ދުނިޔޭގެ ކަނޑުތަކުގެ ދުވަސް ފާހަގަކުރުމުގެ ގޮތުން މުޅި ރާއްޖޭގެ ހުރިހާ ރަށްތަކަކަށް ހުޅުވާލައިގެން ބާއްވާ ފަރު މަސްވެރިކަމުގެ މުބާރާތުގައި ބައިވެރިވުމަށް ފިޝަރީޒް މިނިސްޓްރީން ހުޅުވާލައިފިއެވެ.
މިކަމާ ގުޅިގެން ފިޝަރީޒް މިނިސްޓްރީން ބުނެފައިވަނީ، ގޫގުލް ފޯމު މެދުވެރިކޮށް އެ މުބާރާތުގައި ބައިވެރިވުމުގެ ފުރުސަތު އަންނަ މި މަހުގެ 17 ވަނަ ދުވަހުގެ މެންދުރުފަހު 14:00 އާއި ހަމައަށް މިހާރު ހުޅުވާލައިފައިވާ ކަމަށެވެ. މި މުބާރާތުގައި ބައިވެރިވުމުގެ ފުރުސަތު ލިބޭނީ ލިޔެކިޔުންތައް ފުރިހަމަކޮށް އެންމެ އިސްކޮށް ފޯމު ހުށަހަޅާ ތަރުތީބުން ކަމަށް އެ މިނިސްޓްރީން ވަނީ ބުނެފައެވެ.
މި މުބާރާތުގައި މާލެ ސިޓީން ބައިވެރިވެވޭނީ، އިސްވެ ފޯމު ހުށަހަޅާ ޝަރުތު ހަމަވާ ފުރަތަމަ 20 ޓީމަށް ކަމަށާއި އަދި އަޔޮޅުތެރޭގެ ރަށްރަށުން ބައިވެރިވާނެ ޓީމުތަކުގެ އަދަދު ކަނޑައަޅާނީ އެ ރަށެއްގެ ކައުންސިލުން ކަމަށް ފިޝަރީޒް މިނިސްޓްރީން ވަނީ ބުނެފައެވެ.
އެ މިނިސްޓްރީން އިތުރަށް ބުނެފައިވަނީ، މި މުބާރާތުގައި ގަވައިދުތަކުން ހިފުން ނުވަތަ ބޭނުންކުރުން މަނާކޮށްފައިވާ ބާވަތްތައް ހިފުމާއި ބޭނުންކުރުން މަނާވާނެ ކަމަށާއި ދޯނީގެ ފަޅުވެރިން މަސްވެރިކަމުގެ އެއްވެސް ހަރަކާތެއްގައި ބައިވެރި ނުވެވޭނެ ކަމަށެވެ. މީގެ އިތުރުން ރާއްޖޭގައި ހަދާފައިވާ އެއްވެސް ގާނޫނަކުން މަނާ ކޮށްފައިވާ ނުވަތަ ހިމާޔަތްކޮށްފައިވާ ސަރަހައްދަކުން މަސްވެރިކަން ނުކުރެވޭނެ ކަމަށްވެސް އެ މިނިސްޓްރީން ވަނީ ބުނެފައެވެ.
