މި ސަރުކާރުގެ ”ބޯހިޔާވަހިކަން އެންމެނަށް“ ސިޔާސަތުގެ ދަށުން ބޯހިޔާވަހިކަމަށް އެދި ފޯމު ހުށަހެޅުމަށް ދީފައިވާ މުއްދަތު މިރޭގެ ނިޔަލަށް ހަމަވާނެ ކަމަށް ހައުސިންގ މިނިސްޓްރީން ބުނެފިއެވެ.
ބޯހިޔާވަހިކަމަށް އެދި ފޯމު ހުށަހެޅުމުގެ މުއްދަތު ހަމަވާ ތާރީހުގެ ގޮތުގައި ހައުސިންގ މިނިސްޓްރީން މީގެ ކުރިން ކަނޑައަޅާފައިވަނީ ހުސްވި މެއި މަހުގެ 31 ވަނަ ދުވަސް ނަމަވެސް އާންމުންގެ ގިނަ ބައެއްގެ އެދުމުގެ މަތިން މި މުއްދަތު މިހާރު ވަނީ މިރޭގެ 23:59 އާ ހަމައަށް އިތުރުކޮށްދީފައެވެ.
ހައުސިންގ މިނިސްޓްރީން ބުނެފައިވާ ގޮތުގައި، މިއީ ބޯހިޔާވަހިކަމަށް އެދި ފޯމު ހުށަހެޅުމަށް ލިބޭނެ އެންމެ ފަހު ފުރުސަތު ކަމަށާއި އެއަށްފަހު ދެން ފުރުސަތު ބަންދުވާނެ ކަމަށެވެ. އެހެންކަމުން މި ފުރުސަތުގައި ޕޯޓަލްގައިވާ މައުލޫމާތުތައް ރަނގަޅަށް ފުރިހަމަކުރުމަށްފަހު ފޯމު ހުށަހެޅުމަށް އެ މިނިސްޓްރީން ވަނީ އިލްތިމާސްކޮށްފައެވެ.
ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން މާލެ ސަރަހައްދުންނާއި އަލަށް ތަރައްގީކުރާ ރަސްމާލެ ހިމެނޭހެން ޖުމްލަ 15,000 ގޯތި ދޫކުރުމަށް ވަނީ ހަމަޖެހިފައެވެ. އޭގެ ތެރޭގައި މާލޭގެ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ ރައްޔިތުންނަށް 3,000 ގޯތި، އަދި މައިމުޅަވެފައިވާ ފަރާތްތަކަށް ހާއްސަކޮށްގެން 500 ގޯތި ހިމެނެއެވެ. މީގެ އިތުރުން މާލޭގެ ހަނި ގޯޅިތަކުގައި ހުރި ގޯތިތައް ދޫކޮށްލާ ފަރާތްތަކަށް 1,500 ގޯތި ދޫކުރުމަށް ވަނީ ހަމަޖެހިފައެވެ.
މީގެ އިތުރުން މި ސްކީމްގެ ދަށުން ސަރުކާރުން ވަނީ ޖުމުލަ 7،900 ފުލެޓް ދޫކުރުމަށް ނިންމައިފައެވެ. އޭގެ ތެރޭގައި 4,000 ފުލެޓް ހާއްސަކޮށްފައިވަނީ މާލޭ ރަށްވެހިންނަށެވެ. 1,500 ފުލެޓް މާލޭގައި ދިރިއުޅޭ އެހެން ރަށްރަށުގެ ރައްޔިތުންނަށް ދޫކުރުމަށް ހަމަޖެހިފައިވާއިރު ބާކީ 2,400 ފުލެޓަކީ ހާއްސަ އިސްކަންދޭ ކެޓަގަރީތަކަށް ދޫކުރުމަށް ކަނޑައަޅާފައިވާ ފުލެޓްތަކެވެ.
