އެމެރިކާއާއި އީރާނާ ދެމެދު ތާރީޚީ ސުލްޙައިގެ އެއްބަސްވުމެއް ޤާއިމުކޮށް ހަނގުރާމަ ހުއްޓާލަން ނިންމި ނަމަވެސް، ނިރުބަވެރި ޖަމާޢަތްކަމަށްވާ އިޒްރޭލުން އެހެން ޤައުމުތަކުގެ ބިންތަކަށް އަރައި ހިންގަމުންދާ އިސްތިއުމާރީ އަނިޔާވެރިކަން ހުއްޓާނުލާނެކަން ފާޅުގައި އިޢުލާންކޮށްފިއެވެ.
އިޒްރޭލުގެ ހައްދުފަހަނައެޅި ދިފާޢީ ވަޒީރު އިސްރޭލް ކާޓްޒް މިއަދު ރަސްމީކޮށް ބުނިގޮތުގައި، އޭނާއާއި ބޮޑުވަޒީރު ބެންޖަމިން ނަތަންޔާހޫ ވަނީ ލުބުނާނު، ސީރިޔާ އަދި ޣައްޒާގެ ހިފާފައިވާ ”ސެކިއުރިޓީ ޒޯން“ (މިފަހުން އިސްތިއުމާރުކޮށްފައިވާ ބިންތައް) އިޒްރޭލުގެ އަސްކަރިއްޔާ ދާއިމީކޮށް، އަދި އެއްވެސް މުއްދަތެއް ނެތްގޮތަށް ސާބިތުވެ ތިބުމަށް ސިޔާސަތު ކަނޑައަޅާފައެވެ.
ރަށްތައް ސުންނާފަތިކޮށް ގެދޮރުން ނެރެލާ ބިންފޭރުމުގެ އަނިޔާވެރިކަން
ލެބަނަންގެ ބިންތައް ސާފުކުރުން: ދިފާޢީ ވަޒީރު ކާޓްޒް ބުނިގޮތުގައި، އިޒްރޭލުން ހިފާފައިވާ ދެކުނު ލުބުނާނުގެ ސަރަޙައްދުތަކުގައި ތިބި އާންމު ރައްޔިތުން އެއްކޮށް ބޭރުކޮށް، އެމީހުންގެ ގެދޮރާއި ބިންތައް މަތިންނާއި ބިމުގެ އަޑިން އެއްކޮށް ގޮއްވާލައި ސުންނާފަތިކުރާނެއެވެ. މީގެ ބޭނުމަކީ ގެދޮރު ގެއްލިފައިވާ 600,000 އަށްވުރެ ގިނަ ލުބުނާނުގެ ރައްޔިތުންނަށް އެނބުރި އަމިއްލަ ރަށަށް ނާދެވޭނެގޮތް ހެދުމެވެ.
ޓްރަމްޕަށް ދިން ހަރުކަށި ރައްދު: އިޒްރޭލުން ބުނީ އެމެރިކާގެ ރައީސް ޑޮނަލްޑް ޓްރަމްޕް އީރާނާއެކު ސުލްޙަވަނީ އެމެރިކާގެ އަމިއްލަ މަޞްލަޙަތަށްޓަކައި ކަމަށެވެ. ނަމަވެސް، އިޒްރޭލުގެ ސަލާމަތަށްޓަކައި ބިންތައް ހިފެހެއްޓުމަކީ އަސްކަރިއްޔާގެ އެންމެ ބޮޑު ކާމިޔާބީކަމަށްވާތީ، ބައިނަލްއަޤްވާމީ ގޮތުން ކޮންމެފަދަ ޕްރެޝަރެއް އައިނަމަވެސް ބޯ ނުލަނބާނެކަން ނަތަންޔާހޫ ވަނީ ޓްރަމްޕަށާއި އެމެރިކާގެ ދިފާޢީ ވަޒީރު ޕީޓް ހެގްސެތަށް ސާފުކޮށްދީފައެވެ.
އީރާނަށް އިންޒާރުދިނުން: ކާޓްޒް ވަނީ ލުބުނާނުގެ މައްސަލައިގެ ތެރެއަށް ވަދެ، އީރާނުން އިޒްރޭލަށް ހަމަލާއެއް ދީފިނަމަ، އީރާނުގެ މުޅި ޤައުމަށް ރައްދުގައި ”ފުލް ފޯސްގައި“ ޙަމަލާދޭނެ ކަމަށް ބުނެ ވަރުގަދަ އިންޒާރެއް ދީފައެވެ. މިއިން އެނގެނީ ބޮޑު ހަނގުރާމަ ހުއްޓާލިޔަސް، މެދުއިރުމަތީގެ ހަމަނުޖެހުންތަކުގެ އަސްލު ކަމަށްވާ އިޒްރޭލުން ލޭއޮހޮރުވުންތައް ކުރިއަށްގެންދާނެ ކަމެވެ.
