މާލޭގެ ބާޒާރުގައި ފިޔާގެ އަގު އުފުލި، ފިޔާ ލިބުމުގައި ދަތިތަކެއް ކުރިމަތިވެފައިވާ ކަމަށް ދެކެވޭ ވާހަކަތަކާ ގުޅިގެން، ރައްޔިތުން ކަންބޮޑުނުވުމަށާއި އެސްޓީއޯއިން ހެޔޮ އަގުގައި ފިޔާ ލިބޭނެ އިންތިޒާމް ހަމަޖައްސާފައިވާ ކަމަށް އެ ކުންފުނިން ބުނެފިއެވެ.
ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މައުލޫމާތު ދޭ ގޮތުގައި، ބާޒާރުގައި ފިޔާގެ އަގު ބޮޑުވެ، ފިޔާ ލިބުމުގައި ދަތިތަކެއް އުޅޭ ކަމުގެ މައުލޫމާތު ސޯޝަލް މީޑިއާގެ އެކި މަންސަތަކުން އެ ކުންފުންޏަށް ވަނީ ލިބިފައެވެ. ނަމަވެސް، އެސްޓީއޯގެ އައުޓްލެޓްތަކުން އެއްވެސް ދަތިކަމެއް ނެތި ކުރިއެކޭ އެއްގޮތަށް ފިޔާ ގަންނަން ލިބޭނެ ކަމުގެ ޔަގީންކަން އެ ކުންފުނިން އަރުވައެވެ.
އެސްޓީއޯއިން ފިޔާ ވިއްކަމުންދަނީ މީގެ ކުރިންވެސް އާންމުކޮށް ވިއްކަމުންދިޔަ އަގު ކަމަށްވާ ކިލޯއެއް 13 ރުފިޔާގެ މަގުންނެވެ. ބާޒާރުގައި ފިޔާގެ އަގަށް އަންނަ ބަދަލުތަކާ ގުޅިގެން ރައްޔިތުންނަށް ލުއި ފަސޭހަކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދޭ ކަމަކަށްވާއިރު، އެސްޓީއޯއިން އަންނަނީ މިކަން ކަށަވަރު ކުރަމުންނެވެ.
ކުރިއަށް އޮތް ހަފްތާގެ ތެރޭގައި ފިޔާ ހޯލްސޭލްކޮށް ދޫކުރަން ފަށާނެ ކަމަށްވެސް އެސްޓީއޯއިން ބުނެއެވެ. މީގެ އިތުރުން، އަތޮޅުތެރޭގައި ދިރިއުޅޭ ރައްޔިތުންނަށް ފަސޭހަކަމާއެކު ފިޔާ ލިބޭނެ ގޮތް ހެދުމަށްޓަކައި، އެސްޓީއޯގެ ރީޖަނަލް ފިހާރަތަކަށް ފިޔާ ފޮނުވުމުގެ މަސައްކަތްތައްވެސް މިހާރު ދަނީ ބާރުސްޕީޑުގައި ކުރަމުންނެވެ.
އެސްޓީއޯއިން އިތުރަށް ބުނީ، ބާޒާރުގައި ތަކެތީގެ އަގު ކޮންޓްރޯލްކޮށް، ރައްޔިތުންނަށް ބޭނުންވާ އަސާސީ ކާބޯތަކެތީގެ ބާވަތްތައް ހުސްނުވެ ލިބޭނެ އިންތިޒާމް ހަމަޖެއްސުމަށް އެ ކުންފުނިން އަބަދުވެސް މަސައްކަތް ކުރަމުންދާނެ ކަމަށެވެ.
އާންމުކޮށް ބާޒާރުގައި ތަކެތީގެ އަގު އުފުލޭ ކޮންމެ ފަހަރަކު އެސްޓީއޯއިން ދަނީ އާންމުންނަށް ހެޔޮ އަގުގައި ތަކެތި ފޯރުކޮށްދެއެވެ.
