ރައްޔިތުންގެ ބޮލަކަށް ޖެހޭ ދަރަނި މި ސަރުކާރުން 6.8 އިންސައްތަ ކުޑަކޮށްފައިވާ ކަމަށާއި ސަރުކާރުގެ ބޭރުގެ ދަރަނި ވެސް ކުޑަކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ދ. މީދޫ ކައުންސިލްގެ ރައީސްގެ ގޮނޑި ވެރިކަންކުރާ ޕާޓީ ޕީއެންސީން ކާމިޔާބު ކުރުމާ ގުޅިގެން އެ ރަށުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ، މި ސަރުކާރުން ދަރަނި އަދާކުރަން ދެއްކި 1.2 ބިލިއަން ޑޮލަރުގެ ތެރޭގައި ކުރީގެ ފަސް ރައީސުންގެ ވެރިކަމުގައި ނަގާފައިވާ ދަރަނިތައް ވެސް ހިމެނޭ ކަމަށެވެ.
ދަރަނި އަދާކުރަން ދެއްކި ފައިސާގެ ތެރޭގައި މި ސަރުކާރުން ނެގި ބޮޑެތި ދަރަނިތަކެއް ހިމެނޭ ކަމަށް ބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ރައްދުދެއްވަމުން ރައީސް ވަނީ ތަފާސްހިސާބުތައް ބޭނުންކުރައްވައި އެކި ސަރުކާރުތަކުގައި ޖީޑީޕީގެ ނިސްބަތުން ދަރަނި ހުރި މިންވަރު ދައްކަވައިފައެވެ.
”ދައުލަތުގެ ޖުމްލަ ދަރަނި ހުރީ މި ސަރުކާރު ފެށުނު އިރު 123 ޕަސެންޓްގައި، 2023 އާ ހިސާބުން ދެން ބައްލަވާ މެއި 2026 އާ ހަމައަށް ވެގެންދާ ގޮތް ދައުލަތުގެ ޖުމްލަ ބޭރުގެ ދަރަނި ޖީޑީޕީގެ ނިސްބަތުން 123.6 ޕަސެންޓްގައި ހުރި ދަރަނި، މިސަރުކާރުން މިވަނީ 121.2 އަށް ތިރިކޮށްފައި. ރައްޔިތުންގެ ބޮލުގައި އެޅޭ ދަރަނި ޖީޑީޕީގެ ނިސްބަތުން މިވަނީ ކުޑަކޮށްފައި،“ – ރައީސް ވިދާޅުވިއެވެ.
ތަފާސްހިސާބުތައް ދައްކަވަމުން ރައީސް މުޢިއްޒު ވިދާޅުވީ، މި ސަރުކާރުން ދަރަނި އަދާކުރަން ދެއްކި 1.2 ބިލިއަން ޑޮލަރުގެ ތެރޭގައި ކުރީގެ ފަސް ރައީސުންގެ ދުވަސްވަރު ނެގި ދަރަނި ހިމެނޭ ކަމަށެވެ. އެމަނިކުފާނު ވަނީ އެކަމުގެ ތަސްސީލުތައް ވެސް ހާމަކުރައްވައިފައެވެ.
”ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ 891 މިލިއަން ޑޮލަރު އަޅުގަނޑުމެން މިހާރު ދައްކައިިފިން. ރައީސް ޔާމީން ސަރުކާރުގައި ނެގި ދަރަނިތަކުގެ ތެރެއިން 195 މިލިއަން ޑޮލަރު މި 1.2 ބިލިއަން ޑޮލަރުގެ ތެރޭގައި ހިމެނޭ. ރައީސް ނަޝީދާއި ރައީސް ވަޙީދުގެ ދެ ސަރުކާރު އެއްކޮށް އެ ފަސް އަހަރު ތެރޭގައި ނަގާފައި ހުރި ދަރަނީގެ ތެރެއިން ވެސް 62.5 މިލިއަން ޑޮލަރު މި 1.2 ބިލިއަން ޑޮލަރުގެ ތެރޭގައި ހިމެނޭ، ހަމަ އެގޮތަށް ރައީސް މައުމޫނުގެ ސަރުކާރުން ނަގާފައި ހުރި ދަރަނީގެ ތެރެއިން ވެސް 38.1 މިލިއަން ޑޮލަރު، މި 1.2 ބިލިއަން ޑޮލަރުގެ ތެރޭގައި ހިމެނޭ،“ – ރައީސް ވިދާޅުވިއެވެ.
ދަރަނިތައް އަދާކުރުމުން ވެސް އެ ސަރުކާރުތަކުގެ ދަރަނީގެ ތެރެއިން އެތައް މިލިއަން ޑޮލަރެއް އަދިވެސް ދައްކަންވެފައި އެބަހުރި ކަމަށް ރައީސް މުޢިއްޒު ވަނީ އިތުރަށް ވިދާޅުވެފައެވެ.
