ޙަމާސްއިން 7 އޮކްޓޯބަރު 2023 ގައި އިޒްރޭލަށް ދިން ޙަމަލާގެ މައިގަނޑު އެއް ބޭނުމަކީ، އިޒްރޭލާއި ސައުދީ ޢަރަބިއްޔާއާ ދެމެދު ޤާއިމުކުރަން އުޅުނު ޚިޔާނާތްތެރި ގުޅުންތައް ހުއްޓުވައި ޚަރާބުކޮށްލުން ކަމަށް އިޒްރޭލުގެ އަސްކަރިއްޔާއިން އަތުލައިގަތް ޙަމާސްގެ ސިއްރު ލިޔުންތަކުން ހާމަވެއްޖެއެވެ. އިޒްރޭލުގެ ރަސްމީ ”ކާން“ ޓީވީއިން ދެއްކި މި ލިޔުންތަކުން އެނގޭގޮތުގައި، ސައުދީން އިޒްރޭލާއެކު ސުލްޙަވާން އުޅުމަކީ މުޅި ފަލަސްޠީނުގެ ޖިހާދު ނައްތާލުމަށް ރޭވިގެން ހިންގަމުން ދިޔަ ބޮޑު ޚިޔާނާތެރި ޖަރީމާއެއްކަމަށް ޙަމާސްއިން ދެކުނެވެ.
ސައުދީއާއި އިޒްރޭލުގެ ސިއްރު އެއްބައިވުން:
މި ޙަމަލާތަކަށްފަހުވެސް ސައުދީގެ ވެރިން ދަނީ އިޒްރޭލާއެކު ސިއްރުން ބޮޑެތި ގުޅުންތަކެއް ބާއްވަމުންނެވެ. މީގެ ތެރޭގައި ސައުދީގެ ވަލީއަހުދު މުޙައްމަދު ބިން ސަލްމާން (އެމްބީއެއް) އާއި އިޒްރޭލުގެ ބޮޑުވަޒީރު ނަތަންޔާހޫ ”ނިއޮމް“ ސިޓީގައި ސިއްރުން ބައްދަލުކުރެއްވުމާއި، އިޒްރޭލުގެ މަތިންދާބޯޓުތަކަށް ސައުދީގެ ވައިގެ ސަރަޙައްދު ހުޅުވާލުން ހިމެނެއެވެ. މީގެ އިތުރުން، 2018 ވަނަ އަހަރު ސަޢޫދީއިން ނޫސްވެރިޔާ ޚަޝޫގްޖީ މަރާލުމުން، މުޅި ދުނިޔެއިން ސައުދީއާ ދެކޮޅުވި ވަގުތު އެމެރިކާގައި ސައުދީގެ ދިފާޢުގައި އެންމެ ބޮޑަށް ވާހަކަދެއްކި އެކަކީ ނަތަންޔާހޫއެވެ.
ވެރިންގެ ޝަރުޢީ ޤާބިލްކަމުގެ މައްޗަށް ފާޑުކިޔުން:
މުސްލިމުންގެ އެންމެ މުޤައްދަސް ބިންތަކުގެ ވެރިންގެ ގޮތުގައި ތިބެ، އިސްލާމްދީނުގެ ޢަދާވާތްތެރިންނާ ގުޅިގެން މުސްލިމް އުއްމަތުގެ މަޞްލަޙަތުތައް ޤުރުބާންކުރަމުންދާ ވެރިންނަކީ މުސްލިމުންގެ މައްޗަށް ވެރިކަން ކުރުމުގެ ޝަރުޢީ އަދި އަޚްލާޤީ އެއްވެސް ޝަރުޠެއް ފުރިހަމަވާ ބައެއްތޯ މިއަދު ވަނީ ބޮޑު ސުވާލެއް އުފެދިފައެވެ. އަމިއްލަ ޤައުމުގެ އިޤްތިޞާދާއި ބާރު ދެމެހެއްޓުމަށްޓަކައި، ފަލަސްޠީނުގެ މުސްލިމުން ނައްތާލަން އުޅޭ ބަޔަކާ ސިއްރުން އަތްގުޅާލާ ވެރިންނަކީ މުސްލިމް އުއްމަތަށް ގައްދާރު ވެފައިވާ ބޮޑެތި ޚާއިނުންގެ ގޮތުގައި ދުނިޔޭގެ މުސްލިމް ޢިލްމުވެރިންނާއި ޢާންމުން ދަނީ ސިފަކުރަމުންނެވެ.
