އެމްޑީޕީގެ ޗެއާޕާސަން ގ. ކެނެރީގޭ މުހައްމަދު ނަޝީދު އިސްވެ ހުންނަވައި، ގައުމުގެ އަމާންކަން ނަގައިލުމަށާއި ހަމަޖެހުން ގަޑުބަޑުކޮށްލުމަށް ބުރާސްފަތި ދުވަހު މަގުމައްޗަށް ނުކުތުމަށް އެ ޕާޓީގެ މެންބަރުންނަށް ގޮވާލައިފިއެވެ.
މިކަމަށް ނަޝީދު ގޮވާލީ އެމްޑީޕީގެ ޗެއާޕާސަން ކަމުގެ މަގާމާ ހަވާލުވުމަށްފަހު ބޭއްވި އެ ޕާޓީގެ ފުރަތަމަ ގައުމީ މަޖިލީހުގެ ބައްދަލުވުމުގައެވެ. މި ބައްދަލުވުމުގައި ވާހަކަ ދައްކަމުން ނަޝީދު ވަނީ ބުރާސްފަތި ދުވަހު އޮންނަ މުޒާހަރާއަށް ކޮންމެ މެންބަރަކުވެސް ވީހާވެސް ގިނަ ބަޔަކު ނެރުމަށާއި، ގައުމު ހަލަބޮލިކޮށްލުމަށް ކުރެވެން ހުރި ހުރިހާ މަސައްކަތެއް ކުރުމަށް ބާރުއަޅާފައެވެ.
މި ބައްދަލުވުމުގައި އެމްޑީޕީގެ ގައުމީ މަޖިލީހުން ފާސްކުރި ގަރާރުގައި، ހިޔާލު ފާޅުކުރުމުގެ މިނިވަންކަމުގެ ނަމުގައި މަގުމައްޗަށް ނުކުމެ ރައްޔިތުންނަށް ދުއްތުރާކޮށް މުޒާހަރާ ކުރުމަށް މެންބަރުންނަށް ހިތްވަރު ދީފައިވެއެވެ. ފާހަގަކުރެވޭ ގޮތުގައި މި މުޒާހަރާތަކުގެ އިސްސަފުގައި ހަރަކާތްތެރިވަނީ ކުށުގެ ރެކޯޑު އޮންނަ މީހުންނާއި، މަރުގެ މައްސަލަތަކާއި މަސްތުވާތަކެތީގެ ބޮޑެތި މައްސަލަތަކުގައި ހުކުމް ކުރުމުން އެކަން ތަންފީޒުކޮށް ނުނިމެނީސް އެމްޑީޕީ ސަރުކާރުގެ ނުފޫޒުން މިނިވަންކޮށްފައި ތިބި މުޖުރިމުންނެވެ.
މުހައްމަދު ނަޝީދަކީ މީގެ ކުރިންވެސް ”ތަޅާނެ ކުދިން“ ހޯދައިގެން ނުކުމެ، ދައުލަތުގެ ސަލާމަތީ ބާރުތަކާއި ފުލުހުންނާ ކުރިމަތިލައި ހަމަނުޖެހުން ހިންގުމަށް ފާޅުގައި ގޮވާލާފައިވާ މީހެކެވެ. އަދި އޭނާގެ ވެރިކަން ފުރިހަމަ ނުކުރެވިގެން އިސްތިއުފާ ދިނުމަށްފަހު މުޅި ރާއްޖޭގެ އެތަން މިތަނުގައި ބޮޑު ހުޅުޖަހާ ދިވެހިންގެ މާލިއްޔާއަށް މިލިއަން ގެއްލުން ދިން މީހެކެވެ. މާލޭގެ މަގުތަކުގެ ހަމަޖެހުން ނަގައިލުމަށް ނަޝީދު މިފަހަރުވެސް ރާވަމުންދަނީ ނުރައްކާތެރި ކުށްވެރިންނާ ގުޅިގެން ކަމަށްވުމުން، އާންމު ރައްޔިތުންގެ މެދުގައި ވަނީ ބިރުވެރިކަން އުފެދިފައެވެ.
އެމްޑީޕީގެ މި ނިންމުމާއެކު، ބުރާސްފަތި ދުވަހު މާލޭގެ އަމާންކަން ގެއްލިދާނެތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ބެލެވޭ ގޮތުގައި ސަލާމަތީ ބާރުތަކުން މިކަމަށް ފާރަވެރިވާނެއެވެ.
