އެމެރިކާއާއި އީރާނާ ދެމެދު ޤާއިމުކުރި ތާރީޚީ ”ވާސައި އެއްބަސްވުމަށް“ ގޮންޖަހާ، އިޒްރޭލުގެ ޓެރަރިސްޓް އަސްކަރިއްޔާއިން އެ އެއްބަސްވުމާ ޚިލާފަށް ދެކުނު ލުބުނާނަަށް ނުރައްކާތެރި ޑްރޯން ޙަމަލާތަކެއް ދީ 3 މީހުން މަރާލައިފިއެވެ.
އަލްޖަޒީރާއިން ރިޕޯޓްކުރާ ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް އަދި އީރާނުގެ ރައީސް ޕެޒެޝްކިއަން ހަނގުރާމަ ހުއްޓާލުމަށް ސޮއިކުރިތާ މަދު ގަޑިއިރުކޮޅެއްގެ ތެރޭގައި އިޒްރޭލުން ވަނީ މި ލާއިންސާނީ ޙަމަލާތައް ދީފައެވެ.
ޙަމަލާގެ ތަފްޞީލާއި އިޒްރޭލުގެ ބޮޑާކަން:
– ކްފާރް ތެބްނިތު އަދި ޒެބްދީންގެ ޙަމަލާތައް: ލުބުނާނުގެ ރަސްމީ ނޫސް އެޖެންސީއިން ބުނާގޮތުގައި، އިޒްރޭލުގެ ޑްރޯނަކުން ފުރަތަމަ ޙަމަލާދިނީ ކްފާރް ތެބްނިތު ސަރަޙައްދުން ދަތުރުކުރި ކާރަކަށެވެ. މި ޙަމަލާގައި 2 މީހުން ވަގުތުން މަރުވިއެވެ. އޭގެ ކުޑައިރުކޮޅެއް ފަހުން އޭގެ ކައިރީގައި އޮންނަ ޒެބްދީން އަވަށަށް ދިން ޙަމަލާއެއްގައި އިތުރު މީހަކު ވަނީ މަރާލާފައެވެ.
– ނަތަންޔާހޫގެ ގޮންޖެހުން: އެމެރިކާއާއި އީރާނުގެ އެއްބަސްވުމުގައި ލުބުނާނު ހިމެނޭގޮތަށް ”ހުރިހާ ދިމާލަކުން ހަނގުރާމަ ހުއްޓާލަން“ އޮތް ނަމަވެސް، އިޒްރޭލުގެ ބޮޑުވަޒީރު ނަތަންޔާހޫ ވަނީ މިއަދު ފާޅުގައި އެކަމަށް ގޮންޖަހާފައެވެ. އޭނާ ބުނީ އިޒްރޭލުގެ ސަލާމަތަށްޓަކައި ލުބުނާނުގެ އެތެރެއަށް 10 ކިލޯމީޓަރަށް ވާގޮތަށް އިޒްރޭލު ސިފައިން ދާއިމީކޮށް ތިބޭނެ ކަމަށެވެ.
– ހުޅަނގުގެ މުނާފިޤުކަން: އެހެން ޤައުމަކުން މިފަދަ ކަމެއް ކުރިނަމަ، ހުޅަނގުގެ ޤައުމުތަކުން ވަގުތުން ދަތިކުރުމުގެ ފިޔަވަޅު އެޅީހެވެ. ނަމަވެސް އެމެރިކާއާއި އީޔޫއިން ފައިސާއާއި ހަތިޔާރު ދީގެން ގެންގުޅޭ އިޒްރޭލުން، ސުލްޙައިގެ އެއްބަސްވުމެއް އޮއްވާ މީހުން މަރަމުންދާއިރު ހުޅަނގުގެ ވެރިން ތިބީ ހަނެވެ. މިއިން ހާމަވަނީ ބައިނަލްއަޤްވާމީ ޤާނޫނަކީ ވަކި ބަޔަކަށް ތަންފީޒުކުރެވޭ އަދި ގިނަފަހަރު ހުޅަނގުގެ އިސްތިއުމާރީ ބާރުތަކާ ދެކޮޅުވާ ބަޔަކަށް އަދަބުދޭން ގެންގުޅޭ އިސްތިއުމާރީ ހަތިޔާރެއްކަމެވެ.
