ކަނޑުމަގުން ރާއްޖެއިން ބޭރަށް މުދާ ފޮނުވުމުގައި ފުރިހަމަކުރަންޖެހޭ ކްލިއަރެންސް މަރުހަލާތަކަށް އެވްރެޖްކޮށް މިހާރު 10 ދުވަސް ހޭދަވާކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ. މިކަން ހާމަކޮށްފައިވަނީ ކަސްޓަމްސްއިން ކުރިއަށްގެންދިޔަ ދިރާސާއެއްގެ މައްޗަށް ބިނާކޮށް އެކުލަވާލާފައިވާ ”ޓައިމް ރިލީޒް ސްޓަޑީ 2025“ ރިޕޯޓުގައެވެ.
މި ދިރާސާގައި ބަލާފައިވަނީ ކަސްޓަމްސް ޑިކްލަރޭޝަން ހުށަހަޅާ ވަގުތުން ފެށިގެން، މުދާ ބަރުކޮށްގެން ބޯޓު ފުރާ ވަގުތާ ހަމައަށް ހޭދަވާ ވަގުތަށެވެ. ރިޕޯޓުގައިވާ ގޮތުން، މި މުޅި މަރުހަލާ ފުރިހަމަކުރުމަށް އެވްރެޖްކޮށް 10 ދުވަހާއި، 10 ގަޑިއިރާއި، 14 މިނެޓު ހޭދަވެއެވެ.
ކަސްޓަމްސްއިން ފާހަގަކުރި ގޮތުގައި، މި ދިރާސާގެ ހޯދުންތަކުގެ އަލީގައި އިދާރީ އިސްލާހުތަކާއި ޑިޖިޓަލް ނިޒާމުތައް މެދުވެރިކޮށް، މުދާ ފޮނުވުމުގައި ހިނގާ ވަގުތު ކުރުކުރެވޭނެ ގޮތްތައް ދެނެގަނެވޭނެއެވެ.
ދިރާސާގެ ތަފްސީލީ ހިސާބުތަކަށް ބަލާއިރު، ޑިކްލަރޭޝަން ހުށަހަޅާ ވަގުތުން ފެށިގެން އެސެސްމަންޓްގެ މަސައްކަތް ނިމުމާ ހަމައަށް ގާތްގަނޑަކަށް 15 ގަޑިއިރާއި 6 މިނެޓު ހޭދަވެއެވެ. އަދި ފައިސާ ދެއްކުމުގެ މަރުހަލާއަށް އިތުރު 17 ގަޑިއިރާއި 31 މިނެޓު ހޭދަވާކަމަށް ވަނީ ފާހަގަކޮށްފައެވެ.
މީގެ އިތުރުން، އޮފް-ޝޯ ރިކުއެސްޓަށް 1 ދުވަހާއި 16 ގަޑިއިރާއި 55 މިނެޓު ހޭދަވާއިރު، އޮފް-ޝޯ އެޕްރޫވަލްއަށް 1 ދުވަހާއި 9 ގަޑިއިރާއި 47 މިނެޓް ހޭދަވެއެވެ. މުދާ ބަލައި ފާސްކުރުމުގެ މަރުހަލާގައި ސަރުކާރުގެ އެކި އިދާރާތަކުން ކުރަންޖެހޭ އިންސްޕެކްޝަންތައް ނިންމުމަށް އެވްރެޖްކޮށް 1 ދުވަހާއި 9 ގަޑިއިރާއި 35 މިނެޓު ހޭދަވެއެވެ.
📊Key finings of the “Maldives Time Release Study 2025”
📑 🚢 From Declaration submission to vessel departure:
Total export clearance time shows an average of 10 days, 10 hours and 14 minutes.
➡️ Swipe through to explore the timeline for each clearance stage. pic.twitter.com/NxBpZYk78y
— Maldives Customs Service (@CustomsMv) June 13, 2026
ކަސްޓަމްސްގެ ރިޕޯޓުގައިވާ ގޮތުން، ބުކިން ފޯމަށް ހުއްދަ ލިބުމަށް ގާތްގަނޑަކަށް 1 ދުވަހާއި 13 ގަޑިއިރާއި 57 މިނެޓު ހޭދަވާ ނަމަވެސް، މުޅި ސިލްސިލާގައި އެންމެ ގިނަ ވަގުތު ހޭދަވަނީ އެންމެ ފަހު މަރުހަލާ ކަމަށްވާ މުދާ ބަރުކޮށް ބޯޓު ފުރުމުގެ މަރުހަލާގައެވެ. މި މަރުހަލާއަށް އެކަނިވެސް 2 ދުވަހާއި، 12 ގަޑިއިރާއި، 3 މިނެޓު ހޭދަވާކަމަށް ތަފާސްހިސާބުތަކުން ދައްކައެވެ.
