މާލެ ސަރަޙައްދުން ހިމަބިހި (މީސަލްސް) ޖެހިފައިވާ އިތުރު 5 މީހަކު ފެނި، މިއަހަރުގެ މިހާތަނަށް މި ބަލި ޖެހުނު މީހުންގެ ޖުމްލަ އަދަދު 20 އަށް އަރާފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި، މިދިޔަ ހަފްތާގައި އަލަށް ފެނުނު ކޭސްތަކާއެކު ބަލި ޖެހުނު މީހުންގެ ތެރޭގައި ގިނައީ 18 އަހަރުން މަތީގެ ދިވެހިންނެވެ. މި ބަލި ޖެހުނު ފަރާތްތަކާ ގާތުން ބައްދަލުވި (ކޮންޓެކްޓްވި) 489 މީހަކު މިހާތަނަށް ފާހަގަކުރެވިފައިވާއިރު، އޭގެ ތެރެއިން ބަލީގެ ނުރައްކާ އޮތް 88 އެކްޓިވް ކޮންޓެކްޓުން އެޗްޕީއޭއިން ދަނީ މޮނިޓަރ ކުރަމުންނެވެ.
ބަލި ފެތުރުން ހުއްޓުވުމަށްޓަކައި އެޗްޕީއޭއިން ވަނީ ވަރުގަދަ ފިޔަވަޅުތަކެއް އަޅަން ފަށާފައެވެ. އެގޮތުން ޞިއްޙީ ޚިދުމަތްދޭ މަރުކަޒުތަކުގައި ސަވައިލެންސްގެ މަސައްކަތް ހަރުދަނާކޮށް، ހުން އައިސް ހަމުގައި ބިހި ނަގާ މީހުން ސްކްރީން ކުރާނެ އިންތިޒާމުތައް ވަނީ ޤާއިމުކޮށްފައެވެ. މިއީ ބަލި ހުރިކަމަށް ޝައްކުކުރެވޭ މީހުން ވީހާވެސް އަވަހަށް ދެނެގަނެ، ބަލި ކޮންޓްރޯލް ކުރުމަށް ކުރެވޭ މަސައްކަތެކެވެ.
ވޭތުވެދިޔަ ހަފްތާގައި ހިމަބިހި (މީސްލްސް) ކޭސްތަކުގެ އަދާހަމަ#measles pic.twitter.com/kM7STnbnuy
— Health Protection Agency (@HPA_MV) June 16, 2026
މީގެއިތުރުން، ބަލި ފެތުރުން ހުއްޓުވުމަށްޓަކައި ޚާއްޞަ ވެކްސިން ކެމްޕޭނެއް ވެސް ވަނީ ފަށާފައެވެ. މި ކެމްޕޭނުގެ ދަށުން މިހާތަނަށް 220 ކޮންޓެކްޓުންނަށް ވެކްސިން ދީފައިވާއިރު، ފްރަންޓްލައިންގައި މަސައްކަތްކުރާ 1,118 ޞިއްޙީ ޚިދުމަތްތެރިންނަށް ވެސް ވަނީ ވެކްސިން ދީފައެވެ. އެޗްޕީއޭއިން ވިދާޅުވީ، މި ކެމްޕޭނުގެ އިސްކަންދޭ ގުރޫޕްތަކަކީ ޞިއްޙީ ޚިދުމަތްތެރިންނާއި، 18 އަހަރުން ދަށުގެ ކުދިންގެ ތެރެއިން ވެކްސިންގެ ޑޯޒްތައް ފުރިހަމަނުކުރާ ކުދިން ކަމަށެވެ.
ހިމަބިއްސަކީ ވަރަށް ފަސޭހައިން ފެތުރޭ ބައްޔެކެވެ. މި ބަލީގެ މައިގަނޑު ޢަލާމާތްތަކަކީ އާންމު ހުމުގެ އަލާމާތްތަކާއެކު ހަށިގަނޑުގައި ރަތް ކުދި ބިހިތަކެއް ނެގުމެވެ. ބަލީގެ އަލާމާތްތައް ފެންނަން ފަށާތާ ފުރަތަމަ 4 ދުވަހާއި، އޭގެ ފަހު 4 ދުވަހަކީ އެހެން މީހުންގެ ގަޔަށް ބަލި ފެތުރުމުގެ ފުރުސަތު އެންމެ ބޮޑު މުއްދަތެވެ.
އެހެންކަމުން، މިފަދަ އަލާމާތެއް ފެނިއްޖެނަމަ ލަސްނުކޮށް ޞިއްޙީ އެހީތެރިކަން ހޯދުމަށާއި، ވެކްސިން ފުރިހަމަކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.
