ދ. މީދޫ ކައުންސިލްގެ ރައީސް ހޮވުމަށް ބޭއްވި ބައި-އިލެކްޝަންގައި ވެރިކަންކުރާ ޕާޓީ ޕީއެންސީން ހޯދި ކާމިޔާބީ ފާހަގަކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު މިއަދު އެ ރަށަށް ވަޑައިގެންފިއެވެ.
ރައީސްގެ ދެކަނބަލުން މީދޫއަށް ވަޑައިގަތުމުން، އެ ރަށުގެ ރައްޔިތުން ވަނީ އެ ދެކަނބަލުންނަށް ވަރަށް ހޫނު މަރުހަބާއެއް ދަންނަވައިފައެވެ.
ރައީސް މުޢިއްޒު މީދޫއަށް މިހާރު ކުރައްވަމުން ގެންދަވާ ދަތުރުފުޅަކީ ޕީއެންސީގެ ރައީސްގެ ހައިސިއްޔަތުން، އެ ރަށު ކައުންސިލް ރައީސްގެ ގޮނޑި ޕީއެންސީގެ ކެނޑިޑޭޓު ސުހާ އިބްރާހިމް ކާމިޔާބުކުރެއްވުމާ ގުޅިގެން، އެކަމުގެ އުފަލުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
މި ކާމިޔާބީ ފާހަގަކުރުމުގެ ގޮތުން މިރޭ މީދޫގައި ހާއްސަ ޖަލްސާއެއް ބޭއްވުމަށް ވަނީ ހަމަޖެހިފައިވާއިރު މި ޖަލްސާގައި ރައީސާއި މެޑަމް ސާޖިދާ ބައިވެރިވެވަޑައިގެން، ރަށުގެ ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ.
