ފުވައްމުލަކު ސިޓީގެ އެއާޕޯޓް ސަރަހައްދުގައި ބޭންކް އޮފް މޯލްޑިވްސް (ބީއެމްއެލް) ގެ ސެލްފް ސާވިސް ބޭންކިންގ އޭޓީއެމް ސެންޓަރެއް ރަސްމީކޮށް ހުޅުވައި، ޚިދުމަތް ދޭން ފަށައިފިއެވެ. މިއީ އެ ސިޓީގައި ގާއިމުކުރެވުނު ބީއެމްއެލްގެ 4 ވަނަ އޭޓީއެމްއެވެ.
ފުވައްމުލަކުގައި މިދިޔަ އަހަރުގެ ތެރޭގައި ޑޮލަރު އޭޓީއެމްގެ ޚިދުމަތްވެސް ތައާރަފުކޮށްފައިވާއިރު، އަލަށް ހުޅުވުނު މި ސެންޓަރާއެކު އެ ސިޓީގެ ރައްޔިތުންނަށާއި އެއާޕޯޓުން ދަތުރުކުރާ ފަރާތްތަކަށް ފައިސާ ނެގުމާއި، ޖަމާކުރުމުގެ އިތުރުން ފައިސާ ފޮނުވުމުގެ ޚިދުމަތް 24 ގަޑިއިރު ލިބިގެންދާނެއެވެ. ބީއެމްއެލްއިން ހާމަކުރި ގޮތުގައި، ރާއްޖޭގެ ހުރިހާ ސަރަހައްދެއްގައިވެސް މި ޚިދުމަތް ބޭނުންކުރާ މިންވަރު އިތުރުވަމުންދިއުމަކީ މި ފަދަ ސެންޓަރުތަކުގެ ބޭނުންތެރިކަން ހާމަކޮށްދޭ ކަމެކެވެ.
Making essential banking more accessible to our communities, today, we have opened a new Self Service Banking ATM in Fuvahmulah City Airport. 🌴 pic.twitter.com/BcHtJ3dGAq
— Bank of Maldives (@bankofmaldives) June 17, 2026
ރާއްޖޭގެ ހުރިހާ ރަށެއްގައި އޭޓީއެމް ގާއިމުކުރުމަށް ސަރުކާރުން ފައްޓަވާފައިވާ ”މުޅި ރާއްޖެއަށް ބީއެމްއެލް އޭޓީއެމް“ މަޝްރޫއުގެ ދަށުން ފާއިތުވި ކުރު މުއްދަތެއްގެ ތެރޭގައި ބޮޑެތި ކުރިއެރުންތަކެއް ވަނީ ހޯދާފައެވެ. އެގޮތުން މިދިޔަ އަހަރުގެ ފެބްރުއަރީ މަހު ފެށި މި މަޝްރޫއުގެ ދަށުން، އެންމެ 9 މަސް ދުވަހުގެ ތެރޭގައި ރާއްޖޭގެ 20 އަތޮޅުގެ 105 ރަށެއްގައި ވަނީ އޭޓީއެމް ގާއިމުކޮށް ނިންމާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގެންގުޅުއްވާ ސިޔާސަތުގެ ދަށުން، އާބާދީގައި 2000 އަށްވުރެ ގިނަ މީހުން ދިރިއުޅޭ ކޮންމެ ރަށެއްގައި ޑޮލަރު އޭޓީއެމް ބެހެއްޓުމަށް ކުރައްވާ މަސައްކަތުގެ ތެރެއިން، މިހާތަނަށް 70 ރަށެއްގައި ވަނީ ޑޮލަރު އޭޓީއެމް ބަހައްޓާ ނިންމާފައެވެ.
ބޭންކުގެ ވިއުގަ ފުޅާކުރުމަށް ކުރަމުންދާ މަސައްކަތުގެ ދަށުން އެންމެ ފަހުން ވޭތުވެދިޔަ ހަފްތާތަކުގައި 70 ރަށެއްގައި ޑޮލަރު އޭޓީއެމް، 20 ރަށެއްގައި ދިވެހި ރުފިޔާ އޭޓީއެމްގެ އިތުރުން 6 ރަށެއްގައި ބީއެމްއެލްގެ ބްރާންޗްތައް ވަނީ ގާއިމުކޮށްފައެވެ. މިއީ މީގެކުރިން ރާއްޖޭގެ ބޭންކިންގ ތާރީޚުގައިވެސް މިހާ އަވަސް މިނެއްގައި ޚިދުމަތް ފުޅާކުރެވުނު ފުރަތަމަ ފަހަރު ކަން ފާހަގަކުރެވެއެވެ.
