މެދުއިރުމަތީގައި މިހާރު ހިނގަމުން އަންނަ ހަމަނުޖެހުންތަކުގެ ސަބަބުން، ގޭސް ހޯދުމަށް ކުރަންޖެހޭ ހޭދަ ބޮޑުވުމާ ގުޅިގެން، މޯލްޑިވް ގޭހުން ވިޔަފާރިތަކަށް ވިއްކާ ގޭހުގެ އަގު ބޮޑުކޮށްފިއެވެ.
މޯލްޑިވް ގޭހުން މައުލޫމާތުދޭ ގޮތުގައި މި ބަދަލު ގެނައީ ރިސޯޓުތަކާއި ކެފޭ އަދި ހޮޓާތަކަށް ވިއްކާ ގޭހުގެ އަގަށް އެކަނި ކަމަށެވެ. ނަމަވެސް އާންމު ރައްޔިތުންނަށް ލުއިދިނުމުގެ ގޮތުން، ގޭބިސީތަކަށް ވިއްކާ ގޭހުގެ އަގަށް އެއްވެސް ބަދަލެއް ނުގެންނަ ކަމަށް އެ ކުންފުނިން ވަނީ ބުނެފައެވެ.
ގޭސް ވިއްކާ އަގުތަކަށް ގެނައި ބަދަލުތަކާއެކު، 45 ކިލޯގެ ގޭސް ފުޅިއެއްގެ އަގު މިހާރު ވަނީ 25 އިންސައްްތަ ބޮޑުކޮށްފައެވެ. އަދި 22 ކިލޯގެ ގޭސް ފުޅިއެއްގެ އަގު ވަނީ 15 އިންސައްތައަށް ބޮޑުކޮށްފައެވެ. އަގުތަކަށް އަލަށް ގެނައި ބަދަލާއެކު އެންމެ ބޮޑު އިންސައްތައެއް އިތުރުވެފައިވަނީ ރިސޯޓުތަކަށް ވިއްކާ ގޭހުގެ އަގުންނެވެ. އެގޮތުން ރިސޯޓުތަކަށް ގޭސް ވިއްކާ އަގު 25 އިންސައްތައަށް ބޮޑުކޮށްފައިވާއިރު، ކެފޭ، ހޮޓާ އަދި ރެސްޓޯރެންޓްތަކަށް ގޭސް ވިއްކާ އަގު ވަނީ 15 އިންސައްތައަށް ބޮޑުކޮށްފައެވެ.
ގޭސް ވިއްކާ އަގަށް އަލަށް ގެނެވުނު ބަދަލާއެކު، 45 ކިލޯގެ ގޭސް ފުޅިއެއްގެ އަގު މިހާރު ވަނީ 1,314 ރުފިޔާއަށް ބޮޑުވެފައެވެ. އަދި 22 ކިލޯގެ ގޭސް ފުޅިއެއްގެ އަގު ވަނީ 500 ރުފިޔާއަށް ބޮޑުވެފައެވެ.
މެދުއިރުމަތީގެ ހަނގުރާމައިގެ ސަބަބުން ގޭހުގެ އަގުތަކަށް އަބަދުވެސް ބަދަލު އަންނަމުންދާކަން ފާހަގަކޮށްލަންޖެހެއެވެ.
