ބަނގުރަލާއި އޫރުމަހުގެ ބާވަތްތައް ހުންނަ ސަފާރީތަކުގައި މޯލްޑިވްސް ކަސްޓަމްސް ސަރވިސްގެ ޓްރެކިންގ ޑިވައިސް ހަރުކުރަން މަޖުބޫރުވާ ގޮތަށް ގަވާއިދަށް ގެނައި އިސްލާހަށް އަމަލު ކުރަން ފަށާފައިވާ ކަމަށް އެ އިދާރާއިން ބުނެފިއެވެ.
ކަސްޓަމްސްއިން ބުނީ އެ އިދާރާގެ ކޮންޓްރޯލުގެ ދަށުގައި ހުންނަ އުޅަނދުފަހަރާއި އެފަދަ އުޅަނދުފަހަރަށް ގޮސްއައިސްވާ އުޅަނދުފަހަރާއި އިދާރާގެ ކޮންޓްރޯލުގެ ދަށުން އެއްތަނުން އަނެއްތަނަށް ގެންދެވޭ މުދާ ނުވަތަ ވަކި ގޮތަކަށް އަމަލު ކުރަން ގާނޫނު ނުވަތަ ގަވާއިދު ލާޒިމުކޮށްފައިވާ މުދަލާއި އެފަދަ މުދާ އުފުލާ އުޅަނދުފަހަރާއި އެފަދަ މުދާ ރައްދުކުރަން ޖެހޭ އުޅަނދުފަހަރުގެ ހަރަކާތްތައް މޮނިޓަރކޮށް، އެ އިދާރާގެ ކޮންޓްރޯލް ހަރުދަނާކުރުމަށް ގިނަގުނަ މަސައްކަތްތަކެއް ކުރަމުން އަންނަ ކަމަށެވެ.
އެ އިދާރާގެ ކޮންޓްރޯލުގެ ދަށުން އެއްތަނުން އަނެއްތަނަށް ގެންދެވޭ މުދަލާއި އިދާރާގެ ކޮންޓްރޯލުގެ ދަށުގައިވާ އުޅަނދުފަހަރު މޮނިޓަރކޮށް ބެލެހެއްޓުމާބެހޭ އުސޫލެއް 2018 ވަނަ އަހަރު އެކުލަވާލައި އަމަލުކުރަން ފަށާފައިވާ ކަމަށް ކަސްޓަމްސްއިން ބުނެއެވެ.
ކަސްޓަމްސްއިން ބުނެފައި ވަނީ އެ އުސޫލަށް ފުރަތަމަ އަމަލުކުރަން ފެށިއިރު ރަސްމީ ބަނދަރު ފިޔަވައި އެހެން ތަންތަނަށް ދިއުމަށް ހުއްދަ ދޭ އުޅަނދުފަހަރާއި އެ އިދާރާއިން ދޫކުރާ ބަނގުރަލާއި އޫރުމަސް ގެންދަން ޖެހޭ ތަނަށް ގެންދިއުމަށް ޓަކައި އެތަކެތި އުފުލާ އުޅަނދުފަހަރުތަކުގައި އުޅަނދުފަހަރު އޮންނަ ތަން އަންގައިދޭ ޓްރެކިންގ ޑިވައިސް ހަރުކުރެވި އުޅަނދުފަހަރުތަކުގެ ހަރަކާތްތައް މޮނިޓަރކުރަން ފެށި ކަމަށެވެ.
މި އުސޫލަށް މިދިޔަ މަހުގެ 29 ވަނަ ދުވަހު ގެނެވުނު އިސްލާހަށް މި މަހުގެ 15 ވަނަ ދުވަހު އަމަލު ކުރަން ފަށާފައިވާއިރު، އާ އިސްލާހާ އެކު އިތުރު އުޅަނދުތަކެއްގައި ޓްރެކިންގ ޑިވައިސް ހަރުކުރަން ޖެހޭ ކަމަށް ކަސްޓަމްސްއިން ވަނީ ބުނެފައެވެ. އެއީ:
- ބަނގުރަލާ އޫރުމަހުގެ ބާވަތްތައް ހުންނަ ސަފާރީ އުޅަނދުފަހަރު
- ސޭފް އެންކަރޭޖްގެ ދަށުން ލޯކަލް ބަނދަރެއްގައި ބޭއްވުމުގެ ހުއްދަ ދެވޭ އުޅަނދުފަހަރު
- ކަސްޓަމްސްގެ ކޮންޓްރޯލުގެ ދަށުގައި އޮންނަ އުޅަނދުފަހަރަށް ތަކެތި ހިފައިގެންދާ ލޯކަލް އުޅަނދުފަހަރު
ކަސްޓަމްސްއިން ބުނި ގޮތުގައި ޓްރެކިންގ ޑިވައިސް ހަރުކުރަން މަޖުބޫރުވާ އުޅަނދުފަހަރުތަކުގެ ހަރަކާތްތައް އެ އިދާރާއިން މޮނިޓަރ ކުރަމުން ގެންދާނެ ކަމުގައެވެ. އަދި އުސޫލާ ހިލާފުވާ ފަރާތްތަކަށް އެ އިދާރާއިން ދޭ ހިދުމަތްތައް މެދުކަނޑާލައި ގާނޫނާއި ގަވާއިދުގެ ދަށުން ފިޔަވަޅު އަޅަމުން ގެންދާނެ ކަމަށް ވެސް ކަސްޓަމްސްއިން ބުނެއެވެ.
