުރުވެރިކަމުގެ ބޭނުމަށް ރަށެއް ނުވަތަ ފަޅެއް ކުއްޔަށް ދޫކުރެވޭނީ، އެ ކުންފުންޏެއްގައި ސަރުކާރުގެ މަދުވެގެން 45 އިންސައްތަ ހިއްސާ އޮންނަ ނަމައެވެ. މިއީ ދައުލަތުގެ ކުންފުނިތަކުން ފަތުރުވެރިކަމުގެ ސިނާޢަތުގައި އިންވެސްޓްކުރުމަށް ހުރި ފުރުޞަތުތައް ހަރުދަނާ އުސޫލެއްގެ ދަށުން ކުރިއަށް ގެންދިއުމަށް އެޅުއްވި މުހިންމު ފިޔަވަޅެކެވެ.
މި ގަވާއިދުގެ ދަށުން ފަތުރުވެރިކަމަށް ރަށް ނުވަތަ ބިން ނުވަތަ ފަޅު ދޫކުރުމުގައި ބަލާނެ މުހިންމު ކަންތައްތަކެއް ވަނީ ކަނޑައަޅާފައެވެ. އޭގެ ތެރޭގައި:
ވަޒީރުންގެ މަޖިލީހުގެ ފާސްކުރުން: ކުންފުނިތަކަށް މިފަދަ ތަންތަން ދޫކުރެވޭނީ ވަޒީރުންގެ މަޖިލީހުން މަޝްވަރާކޮށް، އެތަނެއް ދޫކުރާނެ ވަކި ކުންފުންޏެއް ފާސްކުރުމުންނެވެ.
މާލީ އަދި ފަންނީ ޤާބިލުކަން: ރިސޯޓު ތަރައްޤީކުރަން ހަވާލުކުރާ ކުންފުންޏަކީ އެ މަޝްރޫޢު ކުރިއަށް ގެންދިއުމުގެ މާލީ އަދި ފަންނީ ފެންވަރު ހުރި ކުންފުންޏަކަށް ވާންޖެހެއެވެ.
ސީއެސްއާރްގެ ގޮތުގައި ފައިސާ ދެއްކުން: މި ގަވާއިދުގެ ދަށުން ކުއްޔަށްދޭ ކޮންމެ ތަނަކަށް، ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރް) ގެ ގޮތުގައި 500,000 (ފަސްލައްކަ) އެމެރިކާ ޑޮލަރު ޓޫރިޒަމް ޓްރަސްޓް ފަންޑަށް ޖަމާކުރަންޖެހެއެވެ. ނުވަތަ އެ އަދަދަށްވާ އިޖުތިމާޢީ މަޝްރޫޢެއް ހިންގަން އެއްބަސްވާންޖެހެއެވެ.
މީގެ އިތުރުން، މިގޮތަށް ދޫކުރާ ތަންތަނުގެ ލީސް އިކުއިޒިޝަން ފީ، ފަތުރުވެރިކަމާ ބެހޭ ވުޒާރާއިން ކަނޑައަޅާ މިންވަރަކަށް ދައްކަންޖެހޭނެއެވެ. އަދި އެއްބަސްވުމުގައި ސޮއިކުރާތާ 14 ދުވަހުގެ ތެރޭގައި އެކަމުގެ ތަފްސީލުތައް އޮޑިޓަރ ޖެނަރަލްގެ އޮފީހަށް ހުށަހަޅަންޖެހޭނެ ކަމަށްވެސް ގަވާއިދުގައި ބަޔާންކޮށްފައިވެއެވެ.
މި އައު ގަވާއިދަކީ ދައުލަތުގެ ކުންފުނިތަކުގެ އާމްދަނީ އިތުރުކޮށް، ފަތުރުވެރިކަމުގެ މަންފާ ދައުލަތަށް އެންމެ ފުރިހަމަ ގޮތުގައި ހޯދުމަށް މަގުފަހިވެގެންދާނެ ކަމެކެވެ. މީގެ އިތުރުން، މި ގަވާއިދުގެ ސަބަބުން ރަށްރަށުގެ އިޖުތިމާޢީ ތަރައްޤީއަށް ބޭނުންވާ ފަންޑުތައް ހޯދުމަށާއި، ކުންފުނިތަކުގެ ހިންގުން އިތުރަށް ހަރުދަނާވެގެންދާނެ ކަމަށް ސަރުކާރުން އުންމީދު ކުރެއެވެ.
