ހަނގުރާމަ ނިމުމަކަށް ގެނައުމަށް އެމެރިކާ އާއި އިރާނާ ދެމެދު އެއްބަސްވުމަކާ ހަމައަށް އައިސްފައިވާތީ އެ ނިންމުމަށް ދިވެހި ސަރުކާރުން މަރުހަބާ ކިޔައިފިއެވެ.
މިކަމާ ގުޅިގެން ފޮރިންގ މިނިސްޓްރީން ނެރެފައިވާ ބަޔާނެއްގައި ބުނެފައިވަނީ، މި އެއްބަސްވުމަކީ މެދުއިރުމައްޗާއި މުޅި ދުނިޔޭގެ ސަލާމަތާއި ރައްކާތެރި ކަމަށް ލިބުނު ކުރިއެރުމެއް ކަމަށެވެ. މީގެ އިތުރުން ހުރްމުޒް ކަނޑުއޮޅިން ދަތުރުކުރުމުގެ ހުއްދަދިނުމާއެކު، ދެ ގައުމުގެ ދެމެދުގައި ހުރި މައްސަލަތަކަށް ހައްލެއް ހޯދުމަށް އެމެރިކާ އާއި އިރާނުން އެއްބަސްވުމަކަށް އައުމަކީ އެ ސަރަހައްދުގެ ހަމަޖެހުމަށް އެޅުނު މުހިންމު ފިޔަވަޅެއް ކަމަށް ވެސް އެ ބަޔާނުގައި ބުނެފައިވެއެވެ.
ދެ ގައުމުގެ ދެމެދުގައި ހުރި ހިޔާލުތަފާތުވުންތައް ނައްތާލުމަށްޓަކައި ވާހަކަދެއްކުމާއި ސުލްހަވެރި ޑިޕްލޮމެޓިކް އުސޫލުތައް އިސްކޮށް، ދެ ފަރާތުން ދެއްކި ނަމޫނާއަށް ވެސް ރާއްޖެއިން ވަނީ ތައުރީފުކޮށްފައެވެ.
މީގެ އިތުރުން ދިވެހި ސަރުކާރުން ވަނީ މަޝްވަރާތައް ކާމިޔާބުކަމާއެކު ކުރިއަށް ގެންދިއުމުގައްޔާއި، ނުތަނަވަސްކަން ކުޑަކުރުމަށް މެދުވެރިއެއްގެ ދައުރު އަދާކޮށްފައިވާ ގައުމުތަކަށް ވެސް ޝުކުރު އަދާކޮށްފައެވެ. އޭގެ ތެރޭގައި ޕާކިސްތާން، ޤަޠަރާއި ގަލްފުގެ ގައުމުތަކުން، މިކަމުގައި ވެފައިޥާ އެހީތެރިކަން ދިވެހި ސަރުކާރުން ވަނީ ފާހަގަކޮށްފައެވެ.
މި އެއްބަސްވުމުގެ ސަބަބުން ސަރަހައްދީ އިގްތިސާދީ ކުރިއެރުމަށާއި، ދެމެހެއްޓެނިވި ސުލްހައަށް ކުރިއެރުމެއް ލިބުމަށް އުއްމީދުކުރާ ކަމަށް ފޮރިންގ މިނިސްޓްރީން ވަނީ ބުނެފައެވެ.
