އިދިކޮޅު އެމްޑީޕީން ”ވަޒީފާ ބުރާސްފަތި“ ގެ ނަމުގައި މާލޭގައި މިރޭ ބޭއްވުމަށް ނިންމާފައިވާ މުޒާހަރާގައި ހަމަނުޖެހުން ހިންގާފާނެ ކަމަށް ބެލެވޭތީ، މާލޭގެ ބައެއް ސަރަހައްދުތައް ބަންދުކުރަން ފުލުހުން ނިންމައިފިއެވެ.
އެމްޑީޕީގެ ޗެއަރޕާސަންގެ މަގާމަށް ހަވާލުވެވަޑައިގަތުމަށްފަހު ކުރީގެ ރައީސް މުޙައްމަދު ނަޝީދު ވަނީ، އެމްޑީޕީއަށް ތާއީދުކުރާތީ ސަރުކާރުގެ ކުންފުނިތަކުގައި މަސައްކަތްކުރާ މުވައްޒަފުންނަށް ވަޒީފާގެ ބިރު ދައްކައި ވަޒީފާއިން ވަކިކުރަމުންދާ ކަމަށް ވިދާޅުވެ، މުޅި ރާއްޖޭގައި މުޒާހަރާކުރާނެކަން އިއުލާން ކުރައްވައިފައެވެ. އަދި މި މުޒާހަރާތަކުގައި ސަރުކާރުގެ އިދާރާތައް ހިފާނެ ކަމަށް ވިދާޅުވެ ނަޝީދު ވަނީ ސަރުކާރަށް އިންޒާރު ވެސް ދެއްވައިފައެވެ.
ސަރުކާރު ހިންގުމަށް ދަތިކުރުމުގެ ގޮތުން ސަރުކާރާ މެދު އާންމުންގެ މެދުގައި ނުތަނަވަސްކަން އުފެދޭނެ ގޮތަށް ހަގީގަތެއް ނެތް ވާހަކަތައް ފަތުރައި، ސަރުކާރުން ކުރަމުން އަންނަ މަސައްކަތްތަކަށް ހުރަސްއެޅުމުގެެ އިތުރުން ސަރުކާރުގެ އޮފީސްތައް ހިސޯރުކުރާނެކަމުގެ އިންޒާރު ނަޝީދު ދެއްވާފައިވާއިރު، އެމްޑީޕީގެ މިފަދަ ނާތަހުޒީބީ އަމަލުތަކުގައި ޒުވާނުން ބައިވެރިވުމަށް ވެސް ނަޝީދު އަންނަނީ ފާޅުގައި ގޮވާލަމުންނެވެ.
އެމްޑީޕީން މުޒާހަރާކުރާނެ ކަމަށް ބުނެފައިވަނިކޮށް، ފުލުހުން ވަނީ، މިރޭ 20:00 އިން ފެށިގެން 00:00 އާއި ހަމައަށް މާލޭގެ ބައެއް މަގުތައް ބަންދުކުރާނެ ކަމަށް ބުނެފައެވެ. ނަމަވެސް ބަންދުކުރަނީ ކޮން ސަރަހައްދުތަކެއް ކަމެއް ފުލުހުން ބުނެފައެއް ނުވެއެވެ. ނަމަވެސް މިއީ މާލޭގެ ޓްރެފިކް ކަންކަން ބެލެހެއްޓުމަށް ފުލުހުން ކުރަމުންދާ މަސައްކަތުގެ ތެރެއިން ކުރުމަށް ނިންމާފައިވާ ކަމެއް ކަމަށް ފުލުހުން ވަނީ ބުނެފައެވެ.
މާލޭގެ ޓްރެފިކް ކަންކަން ބެލެހެއްޓުމަށް ފުލުހުން ކުރަމުންދާ މަސައްކަތުގެ ތެރެއިން މިރޭ 20:00 އިން 00:00 އަށް މާލޭގެ އެކި ސަރަހައްދުތައް ބަންދުކުރުމަށް ހަމަޖެހިފައިވާ ވާހަކަ ދަންނަވަމަވެ.
— Maldives Police (@PoliceMv) June 18, 2026
އެމްޑީޕީން މުޒާހަރާ ފެށުމަށް ނިންމާފައިވަނީ މިރޭ 20:30 ގައެވެ.
