ދުނިޔޭގެ އެންމެ ބޮޑު އެއް އޮންލައިން ޕޭމަންޓް ޕްލެޓްފޯމް ކަމަށްވާ ޕޭޕަލްގެ ހިދުމަތް އުރީދޫން ރަސްމީކޮށް މިއަދު ރާއްޖެއަށް ތައާރަފުކޮށްފި އެވެ.
ބާސެލޯ ނަސެންދުރާގައި ބޭއްވި ރަސްމިއްޔާތެއްގައި މި ހިދުމަތް ރަސްމީކޮށް އިފްތިތާހުކޮށް ދެއްވީ ރައީސް ޑރ. މުޙައްމަދު މުޢިއްޒެވެ.
ދުނިޔޭގެ އެކި ކަންކޮޅުތަކަށް ފައިސާ ފޮނުވުމަށާއި، ފައިސާ ލިބިގަތުމަށް ބޭނުންކުރާ މި މަޝްހޫރު ޕޭމަންޓް ސިސްޓަމް ރާއްޖެއަށް ތައާރަފުކުރުމަކީ ރައީސް ޑރ. މުއިއްޒުގެ ރިޔާސީ ވައުދުފުޅެކެވެ. މި މަސައްކަތް ފެށުމަށް ސަރުކާރުން ހާއްސަ އިސްކަމެއް ދީގެން މަސައްކަތްތަކެއް ކުރިއަށް ގެންދިޔައީ މިދިޔަ އަހަރުގެ ޖެނުއަރީ މަހުން ފެށިގެންނެވެ.
އުރީދޫ މެދުވެރިކޮށް ހިދުމަތް ލިބޭނެ ގޮތްރާއްޖޭގައި ޕޭޕަލްގެ ހިދުމަތް ދިނުމަށް ހަމަޖެހިފައިވަނީ އުރީދޫ ފިންޓެކްއާ ގުޅިގެންނެވެ. މި ހިދުމަތް ހޯދުމަށް ބޭނުންވާ އިންވާޑް ރެމިޓެންސް ލައިސަންސް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ވަނީ އުރީދޫއަށް ދީފައެވެ. މި އިންތިޒާމުގެ ދަށުން، ރާއްޖޭގައި ބޭނުންކުރާ ހުރިހާ ފޯނު ނަމްބަރުތަކަށް ވެސް އުރީދޫގެ އެމްފައިސާ މެދުވެރިކޮށް ޕޭޕަލްގެ ހިދުމަތް ލިބޭނެ މަގު މިހާރު ވަނީ ފަހިވެފައެވެ.
ވިޔަފާރިއާއި އިގްތިސާދީ ފައިދާތައްޕޭޕަލް ރާއްޖެއަށް ތައާރަފުވުމަކީ ރާއްޖޭގެ އޮންލައިން ވިޔަފާރިތަކަށާއި ފްރީލާންސްކޮށް މަސައްކަތްކުރާ ފަރާތްތަކަށް ލިބިގެންދާނެ ބޮޑު ފަސޭހައެކެވެ. ރައީސް ޑރ. މުއިއްޒު ފާހަގަކުރެއްވި ގޮތުގައި، މި ހިދުމަތުގެ ސަބަބުން ކޮންޓެންޓް ކްރިއޭޓަރުންނާއި އަމިއްލަ މަސައްކަތްކުރާ ފަރާތްތަކަށް ބައިނަލްއަގުވާމީ ބާޒާރުތަކުން ފައިސާ ހޯދުމަށް ފަސޭހަވެގެންދާނެއެވެ. މީގެ އިތުރުން، ރާއްޖެއަށް އަންނަ ފަތުރުވެރިންނަށް ފަސޭހައިން ފައިސާގެ މުއާމަލާތްތައް ކުރުމުގެ ފުރުސަތު ލިބި، ފަތުރުވެރިކަމުގެ ދާއިރާއަށް ވެސް މީގެ ހެޔޮ ބަދަލުތަކެއް އަންނާނެ ކަމަށް ބެލެވެއެވެ.
