އިންކަމް ޓެކުހުގެ ގޮތުގައި ދައުލަތަށް 2.7 ބިލިޔަން ރުފިޔާ ލިބިއްޖެއެވެ.
މިއީ މިދިޔަ 2025 ވަނަ އަހަރުގެ މި މުއްދަތުގައި ލިބުނު އާމްދަނީއާ އަޅާބަލާއިރު ބޮޑު ކުރިއެރުމެކެވެ. މީރާގެ ތަފާސްހިސާބުތަކަށް ބަލާއިރު، މިދިޔަ އަހަރުގެ މި މުއްދަތުގައި ދައުލަތަށް ލިބިފައިވަނީ 2.1 ބިލިއަން ރުފިޔާއެވެ. އެހެންކަމުން، މި އަހަރު ލިބުނު އާމްދަނީއަކީ މިދިޔަ އަހަރުގެ މި މުއްދަތުގައި ލިބުނު އާމްދަނީއާ އަޅާބަލާއިރު %28.5 އިތުރު އަދަދެކެވެ.
އިންކަމް ޓެކުހުގެ ތެރެއިން އެންމެ ބޮޑު ބައެއް ހިއްސާކުރަނީ ކުންފުނިތަކާއި އަމިއްލަ ފަރުދުން ނޫން ފަރާތްތަކުން ދައްކާ ޓެކުހެވެ. އެފަދަ ފަރާތްތަކުން 1.3 ބިލިއަން ރުފިޔާ ދައުލަތަށް ދައްކާފައިވާއިރު، މިއީ މިދިޔަ އަހަރުގެ މި މުއްދަތުގައި ލިބުނު 1.2 ބިލިއަން ރުފިޔާއާ އަޅާބަލާއިރު %8.3 ގެ ކުރިއެރުމެކެވެ.
މީގެ އިތުރުން، ރާއްޖޭގައި ވަޒަންވެރިވެފައިނުވާ ފަރާތްތަކުގެ އަތުން ނަގާ ވިތުހޯލްޑިންގ ޓެކުހުގެ ގޮތުގައި 735 މިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތުގައި ލިބުނު 523 މިލިއަން ރުފިޔާއާ އަޅާބަލާއިރު %40 އިތުރު އަދަދެކެވެ. ހަމައެހެންމެ، އަމިއްލަ ފަރުދުން ދައްކާ ޓެކުހުގެ ގޮތުގައި 214 މިލިއަން ރުފިޔާ ލިބިފައިވާއިރު، މިއީ މިދިޔަ އަހަރުގެ މި މުއްދަތުގައި ލިބުނު 200 މިލިޔަން ރުފިޔާއާ އަޅާބަލާއިރު %11.8 އިތުރު އަދަދެއްކަން ފާހަގަކޮށްލަންޖެހެއެވެ.
ބޭންކްތަކުން ނަގާ އިންކަމް ޓެކުހަށް ބަލައިލާއިރު، ބޭންކް އިންކަމް ޓެކުހުގެ ގޮތުގައި ޖުމުލަ 490 މިލިއަން ރުފިޔާ ދައުލަތަށް ވަނީ ލިބިފައެވެ. މިދިޔަ އަހަރުގެ މި މުއްދަތުގައި ދައުލަތަށް ލިބިފައިވަނީ 159 މިލިއަން ރުފިޔާއެވެ. އެހެންކަމުން މި އަދަދަކީ މިދިޔަ އަހަރުގެ މި މުއްދަތާ އަޅާބަލާއިރު %208 ގެ އިތުރުވުމެކެވެ.
