ޕީއެންސީ ބައިބައިކުރުމުގެ ބޭނުމުގައި ފާޑުފާޑުގެ ވާހަކަތައް ދައްކައިގެން އެ ޕާޓީ ނުގުޑާނެ ކަމަށާއި، މުޅި ޕާޓީ އޮތީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއެކު ސާބިތުކަމާއެކު ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް މިހެން ވިދާޅުވީ ސޯޝަލް މީޑިއާގައި ކުރެއްވި ޕޯސްޓެއްގައެވެ. މި ޕޯސްޓަކީ ޕީއެންސީ ބައިބައިވެއްޖެ ކަމަށާއި، މިއީ ރައީސް މުޢިއްޒު ލީޑަޝިޕުން ދުރުކުރަންވީ ވަގުތު ކަމަށް ބުނެ ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް ރައްދު ދެއްވައި ކުރެއްވި ޕޯސްޓެކެވެ.
ޕީއެންސީ ބައިބައި ކުރާކަށް ފާޑުފާޑުގެ ވާހަކަތައް ދައްކާނެކަމެއްނެތް. ބަޔަކު ދައްކާހާ ވާހަކަޔަކަށް ޕީއެންސީ ނުގުޑާނެ. ޕީއެންސީއަކީ ރާއްޖޭގައި އޮތް އެންމެ ބޮޑު ޕާޓީ. އެންމެ ބަދަހި ޕާޓީ. ބިނާކުރަނިވި ފިކުރުގެ ޕާޓީ. މި ޕާޓީއިން އަބަދުވެސް އިސްކުރާނީ ދިވެހީންނާ ދިވެހީންގެ ގައުމު.… pic.twitter.com/d0t8NNyxHL
— Abdul Raheem Abdulla (@Banafsaa) June 18, 2026
އަބްދުއްރަހީމް ވިދާޅުވީ ޕީއެންސީއަކީ މިއަދު ރާއްޖޭގައި އޮތް އެންމެ ބޮޑު އަދި އެންމެ ބަދަހި ސިޔާސީ ޕާޓީ ކަމަށެވެ. އަދި އެއީ ބިނާކުރަނިވި ފިކުރުގެ ޕާޓީއެއް ކަމަށާއި، އެ ޕާޓީން އަބަދުވެސް އިސްކުރާނީ ދިވެހީންނާއި ދިވެހި ގައުމު ކަމަށް އޭނާ ފާހަގަކުރެއްވިއެވެ.
”ޕީއެންސީ ބައިބައި ކުރާކަށް ފާޑުފާޑުގެ ވާހަކަތައް ދައްކާނެކަމެއް ނެތް. ބަޔަކު ދައްކާހާ ވާހަކަޔަކަށް ޕީއެންސީ ނުގުޑާނެ. މުޅި މި ޕާޓީ އޮތީ ރައީސް ޑރ. މުޙައްމަދު މުޢިއްޒާއެކު ގަދަކޮށް،“ އަބްދުއްރަހީމް ވިދާޅުވިއެވެ.
ކުރީގެ ރައީސް މުޙައްމަދު ނަޝީދު ގެންދަވަނީ ހުއްޓުމެއް ނެތި ރައީސް މުޢިއްޒާއި ގުޅުވައިގެން އެތައް ދޮގު ވާހަކަތަކެއް ދައްކަވައި، ފިތުނަ އުފެއްދުމަށް މަސައްކަތް ކުރައްވަމުންނެވެ. ނަމަވެސް، ސަރުކާރު ހިންގާ މައި ޕާޓީގެ ލީޑަޝިޕުން ބުނަމުންދަނީ ޕާޓީގެ އެތެރޭގެ ބަދަހިކަން އެބައޮތް ކަމަށާއި، ރައީސް މުޢިއްޒުގެ ޒައާމަތުގައި ގައުމަށް ތަރައްގީ ގެނައުމުގައި ޕާޓީ އޮތީ އެކަތިގަނޑެއްގެ ގޮތުގައި ކަމަށެވެ.
