ރައްޔިތުންގެ މަޖިލީހުގެ ކުރީގެ ނައިބު ރައީސް އަދި ދިއްގަރު ދާއިރާ ތަމްސީލުކުރައްވާ މެންބަރު އަޙްމަދު ނާޒިމްގެ އިތުބާރު ނެތް ކަމަށް ކޮންގްރެސް ޕާޓީން ނިންމީ އޭނާގެ އަމަލުތައް ޕާޓީއަށް ގެއްލުންވާ ގޮތަށް ބަހައްޓާތީ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ މިއަދު ވިދާޅުވެއްޖެއެވެ.
ކޮންގްރެސް ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ޢަބްދުއްރަޙީމް ވިދާޅުވީ، ނާޒިމްގެ އިތުބާރު ނެތް ކަމަށް ކޮންގްރެސް ޕާޓީން ނިންމީ އޭނާގެ އަމަލުތައް ޕާޓީއަށް ގެއްލުންވާ ގޮތަށް ބަހައްޓާތީ ކަމަށާއި އެއީ ސީދާ ޕާޓީގެ ލީޑަރޝިޕުން ނިންމާފައިވާ ނިންމުމެއް ކަމަށެވެ.
”ޕާޓީން ނިންމީ އޭނާއަށް އިތުބާރު ނެތް ކަމަށް. އެހެންވެ އެ މައްސަލަ ޕާލިމަންޓަރީ ގްރޫޕަށް ހުށަހެޅީ،“ – ޢަބްދުއްރަޙީމް ވިދާޅުވިއެވެ.
ޕާޓީގެ އަސާސީ ގަވާއިދުގެ 36 ވަނަ މާއްދާއާ ހަވާލާދެއްވައި ޢަބްދުއްރަޙީމް ވިދާޅުވީ، ޕާޓީއަށް ގެއްލުންވާ ފަދަ އަމަލެއް މެންބަރަކު ކުރާކަން ލީޑަރޝިޕަށް ފާހަގަވެއްޖެނަމަ، އެކަމަށް ފިޔަވަޅު އެޅުމުގެ ބާރު ލީޑަރޝިޕަށް ލިބިދީފައި އޮންނަ ކަމަށެވެ. މީގެ އިތުރުން ކޮންގްރެސް ޕާޓީގެ ދިއްގަރު ދާއިރާގެ ރައީސްކަމުން ވެސް ނާޒިމް ވަކިކޮށްފައިވާ ކަމަށާއި އެކަން އެގޮތަށް ކުރަން ނިންމީ އޭނާ އެ މަގާމުގައި ހުރުމަށްވުރެ، ވަކިކުރުމުން ޕާޓީއަށް ލިބޭ ފައިދާ ބޮޑުވާނެ ކަމަށް ދެކެވަޑައިގަންނަވާތީ ކަމަށް ވެސް ޢަބްދުއްރަޙީމް ވިދާޅުވިއެވެ.
ޢަބްދުއްރަޙީމް ވިދާޅުވީ، ކަން މިހެން އޮތް ނަމަވެސް ނާޒިމް، ޕާޓީން ވަކިކުރުމުގެ އެއްވެސް ވިސްނުންފުޅެއް ނުގެންގުޅުއްވާ ކަމަށެވެ.
ނާޒިމް މަޖިލީހުގެ ނައިބު ރައީސްކަމުން ވަކިކުރުމަށް ޕީއެންސީގެ ޕާލިމަންޓަރީ ގްރޫޕުން މަސައްކަތް ފެށުމުން، އެކަމާ ގުޅޭ ވޯޓު ނެގުމުގެ ކުރިން ނާޒިމް ވަނީ މަގާމުން އިސްތިއުފާ ދެއްވާފައެވެ. މިއަދު ބޭއްވި ނޫސްވެރިންގެ ބައްދަލުވުމަކީ، ދިއްގަރު ދާއިރާގެ ރައީސްކަމުން ނާޒިމް ވަކިކުރިކަން ޕާޓީން ރަސްމީކޮށް ކަށަވަރުކޮށްދިން ފުރަތަމަ ފަހަރެވެ.
