ފީފާ ވޯލްޑް ކަޕްގައި ޓިއުނީޝިއާ އާއި ބައްދަލުކުރި މެޗު 5-1 އިން ކާމިޔާބުކޮށް ސްވިޑެން އިން ގުރޫޕް އެފްގެ އެއްވަނަ މަގާމު ހޯދައިފި އެވެ.
އެންމެ ފަހުން ބޭއްވި ގަތަރު ވޯލްޑް ކަޕުން ފުރުސަތު ނުލިބުނު ސްވިޑެން އިން ވަނީ މި މެޗުން ހޯދި ތިން ޕޮއިންޓާ އެކު ގުރޫޕްގެ އެއްވަނައަށް ޖެހިލައިފަ އެވެ. މެޗުގެ ފެށުން ވަރަށް ވަރުގަދަކޮށް ސްވިޑެން އިން ފެނިގެން ދިޔައިރު، ހަތްވަނަ މިނިޓުގައި ޔަސީން އަޔާރީ ވަނީ އެޓީމަށް ލީޑު ނަގައިދީފަ އެވެ. ވިކްޓާ ޔޯކެރޭޒް ފޮނުވާލި ބޯޅަ ޓިއުނީޝިއާގެ ޑިފެންޑަރުން ބްލޮކް ކުރުމުން، އޭރިއާ ބޭރުން ލިބުނު ފުރުސަތުގެ ބޭނުން ހިފައި އަޔާރީ ވަނީ ގޯލު ކާމިޔާބު ކޮށްފަ އެވެ. މީގެ އިތުރުން 30 ވަނަ މިނިޓުގައި އެލެކްޒެންޑާ އީސާކް ވަނީ ސްވިޑެންގެ ލީޑު ފުޅާކޮށްދީފަ އެވެ.
މެޗުގެ ފުރަތަމަ ހާފުގެ ފަހު 10 މިނިޓުގައި ޓިއުނީޝިއާ އިން ވަނީ ކުޅުން ރަނގަޅުކޮށް ގިނަ ފުރުސަތުތަކެއް ހޯދައިފަ އެވެ. ހަނިބަލް މެޖްބްރީ ނަގައިދިން ހުރަހަކުން 43 ވަނަ މިނިޓުގައި އޮމަރު ރެކީކް ވަނީ ލަނޑެއް ޖަހައި ޓިއުނީޝިއާއަށް ފަރަގު ކުޑަކޮށްދީފަ އެވެ. ނަމަވެސް ދެވަނަ ހާފުގައި ސްވިޑެން އިން ވަނީ އެޓީމުގެ އެޓޭކުތައް އިތުރަށް ވަރުގަދަކޮށްފަ އެވެ. އެގޮތުން 59 ވަނަ މިނިޓުގައި ވްކްޓޯ ޔޯކެރޭސް ލަނޑެއް ޖެހިއިރު، 84 ވަނަ މިނިޓުގައި މަޓިއަސް ސްވަންބާގް ވަނީ ސްވިޑެންގެ ހަތަރުވަނަ ލަނޑު ކާމިޔާބު ކޮށްފަ އެވެ.
މެޗުގެ އިތުރު ވަގުތުގެ ހަވަނަ މިނިޓުގައި އަޔާރީ ވަނީ ސްވިޑެންގެ ފަހު ލަނޑު ޖަހައިފަ އެވެ. އޭނާ ފުރަތަމަ ލަނޑު ޖެހުމަށް ފަހު އުފާފާޅު ކޮށްފައި ނުވި ނަމަވެސް، ދެވަނަ ލަނޑަށް ފަހު އޭނާ ވަނީ ޝުކުރުގެ ސަޖިދައަކަށް ތިރިވެފަ އެވެ. މި ގުރޫޕްގެ އެހެން މެޗެއްގައި ނެދަލެންޑްސް އާއި ޖަޕާން ވަނީ 2-2 އިން އެއްވަރު ވެފަ އެވެ. މުބާރާތުގެ ފޯރިގަދަ މެޗުތައް މިރޭ ވެސް ކުރިއަށް ދާނެ އެވެ. މިރޭ 9 ޖަހާއިރު ސްޕެއިން އާއި ކަބޯ ވާޑޭ ބައްދަލު ކުރާނެ އެވެ. އަދި 12 ޖަހާއިރު ބެލްޖިއަމް އާއި މިސްރު ބައްދަލުކުރާ މެޗަށް ފަހު، ރޭގަނޑު 3 ޖަހާއިރު ސައުދީ އަރަބިއްޔާ އާއި އުރުގުއޭ ވާދަކުރާނެ އެވެ. މާދަމާ ހެނދުނު 6 ޖަހާއިރު ބައްދަލު ކުރާނީ އިރާނާއި ނިއުޒިލެންޑެވެ.
