އެމެރިކާއާއި އީރާނާ ދެމެދު ހަނގުރާމަ ހުއްޓާލުމުގެ އެންމެ ފަހުގެ މަޝްވަރާތައް ޔޫރަޕްގައި ކުރިއަށްދާއިރުވެސް، ޔަހޫދީ ނިރުބަވެރި ޖަމާޢަތް، އިޒްރޭލުން ލުބުނާނުގެ ދެކުނުގެ ސަރަޙައްދުތަކަށް ދެމުންދާ ލާއިންސާނީ ޙަމަލާތައް ވަރަށް ބޮޑަށް އިތުރުކޮށްފިއެވެ. ފާއިތުވީ 24 ގަޑިއިރު ތެރޭގައި އިޒްރޭލުގެ އަސްކަރިއްޔާއިން ވަނީ ލުބުނާނުގެ ދެކުނާއި އިރުމަތީގެ ބާލްބެކް ސަރަޙައްދުގެ 70 އަށްވުރެ ގިނަ މަރުކަޒަށް ވައިގެ ބާރުގަދަ ޙަމަލާތަކެއް ދީފައެވެ.
މި ޙަމަލާތަކުގެ ކުރިން އިޒްރޭލުން ވަނީ ދެކުނު ލެބަނަންގެ މުހިންމު ރަށެއް ކަމަށްވާ ނަބާތިއާ ހިމެނޭގޮތަށް 24 ރަށެއްގެ ރައްޔިތުންނަށް ”ގެދޮރު ދޫކޮށް ވަގުތުން ފިލުމަށް“ އިންޒާރުދީ، ބޮޑު ސަރަޙައްދެއް އެއްކޮށް ހުސްކުރުވާފައެވެ.
މަޖުބޫރު ބްލޮކޭޑާއި ގެދޮރުން ނެރި ބިންފޭރުމުގެ އަނިޔާވެރިކަން
– ޒަހްރާނީގެ އަމުރު: އިޒްރޭލުގެ ހައްދުފަހަނައެޅި އަސްކަރީ ތަރުޖަމާނު އަވިޗާއި އަދުރާއީ ވަނީ، ޒަހްރާނީ ކޯރުން އުތުރަށް (ހަނގުރާމައިގެ ބޯޑަރާ 45 ކިލޯމީޓަރު ދުރަށް) ހުރިހާ އާންމު ރައްޔިތުން ވަގުތުން ދިއުމަށް ޢަމުރުކޮށްފައެވެ. މިކަމުގެ ސަބަބުން ޒަހްރާނީ ކޯރުގެ ދެކުނުގައި ތިބި އެތައް ހާސް ބަޔަކު ވަނީ ކާބޯތަކެއްޗާއި ބޭހުން މަޙްރޫމްވެ، މަގުތައް މައްޗަށް ގިނަވެފައެވެ. ބޮންއެޅުމުގެ ސަބަބުން ނަބާތިއާ ރަށް މިހާރު އޮތީ އެއްކޮށް ފަޅުވެފައެވެ.
– އިންސާނީ ކާރިސާ: ބައިނަލްއަޤްވާމީ އެހީދޭ ޖަމާޢަތްތަކުން (އައިއާރުސީ) ހާމަކުރާ ގޮތުގައި، ލެބަނަންގައި ގެދޮރު ގެއްލިފައިވާ މީހުންގެ އަދަދު މިހާރު ވަނީ 1.1 މިލިއަނަށް އަރާފައެވެ. އެމެރިކާއާއި އީރާނުން ސުލްޙަވިޔަސް، އިޒްރޭލުން ލުބުނާނާ ދެކޮޅަށް ކުރާ ހަނގުރާމަ ހުއްޓާނުލާނެކަމުގެ އިންޒާރު ހަރުކަށި ފިކުރު ނަތަންޔާހޫ ދީފައިވުމުން، މުޅި ސަރަޙައްދުގެ ނުތަނަވަސްކަން އަދިވެސް އޮތީ ބޮޑު ބިރުވެރިކަމާއި ނުރައްކަލެއްގެ ތެރޭގައެވެ.
