އިންސާނުންގެ ގުނަވަން ޓްރާންސްޕްލާންޓް ކުރުމުގެ ބިލު ރައްޔިތުންގެ މަޖިލީހުން ފާސްކޮށް ތަސްދީގުކުރުމަށް ފޮނުއްވުމުން، އެ ބިލުގައި އިސްލާހު ކުރަންޖެހޭ މުހިންމު ކަންތައްތަކެއް ހުރިކަމަށް ފެނިވަޑައިގަންނަވާތީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ބިލު އަނބުރާ މަޖިލީހަށް ފޮނުއްވައިފިއެވެ.
މި ބިލު އަނބުރާ ފޮނުއްވާލެއްވީ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އަށް ފޮނުއްވި ރަސްމީ ސިޓީފުޅަކާ އެކުގައެވެ. އެ ސިޓީފުޅުގައި ބިލު ތަސްދީގު ނުކުރައްވައި ފޮނުއްވާލެއްވި ސަބަބުތަކާއި، ބިލުގެ މަގުސަދު ހާސިލުކުރުމަށް ހުރި ހުރަސްތައް ތަފްސީލުކޮށް ބަޔާންކުރައްވާފައިވެއެވެ.
އެ ސިޓީގައި ރައީސް ފާހަގަކުރެއްވި މުހިންމު ބައެއް ކަންތައްތަކުގެ ތެރޭގައި، ގައިދީން ގުނަވަން ހަދިޔާކުރުމާ ގުޅޭގޮތުން ބިލަށް ގެނެސްފައިވާ ބަދަލުތައް ހިމެނެއެވެ. ސަރުކާރުން ބިލު ހުށަހެޅިއިރު، ގައިދީންނަކީ މަޖުބޫރުކަމެއް ނެތި ފުރިހަމަ މިނިވަން އިހްތިޔާރުގައި ރުހުން ދެވޭނެ ބައެއް ކަމަށް ނުބެލެވޭތީ އެ ފުރުސަތު އޮތީ ހަނިކޮށްފައެވެ. ނަމަވެސް މަޖިލީހުން ބިލު ފާސްކުރިއިރު އެ ޝަރުތުތައްއް އުނިކޮށްފައިވާތީ، އެކަމުގެ ސަބަބުން ބިލު ތަންފީޒުކުރުމުގައި ގޮންޖެހުންތަކެއް ކުރިމަތިވެދާނެ ކަމަށް ރައީސް ވަނީ ފާހަގަކުރައްވައިފައެވެ.
މީގެ އިތުރުން، ގާނޫނުގެ ދަށުން އެކުލަވައިލަންޖެހޭ ގަވާއިދުތައް ހެދުމަށް ކަނޑައަޅާފައިވާ މުއްދަތުތަކާއި، ގާނޫނަށް އަމަލުކުރަން ފަށާ ތާރީޚާ ދެމެދު ފުށުއެރުންތަކެއް ހުރިކަން ރައީސްގެ ސިޓީފުޅުގައި ފާހަގަކުރައްވާފައިވެއެވެ. ވަކިން ހާއްސަކޮށް، ގުނަވަން ޓްރާންސްޕްލާންޓް ކައުންސިލް އުފެއްދުމުގެ ކުރިން، އެ ކައުންސިލުގެ ލަފާގެ މަތިން ހަދަންޖެހޭ ގަވާއިދުތައް އެކުލަވައިލުމަކީ އަމަލީ ގޮތުން ކުރެވޭނެ ކަމެއް ނޫންކަން އެމަނިކުފާނު ވަނީ ބަޔާންކުރައްވައިފައެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 91 ވަނަ މާއްދާގެ (ހ) ގެ ދަށުން މި ބިލު އަނބުރާ ފޮނުއްވަމުން، ރައީސް މުޢިއްޒު ވަނީ މަޖިލީހުން މިކަންކަމަށް ރިއާޔަތްކޮށް ބިލު އަލުން މުރާޖައާކޮށްދެއްވުމަށް އެދިވަޑައިގެންފައެވެ.
