އެމެރިކާގެ ފިއްތުން ތަކަށް އިޖާބަ ދިނުމެއް ނެތް ފީފާގެ ރައީސް ޖިއާނީ އިންފަންޓީނޯ، އީރާންގެ ގައުމީ ފުޓްބޯޅަ ޓީމާ ބައްދަލުކުރައްވައި، އެ ޓީމުގެ ކުޅުންތެރިންނަށް ހިތްވަރު ދެއްވައިފިއެވެ. މި ބައްދަލުކުރެއްވުން ބާއްވާފައިވަނީ 2026 ވަނަ އަހަރުގެ ވޯލްޑް ކަޕް ކޮލިފައިންގައި ހޯމަ ދުވަހު ނިއުޒީލޭންޑާ ދެކޮޅަށް އީރާން ކުޅުނު މެޗަށް ފަހުގައެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި، އިންފަންޓީނޯ އީރާން ޓީމާ ބައްދަލުކުރެއްވީ މެޗު ނިމުމަށްފަހު ޗޭންޖިންގ ރޫމްގައެވެ. ނިއުޒީލޭންޑާ ވާދަކޮށް 2-2 އިން އެއްވަރުވި މި މެޗަށްފަހު، އިންފަންޓީނޯ ވަނީ އީރާންގެ ކުޅުންތެރިން ދެއްކި ހިތްވަރަށާއި ކުރި މަސައްކަތަށް ވަރަށް ބޮޑަށް ތައުރީފު ކުރައްވާފައެވެ. އަދި އެކި ގޮންޖެހުންތަކާއެކުވެސް އީރާންގެ ޓީމުން ދައްކަމުންދާ ކުޅުން އޭނާ ފާހަގަކުރެއްވިއެވެ.
މި ބައްދަލުކުރެއްވުމުގައި އިންފަންޓީނޯ ދެއްކެވި ވާހަކަފުޅުގައި، ބައިނަލްއަގުވާމީ މުބާރާތްތަކުގައި ކުޅުންތެރިންނަށް ދިމާވާ ދަތިތައް ބަލައިގަންނަކަމަށާއި، ފީފާގެ ފަރާތުން ހުރިހާ ޓީމުތަކަށް ދޭންޖެހޭ އެއްބާރުލުން ދޭނެކަމުގެ ޔަގީންކަން ދެއްވިއެވެ. މިއީ މުބާރާތުގައި ވާދަކުރާ ޓީމުތަކުގެ މެދުގައި އެއްބައިވަންތަކަން ގާއިމުކުރުމަށް ފީފާއިން ކުރަމުންދާ މަސައްކަތުގެ ބައެއްގެ ގޮތުގައި ދައްކަން މަސައްކަތް ކުރިނަމަވެސް، މުޅި މުބާރާތުގައި އެމެރިކާއިން އިރާނުގެ ޓީމާއިމެދު ކަންކުރަމުންދާގޮތުން މިކަމަށް ދުނިޔޭގެ ސަމާލުކަން ވަނީ ހުއްޓިފައެވެ.
ފީފާގެ ރައީސްގެ މި ޒިޔާރަތަކީ ކުރިއަށް ހުރި މެޗުތަކަށް ތައްޔާރުވަމުންދާ އީރާން ޓީމުގެ ރޫހު ވަރުގަދަވެގެންދިޔަ ކަމެއް ކަމަށް ބައެއް ފަރާތްތަކުން ދެކެއެވެ. އެހެންނަމަވެސް އިރާނަށް އަދި މުސްލިމް ބައެއް ޓީމުތަކަށް މި މުބާރާތުގައި ނާއިންސާފުން ޢަމަލުކުރަމުން ދިއުން ބަލައި ނުގަނެވޭކަމަށް ދިރާސާކުރާ ފަރާތްތަކުން ބުނެއެވެ. އަދި މިކަމަށް ފީފާއިންވެސް އަމަލީގޮތުން އަޅާލާ މަންޒަރު ފެނިގެން ނުދެއެވެ.
އިރާނުގެ ކޯޗުވެސް ވަނީ މި ތަފާތުކުރުންތަކާއި ގުޅިގެން ކަންބޮޑުވުން ފާޅުކޮށްފައެވެ.
ބައިނަލްއަގުވާމީ ފުޓްބޯޅައިގައި ކުރިމަތިވާ ގޮންޖެހުންތަކާ އެކުވެސް، އީރާން ޓީމުން އަންނަނީ މި މުބާރާތުގައި ކާމިޔާބީ ހޯދުމަށް ބުރަ މަސައްކަތްތަކެއް ކުރަމުންނެވެ.
