މިއަދު މުޅި ރާއްޖޭގެ މިސްކިތްތަކުގައި އިއްވި ހުކުރު ޚުޠުބާ ބިނާކޮށްފައިވަނީ މުޙައްރަމް މަހުގެ ދިހަވަނަ ދުވަސް ނުވަތަ ޢާޝޫރާ ދުވަހުގެ މާތްކަމާއި އެ ދުވަހުގެ މުހިންމުކަމުގެ މައްޗަށެވެ.
މިއަދުގެ ޚުޠުބާގައި ބަޔާންކޮށްފައިވާ ގޮތުގައި، ޢާޝޫރާ ދުވަހަކީ ހެޔޮކަމާއި މާތްކަމުން ފުރިގެންވާ، އިސްލާމީ ތާރީޚުގައި ނުހަނު މުހިންމު ހާދިސާއެއް ހިނގާފައިވާ ދުވަހެކެވެ. އެއީ މޫސާގެފާނާއި އެކަލޭގެފާނަށް ތަބާވީ މީހުން، ފިރުޢައުނުގެ އަނިޔާވެރިކަމުން ސަލާމަތްކޮށްދެއްވި ދުވަހެވެ. މާތް الله ފިރުޢައުނާއި އޭނާގެ ލަޝްކަރު ޣަރަޤުކުރެއްވީ މި ދުވަހުގައެވެ. މި ހާދިސާއިން ލިބިދޭ އެންމެ ބޮޑު ޢިބުރަތަކީ މުޞީބާތްތަކުން ސަލާމަތްވެވޭނީ އީމާންކަމާއި އިސްލާމްކަމުން ކަމާއި، މާތް اللهއަށް އިތުބާރުކޮށްގެން މެނުވީ ދެދުނިޔޭގެ ސަލާމަތް ނެތްކަން ކަމުގައި ޚުޠުބާގައި ފާހަގަކުރިއެވެ.
މުޙައްރަމް މަހަކީ ހުރުމަތްތެރި ކުރައްވާފައިވާ ހަތަރު މަހުގެ ތެރެއިން މަހެއްކަން ފާހަގަކުރައްވައި، ޚުޠުބާގައި ވަނީ ޢާޝޫރާ ދުވަހު ރޯދަހިފުމުގެ ސުންނަތުގެ މައްޗަށް އަލިއަޅުވާލާފައެވެ. ކީރިތި ރަސޫލާ ﷺ މަދީނާއަށް ހިޖުރަކުރެއްވިއިރު، ޔަހޫދީން އެ ދުވަހު ރޯދަހިފަމުންދިޔައީ މޫސާގެފާނު ސަލާމަތްވި ދުވަސް ކަމަށްވާތީއެވެ. އެހިނދު ރަސޫލާ ﷺ ޙަދީޘްކުރެއްވީ މޫސާގެފާނަށްޓަކައި ޔަހޫދީންނަށްވުރެ މުސްލިމުން އައުލާކަން ބޮޑު ކަމަށެވެ. އަދި ޢާޝޫރާ ދުވަހު ރޯދަހިފުމަކީ ވޭތުވެދިޔަ އަހަރުގެ ކުދި ފާފަތައް ފުއްސަވައިދެއްވާނެ ކަމެއް ކަމުގެ އުފާވެރި ޚަބަރު ރަސޫލާ ﷺ ދެއްވާފައިވާކަން ޚުޠުބާގައި ހަނދާންކޮށްދިނެވެ.
ޢާޝޫރާ ދުވަހުގެ ރޯދަ ހިފުމުގައި އަމަލުކުރަންވީ އެންމެ އިތުރުވެގެންވާ ގޮތަކީ، ޔަހޫދީންނާ ޚިލާފުވުމުގެ ގޮތުން ޢާޝޫރާ ދުވަހުގެ ކުރިއަށް އެއް ދުވަސް ނުވަތަ ފަހަށް އެއް ދުވަސް އިތުރުކޮށްގެން ރޯދަހިފުން ކަމަށް ޚުޠުބާގައި ބަޔާންކުރިއެވެ.
މީގެ އިތުރުން، ޢާޝޫރާ ދުވަހާ ގުޅުވައިގެން ބައެއް ފަރާތްތަކުން ކުރަމުންދާ ބިދުޢަތަކާއި ދީނާ ޚިލާފު ކަންކަމާމެދު ޚުޠުބާގައި ވަނީ އިންޒާރު ދެއްވާފައެވެ. ޚާއްޞަކޮށް، މީހަކު މަރުވުމުން ހިތާމަފާޅުކުރުމުގެ ގޮތުން ދީނުގެ އުޞޫލުތަކާ ޚިލާފަށް ކުރާ ކަންކަމަކީ އިސްލާމީ ޝަރީޢަތުގައި ނަހީކުރައްވާފައިވާ ކަންކަން ކަމުގައި ހަނދާންކޮށްދިނެވެ. އަދި ޒަމާނީ މީޑިއާގެ ތެރެއިން ފެތުރޭ މިފަދަ ނުބައި ފިކުރުތަކުން ދުރުހެލިވެ، ހަމައެކަނި ސުންނަތުގައިވާ ގޮތަށް އަޅުކަންތައް އަދާކޮށް މާތް اللهގެ ޙަޟުރަތާ ކުއްތަންވުމަށް މިއަދުގެ ޚުޠުބާގައި ހުރިހާ މުސްލިމުންނަށް ވަނީ ގޮވާލާފައެވެ.
